តាកែវ៖ ថ្លែងនៅក្នុងឱកាសអញ្ជើញធ្វើបាឋកថាថ្នាក់ខេត្ត ស្តីពីសិទ្ធិក្រោយការចាប់ខ្លួន ឬឃាត់ខ្លួន តាមក្រមនីតិវិធីព្រហ្មទណ្ឌ ដែលរៀបចំធ្វើឡើងនៅព្រឹកថ្ងៃព្រហស្បតិ៍ ទី២៦ ខែធ្នូ ឆ្នាំ២០១៩ នៅសណ្ឋាគារសេវិនដេ ក្នុងក្រុងដូនកែវ លោក ជីវ ចាន់តារា ព្រះរាជអាជ្ញាអមអយ្យការសាលាដំបូងខេត្តតាកែវ បានមានប្រសាសន៍ថា នៅក្នុងដំណាក់កាលរឿងព្រហ្មទណ្ឌ មន្រ្តីនគរបាលយុត្តិធម៌ទាំងអស់ ត្រូវតែយល់ដឹងឲ្យបានច្បាស់អំពីតួនាទី របស់ខ្លួនក្នុងពេលចុះអនុវត្ត ជៀងវាសប្រាកចេញពីច្បាប់ នាំឲ្យមានបញ្ហាដល់ខ្លួន ។
លោក ជីវ ចាន់តារា មានប្រសាសន៍បន្តថា មន្រ្តីនគរបាលយុត្តិធម៌របស់យើង នៅក្នុងការចុះអនុវត្តរឿង ក្តីព្រហ្មទណ្ឌ អាចនឹងមានការចាប់ខ្លួន ឬឃាត់ខ្លួនជនល្មើសតាមការជាក់ស្តែង ឬអាចនឹងតាមការស៊ើបអង្កេតជាដើម ដូច្នោះការចាប់ខ្លួន ឬឃាត់ខ្លួននេះដែរ ត្រូវធ្វើដោយត្រឹមត្រូវតាមច្បាប់ជាធរមាន ពិសេសក្រមនីតិវិធីព្រហ្មទណ្ឌ ព្រោះមនុស្សម្នាក់មានសិទ្ធិគ្រាប់គ្រាន់ក្នុងការការពារដោយច្បាប់ ។
លោកព្រះរាជអាជ្ញាខេត្តតាកែវ បន្ថែមទៀតថា ត្រង់ចំណុចការអនុវត្តតួនាទីឲ្យត្រឹមត្រូវ តាមច្បាប់របស់មន្រ្តីអនុវត្តច្បាប់ ដែលទទួលបានសម្បទាជាមន្រ្តីនគរបាលយុត្តិធម៌ ពិសេសជៀងវាងមោឃភាពនៃនីតិវិធី ហើយធានាបាននូវសិទ្ធិជនសង្ស័យ ជនត្រូវចោទ ជនជាប់ចោទ ពិរុទ្ធជន ក៏ដូចជាទណ្ឌិត មន្រ្តីនគរបាលយុត្តិធម៌ ត្រូវអនុវត្តការងាររបស់ខ្លួនដោយយកចិត្តទុកដាក់ ដោយផ្នែកទៅលើក្រមនីតិវិធីព្រហ្មទណ្ឌ និងច្បាប់ពិសេសបន្ថែមទៀត ។ ទន្ទឹមនិងមាន ការចាប់ខ្លួន ឬឃាត់ខ្លួនចំពោះជនល្មើសនៃរឿងក្តីព្រហ្មទណ្ឌ មន្រ្តីនគរបាលយុត្តិធម៌ ត្រូវគោរពសិទ្ធិរបស់ជនល្មើសហើយត្រូវធ្វើទៅតាមនីតិវិធីច្បាប់ មានន័យថា ជនសង្ស័យដែលត្រូវបានមន្រ្តីនគរបាលយុត្តិធម៌ចាប់ឬឃាត់ខ្លួន ពួកគាត់នៅតែមានសិទ្ធិនិងការពារដោយច្បាប់ព្រោះសិទ្ធិទាំងនេះ មានចែងនៅក្នុងរដ្ឋធម្មនុញ្ញ ច្បាប់ សន្ធិសញ្ញា អនុសញ្ញាអន្តរជាតិផ្សេងៗដែលពាក់ព័ន្ធនឹងសិទ្ធិមនុស្សផងដែរ ហើយអ្វីដែលសំខាន់នៅក្នុងដំណាក់កាលចាប់ឬឃាត់ខ្លួន មន្រ្តីអនុវត្តច្បាប់ត្រូវតែប្រាប់មូលហេតុ នៃការចាប់ឬឃាត់ខ្លួនជនសង្ស័យ និងប្រាប់អំពីសិទ្ធិក្នុងការទទួលជួបមេធាវី ឬសិទ្ធិទទួលការព្យាបាលជំងឺពីគ្រូពេទ្យ ប៉ុន្តែការចាប់ឬឃាត់ខ្លួនជនសង្ស័យមិនអាចលើសពី៤៨ម៉ោងបាននោះទេ ត្រូវតែបញ្ជូនសំណុំរឿងមកកាន់តុលាការ។
លោក ឃុត ណារី មន្រ្តីសិទ្ធិមនុស្សអង្គភាពនីតិរដ្ឋ នៃការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា មានប្រសាសន៍ឲ្យដឹងដែរថា បាឋកថាថ្នាក់ខេត្តស្តីពីសិទ្ធិក្រោយការចាប់ខ្លួន ឬឃាត់ខ្លួន តាមក្រមនីតិវិធីព្រហ្មទណ្ឌនេះ គឺផ្តោតជាសំខាន់ទៅលើសិទ្ធិរបស់ជនសង្ស័យ ថាតើពួកគាត់មានសិទ្ធិអ្វីខ្លះនៅក្នុងផ្លូវច្បាប់ ហើយការចាប់ខ្លួនមានប្រសិទ្ធភាព ការស៊ើបអង្កេតមានប្រសិទ្ធភាព និងការបញ្ជូនសំណុំរឿនមានប្រសិទ្ធភាព គឺត្រូវមើលទៅមន្រ្តីនគរបាលយុត្តិធម៌ ថាតើគាត់អនុលោមតាមក្រមនីតិវិធីព្រហ្មទណ្ឌ ត្រឹមត្រូវតាមរបៀបណា ព្រោះក្រមព្រហ្មទណ្ឌ និងក្រមនីតិវិធីព្រហ្មទណ្ឌគឺគោរពសិទ្ធិមនុស្ស នឹងមិនបានប្រឆាំងនឹងសិទ្ធិមនុស្សឡើយ ដូច្នោះបាឋកថានាពេលនេះ នឹងបន្ថែមការយល់ដឹង ចំណេះដឹងផ្នែកច្បាប់ ទៅដល់មន្រ្តីនគរបាលយុត្តិធម៌ នឹងយល់ដឹងកាន់តែច្បាស់អំពីសិទ្ធិរបស់ជនសង្ស័យក្រោយពេលចាប់ឬឃាត់ខ្លួន ៕ដោយ៖ តាកែវ
