ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀង និងលោកស្រី ឈុន ណារី ព្រមទាំងក្រុមគ្រួសារ និងក្រុមការងារពាក់ព័ន្ធ នាព្រឹកថ្ងៃទី២៧ ខែធ្នូ ឆ្នាំ២០១៩នេះ បានអញ្ជើញចុះជួបសំណេះសំណាល និងសួរសុខទុក្ខ រៀបចំអាហារសាមគ្គីជូនក្មួយៗកុមារកំព្រា ដែលកំពុងស្នាក់នៅមណ្ឌលនានា ក្នុងខេត្តដែលប្រារព្ធ ធ្វើនៅសាលប្រជុំធំសាលាខេត្តស្វាយរៀង ។
លោក ម៉ែន វិបុល អភិបាលខេត្តស្វាយរៀង បានពាំនាំនូវការផ្ដាំផ្ញើសួរសុខទុក្ខ ពីសំណាក់សម្ដេចតេជោនាយករដ្ឋមន្ត្រី និងសម្ដេចកិតិ្តព្រឹទ្ធបណ្ឌិត លោក ហ៊ុន ម៉ានិត និងលោកស្រី ឌី សុខីទីឃាយុកោ ដែលសម្ដេច លោកនិងលោកស្រី តែងតែគិតគូរពីសុខទុក្ខ ផ្ដល់នូវភាពកក់ក្ដៅ តាមរយៈការជួយឧបត្ថម្ភទាំងសម្ភារ ថវិកា គាំទ្រ និងលើកទឹកដល់ក្មួយៗ កុមារកំព្រាទាំងអស់ នៅទូទាំងប្រទេស ក៏ដូចជានៅខេត្តស្វាយរៀង ។
លោកអភិបាលខេត្តបានមានប្រសាសន៍បន្តថា ការពិតក្មួយៗកំព្រាឳពុកម្តាយមែន តែចិត្តក្មួយៗមិនកំព្រាទេ ព្រោះក្មួយៗមានសម្ដេចទាំងពីរ មានអស់លោក លោកស្រី ជាអាជ្ញាធរគ្រប់លំដាប់ថ្នាក់ និងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តស្វាយរៀង តែងតែនៅក្បែរក្មួយៗជានិច្ច ដើម្បីដោះស្រាយការលំបាក និងក្តីកង្វល់នានារបស់ក្មួយៗ ដូចជាកម្មវិធីនៅថ្ងៃនេះ ជាក់ស្ដែងគឺត្រូវបានប្រារព្ធឡើងជារៀងរាល់ឆ្នាំ ហើយនឹងនៅតែបន្តប្រារព្ធជូនក្មួយៗ នាឆ្នាំក្រោយៗទៀត ។
លោកអភិបាលខេត្ត ក៏បានផ្តាំផ្ញើដល់ក្មួយទាំងអស់ ត្រូវខិតខំរៀនសូត្រ គោរពតាមការណែនាំរបស់ប្រធានមជ្ឈមណ្ឌល លោកគ្រូ អ្នកគ្រូ និងត្រូវមាន សីលធម៌ សុជីវធម៌ គុណធម៌ ដើម្បីឲ្យក្លាយជាពលរដ្ឋគំរូ ជាទំពាំងស្នងឫស្សី និងជាធនធានសម្រាប់រួមចំណែក ក្នុងការអភិវឌ្ឍប្រទេសជាតិ ។
នៅក្នុងឱកាសនេះផងដែរ លោកអភិបាលខេត្ត និងលោកស្រី ក៏បានចែកជូននូវសម្ភារៈសិក្សា និងថវិកាដល់ក្មួយៗកុមារកំព្រាចំនួន១២៦នាក់ ក្នុង១នាក់ ទទួលបានសម្ភារសិក្សា និងឃីត ១កញ្ចប់ កាបូបស្ពាយ១ ព្រមទាំងថវិកា ៥ម៉ឺនរៀល ចំណែកអ្នកគ្រប់គ្រងមណ្ឌល ម៉ែដោះ និងអ្នកបើកបរ ក្នុងម្នាក់ៗ ទទួលបានឃីត ១កញ្ចប់ និងថវិកា ៥ម៉ឺនរៀលផងដែរ ៕ ដោយ៖ វ៉ៃកូ
