ភ្នំពេញ៖ នៅរសៀលថ្ងៃទី២៦ ខែធ្នូ ឆ្នាំ២០១៩ លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម បានទទួលជួប លោក Patric Murphy ឯកអគ្គរដ្ឋទូតសហរដ្ឋអាមេរិកដែលទើបតែងតាំងថ្មីប្រចាំកម្ពុជា ដើម្បីសម្តែងការគួរសម និងពិភាក្សាការងារ នៅទីស្តីការក្រសួង ។
លោក Patric Murphy ឯកអគ្គរដ្ឋទូតសហរដ្ឋអាមេរិក ដែលទើបតែងតាំងថ្មីប្រចាំកម្ពុជា បានសម្តែងនូវទឹកចិត្តរីករាយ ចំពោះការបំពេញបេសកកម្មទូតនៅកម្ពុជា ដើម្បីបន្តសកម្មភាព និងកិច្ចសហប្រតិបត្តិការ ជាមួយដៃគូកម្ពុជា ក្នុងនាមជាប្រទេសធ្លាប់មានទំនាក់ទំនង កិច្ចសហប្រតិបត្តិការជាមួយគ្នា ជាយូរលង់មកហើយ ។ ជាពិសេសស ក្នុងជំនួបនេះ លោកបានសិក្សាស្វែងយល់ពីគោលនយោបាយអភិវឌ្ឍន៍វិស័យឧស្សាហកម្មរបស់កម្ពុជា វិស័យសហគ្រាសធុនតូចនិងមធ្យម និងនីតិវិធីពាក់ព័ន្ធនិងការធ្វើពាណិជ្ជកម្មយានយន្តរបស់សហរដ្ឋអាមេរិក នៅកម្ពុជា តាមរយៈការទទួលយកស្តង់ដារយានយន្តសហរដ្ឋអាមេរិកលើទីផ្សារកម្ពុជា ។
លោកទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ ដែលលោក Patric Murphy ត្រូវតែងតាំងជាឯកអគ្គរដ្ឋទូតសហរដ្ឋអាមេរិកប្រចាំកម្ពុជា និងសង្ឃឹមថា៖ ក្នុងបេសកកម្មការទូតរបស់លោក ទំនាក់ទំនងនៃប្រទេសទាំងពីរនឹងត្រូវពង្រឹងបន្ថែមទៀត ក្នុងកំរិតផលប្រយោជន៍រួម និងកិច្ចសហប្រតិបត្តិការទូលំទូលាយ។ ទាក់ទងនិងវិស័យឧស្សាហកម្ម លោក ទេសរដ្ឋមន្ត្រី ចម ប្រសិទ្ធ បានលើកឡើងពីភាពរីកចម្រើនលើវិស័យនេះ បន្ទាប់ពីកម្ពុជាបានធ្វើសមាហរណកម្មសេដ្ឋកិច្ចរបស់ខ្លួន ក្នុងប្រព័ន្ធពិភពលោក និងមានកិច្ចព្រមព្រៀងទ្វេភាគីរវាងកម្ពុជា និងសហរដ្ឋអាមេរិក ក៏ដូចជាជាមួយប្រទេសនានាជាដៃគូលើពិភពលោក ។ រីឯ គោលនយោបាយអភិវឌ្ឍន៌វិស័យឧស្សាហកម្មកម្ពុជាពីឆ្នាំ២០១៥-២០២៥ បានផ្តោតជាសំខាន់ទៅលើការអភិវឌ្ឍន៍បដិវត្តឧស្សាហកម្ម ៤.0 ជាឧស្សាហកម្មបច្ចេកវិទ្យាជាន់ខ្ពស់មួយ ហើយយកខេត្តព្រះសីហនុទាំងមូលជាតំបន់សេដ្ឋកិច្ចពិសេសពហុបំណង ។ មួយវិញទៀត ភាពរីកចម្រើនលើវិស័យឧស្សាហកម្មកាត់ដេរសម្លៀកបំពាក់ និងវាយនភ័ណ្ឌ ក៏ដូចជាស្បែកជើង រហូតដល់បច្ចុប្បន្ននេះ ដោយសារកម្ពុជាអនុវត្តនូវរូបមន្តជាគំរូ ក្នុងចំណោមប្រទេសអភិវឌ្ឍន៍តិចតួចលើពិភពលោក គឺ “ការធ្វើពាណិជ្ជកម្មផ្សារភ្ជាប់ និងស្តង់ដារការងារ” (Link Trade with Labour Standard) ជាមួយនិងកម្មវិធីរោងចក្រកាន់តែប្រសើរនៅកម្ពុជា (BFC) ស្ថិតក្រោមយន្តការត្រួតពិនិត្យរបស់អង្គការអន្តរជាតិផ្នែកការងារ (ILO) ដែលជាលក្ខ័ណ្ឌចាំបាច់មួយក្នុងការជំរុញឲ្យមានការការគោរពសិទ្ធិកម្មករ និងច្បាប់ការងារជាធរមាន នៅកម្ពុជា ។ ទាក់ទងវិស័យសហគ្រាសធុនតូចនិងមធ្យម (SME) លោកបានជម្រាបថា៖ វិស័យនេះនៅកម្ពុជា មានចំនួនជាង៥សែនមូលដ្ឋាន សម្រាប់គាំទ្រដល់កំណើនសេដ្ឋកិច្ចជាតិ ។ ប៉ុន្តែការចុះបញ្ជីទទួលស្គាល់តាមផ្លូវច្បាប់បានត្រឹម៥% ប៉ុណ្ណោះ ដែលយើងកំពុងខិតខំជំរុញបន្ថែមទៀតលើការងារនេះ ។ ដោយឡែកចំពោះ នីតិវិធីពាក់ព័ន្ធនិងការជំរុញការធ្វើពាណិជ្ជកម្មយានយន្តរបស់សហរដ្ឋអាមេរិក នៅកម្ពុជា លោកបានបញ្ជាក់ថា៖ ជារួមភាគីកម្ពុជា បានឯកភាពទទួលស្គាល់ស្តង់ដារសុវត្ថភាពយានយន្ត នៃសហរដ្ឋអាមេរិកសម្រាប់ទីផ្សារកម្ពុជា ហើយក៏បានឯកភាពគ្នា ឲ្យក្រុមការងារបច្ចេកទេសនៃប្រទេសទាំងពីររៀបចំឯកសារគតិយុត្ត ដើម្បីត្រៀមចុះហត្ថលេខាជាមួយគ្នានាពេលខាងមុខ ៕ដោយ៖កូឡាប
