យន្តហោះដឹកអ្នកដំណើរមួយគ្រឿងបានធ្លាក់បុកអគារកំពស់ ២ជាន់ក្នុងប្រទេសកាហ្សាក់ស្ថាន បណ្តាលឲ្យមនុស្សយ៉ាងតិចណាស់ចំនួន ១៥នាក់ស្លាប់។
មន្រ្តីកាហ្សាក់ស្ថានបាននិយាយថា យន្តហោះរបស់ក្រុមហ៊ុនអាកាសចរណ៍ Bek Air បានធ្លាក់ភ្លាមៗ ក្រោយពេលហោះចេញពីព្រលានយន្តហោះ Almaty នៅព្រឹកថ្ងៃសុក្រនេះ និងបានបុកទៅនឹងអគារមួយខ្នង។
ក្នុងហេតុការណ៍នោះ ក៏មានមនុស្សយ៉ាងតិច ៦០នាក់ផងដែររងរបួស។
មន្រ្តីនៅព្រលានយន្តហោះនិយាយថា មានអ្នកដំណើរចំនួន ៩៣នាក់ និងបុគ្គលិកហោះហើរចំនួន ៥នាក់នៅលើយន្តហោះប្រភេទ Fokker 100។
ជើងយន្តហោះ Flight Z92100 កំពុងធ្វើដំណើរចេញពីព្រលាន ស្ថិតក្នុងទីក្រុង Almaty ឆ្ពោះទៅកាន់រដ្ឋធានី Nur-Sultan មុនពេលជួបគ្រោះអកុសលនោះ។ មូលហេតុនៃការធ្លាក់ដ៏រន្ធត់នោះ មិនទាន់ត្រូវបានគេដឹងនៅឡើយទេ។
បើតាមអ្នកសារព័ត៌មានរបស់ Reuters ដែលបាននៅជិតកន្លែងកើតហេតុ បានឲ្យដឹងថា នៅពេលធ្លាក់ មានការចុះអ័ព្ទយ៉ាងខ្លាំង។
សូមបញ្ជាក់ថា នេះមិនមែនជាការធ្លាក់យន្តហោះលើកទីមួយទេ ក្នុងទីក្រុងខាងលើ។ កាលពីថ្ងៃទី ២៩ ខែមករា ឆ្នាំ ២០១៣ ក៏មានករណីធ្លាក់យន្តហោះផងដែរ បណ្តាលឲ្យមនុស្ស ២០នាក់ស្លាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC