តាកែវ៖ ការប្រកាសរៀបចំពិធីបុណ្យឆ្លងឆ្នាំសាកលឆ្នាំ ២០១៩-២០២០ នៅបរិវេនសួនច្បារមាត់បឹងតាកែវ នាពេលខាងមុខនេះ បានធ្វើឲ្យសំណាក់បងប្អូនប្រជាពលរដ្ឋរស់នៅក្នុងក្រុងដូនកែវ មានការចាប់អារម្មណ៍ខ្លាំងចំពោះចំណាត់ការរៀបចំពីធីបុណ្យឆ្លងឆ្នាំសាកល ដើម្បីលំអសោភ័ណភាពក្រុង ក៏ដូចជាការបង្កឲ្យមានភាពអ៊ូរអរ និងដើម្បីចូលរួមប្រកួតប្រជែងទីក្រុងដែលមានពិធីបុណ្យឆ្លងឆ្នាំសាកលល្អជាងគេប្រចាំឆ្នាំ Best Countdown City of the year នូវក្នុងបេះដូងខេត្តតាកែវផងដែរ ។
សូមបញ្ជាក់ថា នេះជាលើកទី១ ហើយដែលរដ្ឋបាលក្រុងដូនកែវ បានរៀបចំឲ្យមានពិធីឆ្លងឆ្នាំសាកល ឆ្នាំ២០២០ នេះឡើង ហើយការរៀបចំនោះផងដែរ ក៏មានការចូលរួមសហការជាមួយនិងបណ្តាក្រុមហ៊ុន រៀបចំតាំងពិព័រណ៍ផលិតផលជាច្រើន ការប្រគំតន្ត្រី បាញ់កាំជ្រួច និងបង្ហោះគោម ចាប់ពីម៉ោង ៥ល្ងាច ដល់ម៉ោង ០០ ថ្ងៃឆ្លងចូលឆ្នាំថ្មី ។
បើតាមការឲ្យដឹងពីលោក កង អាណាន់ អភិបាលក្រុងដូនកែវ បានប្រសាសន៍ថា ការរៀបពិធីបុណ្យឆ្លងឆ្នាំនេះ គឺជាលើកទី១ សម្រាប់ក្រុងដូនកែវ ហើយលោកសង្ឃឹមថា និងមានការចូលរួមពីសំណាក់បងប្អូនប្រជាពលរដ្ឋ មកចូលរួមលេងកម្សាន្តយ៉ាងច្រើនកុះករ ។ លោកបន្តថា អាជ្ញាធរក្រុងបានខិតខំណាស់ពីមួយឆ្នាំទៅមួយឆ្នាំ លើការងារវិវឌ្ឍខ្លួន បានន័យថា ធ្វើឲ្យសោភ័ណភាពក្រុងរបស់យើងកាន់តែមានភាពស្រស់ស្អាត មានភាពអ៊ូរអរ រាល់គ្រប់កម្មវិធីបុណ្យជាតិទាំងអស់ ហើយក្រុងដូនកែវនិងរំពឹងទុកថា និងសម្រេចយកចំណាត់ថ្នាក់មួយ ក្នុងចំណោយទីក្រុងផ្សេងៗដែលធៀបជាមួយនិងក្រុង ដែលមានតំបន់ទេសចរណ៍ ឲ្យនូវក្នុងចំណាត់ថ្នាក់ល្អប្រសើរមួយ មិនតែប៉ុណ្ណោះក្រុងដូនកែវនៅឆ្នាំខាងមុខ និងសម្រេចយកផ្ការំដួល ៣ទងឲ្យបាន ចំពោះទីក្រុងស្អាត ៕ដោយ៖ តាកែវ
