ភ្នំពេញ៖ លោក ឈឹម ផលវិរុណ ប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្តល់យោបល់ បានថ្លែងថា ឧត្តមក្រុមប្រឹក្សាពិគ្រោះ និងផ្តល់យោបល់ គ្រោងនឹងស្នើសុំសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា យកថវិកាប្រចាំឆ្នាំ២០១៩ ដែលនៅសល់ដើម្បីទៅទិញរថយន្ត សម្រាប់បម្រើការងារបេសកកម្មចុះតាមមូលដ្ឋាន។
លោក ឈឹម ផលវរុណ បានថ្លែងក្នុងឱកាសឧត្តមក្រុមប្រឹក្សាពិគ្រោះ និងផ្តល់យោបល់ បានរៀបចំសន្និបាតបូកសរុបការងារ ១៦ខែដំបូង និងទិសដៅការងារឆ្នាំ២០២០ នៅថ្ងៃទី២៧ ខែធ្នូ ឆ្នាំ២០១៩។ លោកបានឲ្យដឹងថា ការងារទាំងអស់របស់ឧត្តមក្រុមប្រឹក្សាពិគ្រោះ និងផ្តល់យោបល់ ផ្សារភ្ជាប់នឹងថវិកាប្រចាំឆ្នាំ២០១៩ ដែលមានទឹកប្រាក់សរុបចំនួន ១.៣១៨.៩២៥ដុល្លារអាមេរិក។
លោកបានបញ្ជាក់ថា ក្នុងឆ្នាំ២០១៩នេះ ការចំណាយជាក់ស្តែងពិតប្រាកដចំនួន ៨៦៨.៩២៥ដុល្លារអាមេរិក ដូច្នេះនៅសល់ ៤៥០.១៩៣ដុល្លារអាមេរិក។ ចំពោះថវិកានៅសល់នេះ ឧត្តមក្រុមប្រឹក្សាពិគ្រោះ និងផ្តល់យោបល់ មានបំណងស្នើសុំជាគោលការណ៍គោរពជូន សម្តេចតេជោនាយករដ្ឋមន្ត្រី ផ្តល់ការអនុញ្ញាតយកថវិកានេះ ទៅទិញរថយន្តសម្រាប់បម្រើការបេសកកម្មតាមមូលដ្ឋាន ព្រោះកន្លងមកការចុះបេសសកម្ម ទាំងប្រតិភូគណបក្ស ទាំងមន្ត្រីលេខាធិការដ្ឋាន ប្រើប្រាស់រថយន្តឯកជនផ្ទាល់ខ្លួន ដោយសារតែឧត្តមក្រុមប្រឹក្សាពិគ្រោះ និងផ្តល់យោបល់ ពុំមានរថយន្ត។
លោក ឈឹម ផលវិរុណ បានលើកឡើងថា ថវិកាឆ្នាំ២០១៩ របស់ឧត្តមក្រុមប្រឹក្សាពិគ្រោះ និងផ្តល់យោបល់ ដែលនៅសេសសល់ ហើយដែលគ្រោងនឹងស្នើសុំប្រមុខរាជរដ្ឋាភិបាល យកទៅទិញរថយន្ត មិនមែនទិញដើម្បីបម្រើបុគ្គលណាម្នាក់ឡើយ គឺសម្រាប់ឧត្តមក្រុមប្រឹក្សាពិគ្រោះ និងផ្តល់យោបល់ទាំងមូល ក្នុងការបម្រើបេសកកម្មការងារ។
លោក ឈឹម ផលវិរុណ បានបន្តថា យោងតាមច្បាប់ កញ្ចប់ថវិការបស់ឧត្តមក្រុមប្រឹក្សាពិគ្រោះ និងផ្តល់យោបល់ ដែលប្រើមិនអស់ ត្រូវបង្វិលចូលរដ្ឋវិញ ប៉ុន្តែ បើសិនជាមានការឯកភាព ពីប្រមុខដឹកនាំរាជរដ្ឋាភិបាល ឲ្យយកទៅប្រើប្រាស់ សម្រាប់ប្រយោជន៍ផ្សេងទៀតនោះ ទើបអាចប្រើប្រាស់បាន។ សំណើសុំនេះ មិនប៉ះពាល់នឹងកញ្ចប់ថវិកាឆ្នាំ២០២០ទេ ហើយរថយន្តទាំងនោះ ត្រូវចុះបញ្ជីសារពើភ័ណ្ឌជាទ្រព្យសម្បត្តិរបស់រដ្ឋ ដើម្បីទ្រទ្រង់ជាមធ្យោបាយសម្រាប់ប្រតិភូគណបក្ស និងលេខាធិការដ្ឋានចុះបេសកកម្ម៕ដោយ៖បញ្ញាស័ក្តិ
