ប្រទេសចិន រុស្សី និងអ៊ីរ៉ង់ បានចាប់ផ្តើមធ្វើសមយុទ្ធរួមគ្នារយៈពេល ៤ថ្ងៃនៅមហាសមុទ្រឥណ្ឌា និងឈូងសមុទ្រអូម៉ង កាលពីថ្ងៃសុក្រម្សិលមិញនេះ។ នេះបើតាមការបញ្ជាក់របស់មេបញ្ជាការអ៊ីរ៉ង់។
ការធ្វើសមុទ្ររួមគ្នានេះ កើតឡើងខណៈដែលកំពុងតែមានភាពតានតឹង ចាប់តាំងពីសហរដ្ឋអាមេរិច បានដក់ខ្លួនចេញពីសន្និសញ្ញានុយក្លេអ៊ែរជាឆ្នាំ ២០១៥ ជាមួយអ៊ីរ៉ង់ កាលពីខែឧសភា ឆ្នាំមុន។
មេបញ្ជាការកងទ័ពជើងទឹកអ៊ីរ៉ង់ឈ្មោះ Gholamreza Tahani បានថ្លែងថា “សារនៃការធ្វើសមយុទ្ធរួមគ្នានោះគឺ សន្តិភាព មិត្តភាព និងសន្តិសុខយូរអង្វែងតាមរយៈកិច្ចសហប្រតិបត្តិការ និងសាមគ្គីភាព ហើយវានឹងបង្ហាញថា អ៊ីរ៉ង់មិនអាចបំបែកបានឡើយ”។
ក្រុងតេហេរ៉ង់បានបន្ថែមថា សមយុទ្ធនោះ រួមមានការសង្រ្គោះនាវាពេលកំពុងត្រូវភ្លើងឆេះ ឬក៏ការសង្រ្គោះនាវាពេលកំពុង ស្ថិតក្នុងការវាយប្រហាររបស់ចោរសមុទ្រ និងការបាញ់ហ្វឹកហាត់។
មេបញ្ជាការអ៊ីរ៉ង់បន្ថែមថា “គោលបំណងនៃការធ្វើសមយុទ្ធនេះគឺដើម្បីជំរុញសន្តិសុខពាណិជ្ជកម្មដែនទឹកអន្តរជាតិ និងប្រឆាំងការប្លន់តាមសមុទ្រ និងអំពើភេរវកម្ម ព្រមទាំងការចែករំលែកព័ត៌មានគ្នា និងបទពិសោធន៍។”
សូមបញ្ជាក់ថា ភាពតានតឹងក្នុងតំបន់បានកើនឡើង ក្រោយពេលអាមេរិចបានប្រកាសដកខ្លួនចេញពីសន្និសញ្ញានុយក្លេអ៊ែរ និងបានធ្វើការដាក់ទណ្ឌកម្មប្រឆាំងនឹងអ៊ីរ៉ង់ បណ្តាលធ្វើឲ្យអ៊ីរ៉ង់ធ្វើការសងសឹកមកវិញ តាមវិធានការកាត់បន្ថយការប្តេជ្ញាចិត្តរបស់ខ្លួនជុំវិញបញ្ហានុយក្លេអ៊ែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
