ក្រុមហ៊ុនមួយដែលគ្រប់គ្រងដោយកូនស្រីបង្កើតរបស់តារាក្បាច់គុន លី សៀវឡុង (Bruce Lee) បានធ្វើការប្តឹងភោជនីយដ្ឋានមួយរបស់ចិន ដោយសារតែប្រើប្រាស់រូបភាពឪពុកនាងដោយគ្មានការអនុញ្ញាត និងទារប្រាក់សំណងចំនួន ៣០លានដុល្លារអាមេរិច។ នេះបើតាមការចុះផ្សាយរបស់កាសែតចិន។
ក្រុមហ៊ុន លី សៀវឡុង ដែលមានមូលដ្ឋាននៅរដ្ឋកាលីហ្វញ៉ា និងគ្រប់គ្រងដោយអ្នកស្រី Shannon Lee (កូនបង្កើត លី សៀវឡុង) បានដាក់ពាក្យប្តឹងភោជនីយដ្ឋាន Real Kungfu ទៅកាន់តុលាការក្រុងសៀងហៃ កាលពីថ្ងៃពុធកន្លងទៅនេះ និងបានស្នើឲ្យក្រុមហ៊ុននោះ បញ្ឈប់ការប្រើប្រាស់រូបភាព និងបង់ប្រាក់បន្ថែមចំនួនជាង ១២.០០០ដុល្លារដើម្បីសង់លើការដាក់ពាក្យបណ្តឹងនោះ។
ក្រុមហ៊ុនក៏បានស្នើឲ្យភោជនីយដ្ឋានដែលស្ថិតនៅទីក្រុងក្វាងចូវ ចេញការបញ្ជាក់ក្នុងរយៈពេល ៩០ថ្ងៃ ដើម្បីបញ្ជាក់ថា សាខាភោជនីយដ្ឋានរបស់ខ្លួនគ្មានសិទ្ធិធ្វើអ្វីលើរូបភាពរបស់ លី សៀវឡុងឡើយ។
ចំពោះករណីនេះ ភោជនីយដ្ឋាន Real Kungfu បានបង្ហោះនៅលើគណនី Weibo របស់ខ្លួន ដោយលើកឡើងថា ខ្លួនមានការងឿងឆ្ងល់យ៉ាងខ្លាំងចំពោះបណ្តឹងនោះ ខណៈដែលខ្លួនបានប្រើប្រាស់ឡូហ្គោនោះអស់រយៈពេល ១៥ឆ្នាំមកហើយ។ ភោជនីយដ្ឋាននិយាយថា វាមានបញ្ហាខ្លះនៅពេលលើកមុន ប៉ុន្តែការប្រើប្រាស់ឡូហ្គោនោះត្រូវបានអនុញ្ញាតដោយអាជ្ញាធរជាតិ។
ការប្តឹងនោះកើតឡើង ក្រោយពេលរដ្ឋាភិបាលចិនបានប្តេជ្ញាចិត្តថានឹងធ្វើការបង្កើនការការពារកម្មសិទ្ធិបញ្ញា។
សូមបញ្ជាក់ថា ភោជនីយដ្ឋាន Real Kungfu ដែលលក់ម្ហូបចិនថ្លៃៗ ត្រូវបានបង្កើតឡើងក្នុងឆ្នាំ ១៩៩០ ហើយមានសាខាចំនួន ៥៧កន្លែងក្នុងទីក្រុងជាច្រើននៃប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ The Star
