តាកែវៈ ក្រោយមានការសិក្សាប្រកបដោយគុណភាព និងមានការប្រកួតប្រជែងលើសម័យបច្ចេកវិទ្យាទំនើប លើទីផ្សារការងារ នាពេលបច្ចុប្បន្ននេះ សាខាសកលវិទ្យាល័យបៀលប្រាយខេត្តាកែវ បានរើសនិសិ្សតឆ្នើមក្នុងឆ្នាំសិក្សា ២០១៨-២០១៩ ថ្នាក់បរិញ្ញាបត្រជាន់ខ្ពស់ បរិញ្ញាបត្រ/បរិញ្ញាបត្ររង និងថ្នាក់មជ្ឈមណ្ឌលភាសាបរទេស CFL ចំនួន ១៧៩នាក់ ដែលសុទ្ធសឹងតែមានសមត្ថភាព ក្នុងចំណោមសិស្សនិសិ្សតជាច្រើននាក់ ដែលជាប់ក្នុងចំណាត់ថ្នាក់ចាប់ពីលេខ ១ ដល់លេខ ៥ ។
ថ្លែងក្នុងឳកាសនោះលោក ហូរ វរៈ នាយកភូមិភាគនារតីនៃសកលវិទ្យាល័យបៀលប្រាយ បានលើកឡើងថា ការសិក្សាគឺជំហ៊ានតំបូងសម្រាប់យុវជន យុវជនារីទាំងអស់ដែលត្រូវតែយកចិត្តទុកដាក់ខ្ពស់ លើកខិតខំប្រឹងប្រែងរៀនសូត្រ ដើម្បីទទួលបាននូវចំណេះវិជ្ជាពិត ងាយស្រួលក្នុងការប្រឡូកក្នុងការប្រកួតប្រជែងក្នុងទីផ្សារការងារនាពេលបច្ចុប្បន្ន លើតម្លៃខ្លួន និងសមត្ថភាព ដែលខ្លួនមាន ដើម្បីទទួលបាននៅប្រាក់ខែខ្ពស់ ។
លោកនាយកភូមិភាគនារតី បន្តថា ការចែកប័ណ្ណសរសើរដល់និសិ្សតឆ្នើមនេះ ជាការលើកទឹកចិត្ត ផ្តល់កិត្តិយសដល់សិស្សនិសិ្សត ដែលមានសមត្ថភាពពិត ក្នុងការប្រឡងប្រណាំង លើការសិក្សា ប្រកបដោយគុណភាពខ្ពស់ ស្របតាមគោលនយោបាយកំណែទម្រង់ស៊ីជម្រៅ របស់ក្រសួងអប់រំយុវជន និងកីឡា ដែលតម្រូវទាមទារឲ្យតាមបណ្តាសាលា ឬសកលវិទ្យាល័យទាំងអស់ ត្រូវរឹតបន្តឹងលើគុណភាពអប់រំ ដើម្បីស្វែងរកអ្នកមានសមត្ថភាពពិត ឲ្យចូលរួមធ្វើការងារជួយដល់សង្គមជាតិ ។
លោក ញ៉ែម សាមុត នាយកសាខាសកលវិទ្យាល័យបៀលប្រាយខេត្តតាកែវ បានឲ្យដឹងថា ក្នុងឆ្នាំសិក្សា ២០១៩-២០២០ នេះ សាខាបៀលប្រាយខេត្តតាកែវ បានធ្វើការបណ្តុះបណ្តាលថ្នាក់សិក្សាចំនួន ៣កំរិត និងមាន ៥មហាវិទ្យាល័យ គឺកម្រិតបរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ រួមមានមហាវិទ្យាល័យវិទ្យាសាស្រ្ត និងបចេ្ចកវិទ្យា នីតិសាស្រ្ត និងវិទ្យាសាស្ត្រសង្គម សិល្បៈមនុស្សសាស្ត្រ និងភាសា គ្រប់គ្រងធុរកិច្ច វិទ្យាសាស្ត្រសេដ្ឋកិច្ច និងកសិកម្ម ដែលមានសិស្សនិសិ្សតកំពុងសិក្សាចំនួន ១៤៨២នាក់ ៕ដោយ៖ តាកែវ
