មនុស្សយ៉ាងហោចណាស់ចំនួន ៧៩នាក់បានស្លាប់ និងជិត ១៥០នាក់បានរងរបួស ក្រោយពេលមានការបំផ្ទុះគ្រាប់បែកអត្តឃាត ក្នុងឡាននៅកន្លែងដែលមានមនុស្ស ប្រមូលផ្តុំច្រើន ស្ថិតនៅជាយរដ្ឋធានី Mogadishu នៃប្រទេសសូម៉ាលី កាលពីថ្ងៃសៅរ៍កន្លងទៅនេះ។ នេះបើតាមការបញ្ជាក់របស់មន្រ្តីរដ្ឋាភិបាល។
អ្នកនាំពាក្យរដ្ឋាភិបាលឈ្មោះ Ismael Mukhtar បានថ្លែងប្រាប់ CNN ដូច្នេះថា ជនវាយប្រហារបានបើកឡានរបស់ខ្លួន ចូលមកតំបន់ត្រួតពិនិត្យ ដែលភ្ជាប់ពីភាគខាងត្បូងប្រទេសសូម៉ាលី ទៅកាន់រដ្ឋធានី Mogadishu។
ក្នុងចំណោមអ្នកស្លាប់ មាននិស្សិត ទាហាន និងជនស៊ីវិល។
ការវាយប្រហារកើតឡើង អំឡុងពេលមានមនុស្សប្រមូលផ្តុំគ្នាជាច្រើនៅម៉ោង ៨ព្រឹកក្នុងរដ្ឋធានីរបស់ប្រទេសសូម៉ាលី។
ប៉ូលីសបញ្ជាក់ថា ចំនួនអ្នកស្លាប់អាចនឹងកើតឡើង ដោយសារតែមានអ្នករបួសធ្ងន់ជាច្រើន ដែលត្រូវបានគេបញ្ជូនទៅកាន់មន្ទីរពេទ្យ។
នាយករដ្ឋមន្រ្តីសូម៉ាលី លោក Hassan Ali Khaire បានសម្តែងការរំលែកទុក្ខចំពោះគ្រួសារ និងសាច់ជាតិរបស់ជនរងគ្រោះ និងបានព្រមានថា ប្រទេសកំពុងស្ថិតក្នុងកាលៈទេសៈសង្រ្គាម។
លោកថ្លែងថា “ខ្ញុំសូមប្រាប់ជនរួមជាតិនៅក្នុងពិភពលោកទាំងអស់ថា ទឹកចិត្តរបស់ប្រជាជនសូម៉ាលី មិនអាចត្រូវបំផ្លាញដោយការវាយប្រហារ របស់ក្រុមភេរវករនោះឡើយ។ សត្រូវរបស់យើងនឹងត្រូវបរាជ័យ ហើយជ័យជម្នះនឹងបានមកប្រជាជនសូម៉ាលីនាចុងបញ្ចប់”។
ជាការឆ្លើយតបចំពោះការវាយប្រហារនោះ រដ្ឋាភិបាលបានប្រកាសថា នៅថ្ងៃអាទិត្យម្សិលមិញនេះ រដ្ឋាភិបាលបានធ្វើការវាយប្រហារ តាមដែនអាកាសជាមួយនឹងបញ្ជាការអាហ្រ្វិច អាមេរិច ទៅលើតំបន់ al-Shabaab ដែលជាមូលដ្ឋានរបស់ក្រុមជីហាត នៅក្នុងប្រទេស៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
