ខេត្តព្រះសីហនុ៖ អាជីវករប្រកបរបរលក់ដូរតាមឆ្នេរអូត្រេះ១ , អូត្រេះ២ និងឆ្នេរអតីតក្រុមហ៊ុនអារីស្តុន កាលពីព្រឹកថ្ងៃទី៣០ ខែធ្នូ ឆ្នាំ២០១៩ បានប្រមូលផ្តុំគ្នានៅមុខសាលាខេត្តព្រះសីហនុ ដើម្បីស្នើសុំដល់ លោក គួច ចំរើន ជាអភិបាលខេត្ត ជួយអន្តរាគមន៍ឲ្យពួកគាត់ បានលក់ដូរតាមឆ្នេរសមុទ្រខាងនេះ ដូចធម្មតាឡើងវិញ។
ការប្រមូលផ្តុំគ្នាលើកបដាតវ៉ារបស់ក្រុមអាជីវករខាងលើនេះ ធ្វើឡើងជាបន្តបន្ទាប់ ក្រោយពីរដ្ឋបាលខេត្តព្រះសីហនុ បានចេញសេចក្តីជូនដំណឹងឲ្យអាជីវករ រុះរើតូបលក់ដូរចេញពីឆ្នេរ ដើម្បីយកទៅតាំងនោះធ្វើការអភិវឌ្ឍន៍ឆ្នេរ។
មន្ត្រីសាលាក្រុងព្រះសីហនុ បានឲ្យដឹងថា សកម្មភាពចុះរុះរើសម្អាត ឆ្នេរ នឹងចាប់អនុវត្តន៍នៅដើមខែមករា ឆ្នាំ២០២០។
មន្ត្រីរដ្ឋបាលក្រុងព្រះសីហនុ សង្កត់ធ្ងន់ថា វិធានការចុះរុះរើតូបលក់ដូរនៅឆ្នេរអូរត្រេះ និងឆ្នេរអារីស្តុន ទំនងជាអាជ្ញាធរមិនលើកលែងដល់អាជីវករទេ ព្រោះ ត្រូវរៀបចំសោភ័ណភាព បរិស្ថាន និងអនាម័យ នៅតាមឆ្នេរនានា ឲ្យស្របតាមគម្រោងប្លង់ របស់គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា៕ ដោយ៖ ដែន សីមា