ភ្នំពេញ ៖ ថ្លែងក្នុងពិធី ប្រមូលផ្តុំ កម្លាំងនគរបាល រាជធានីភ្នំពេញ ក្នុងឱកាសគោរព ទង់ជាតិ នៅព្រឹក ថ្ងៃចន្ទទី៣០ ខែធ្នូ ឆ្នាំ២០១៩ លោក ឧត្តមសេនីយ៍ឯក ស ថេត អគ្គស្នងការរង នគរបាលជាតិ និងជាស្នងការនគរបាល រាជធានីភ្នំពេញ បានអំពាវនាវ កម្លាំងនគរបាល ក្រោមឱវាទ និងប្រជាពលរដ្ឋ ចូលរួមគោរព ច្បាប់ចរាចរណ៍ ឱ្យបានម៉ឺងម៉ាត់ ដើម្បីការពារអាយុជីវិត គ្រាដែលរបាយការណ៍ បានបង្ហាញឱ្យដឹងថា នៅឆ្នាំ២០១៩អត្រាគ្រោះថ្នាក់ចរាចរណ៍ បានកើតឡើង នៅរាជធានីភ្នំពេញ មានការកើនឡើងគួរឱ្យព្រួយបារម្ភ។
ពាក់ព័ន្ធបញ្ហាគ្រោះថ្នាក់ចរាចរណ៍នេះផងដែរ លោក ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានមានប្រសាសន៍ជំរុញមន្ត្រីនគរបាលដែលជាមន្ត្រីអនុវត្តច្បាប់ ត្រូវគោរពច្បាប់ចរាណ៍ដើម្បីជាគំរូល្អសម្រាប់ប្រជាពលរដ្ឋនិងជំរុញឱ្យមានការផ្សព្វផ្សាយអប់រំ ទៅដល់កូនចៅនិងប្រជាពលរដ្ឋឱ្យបានយល់ដឹង ទូលំទូលាយអំពីសារសំខាន់នៃច្បាប់ចរាចរណ៍ផ្លូវគោក ដើម្បីនាំគ្នាចូលរួមគោរច្បាប់ចរាចរណ៍ ដោយរក្សាឱ្យបានសុវត្ថិភាព អាយុជីវិត និងទ្រព្យសម្បត្តិ។
សូមបញ្ជាក់ថា យោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញ បានបង្ហាញឱ្យដឹងថា នៅឆ្នាំ២០១៩អត្រាគ្រោះថ្នាក់ចរាចរណ៍កើតឡើងចំនួន១៦០៨លើក បើប្រៀបធៀបនៅឆ្នាំ២០១៨ កើតឡើង៦៧១លើក ដោយមានការកើនឡើងចំនួន៩៣៧លើក បណ្តាលឱ្យមនុស្សស្លាប់៣៣៨នាក់, រងរបួសធ្ងន់១១៦៣នាក់ និងរងរបួសស្រាល៥៩៦នាក់។
មូលហេតុនៃការកើតឡើង គ្រោះថ្នាក់ចរាចរណ៍ដោយសារ ការបើកបរយានយន្តប្រើប្រាស់ល្បឿនលឿន, មិនប្រកាន់ស្តាំ, បើកបរក្នុងស្ថានភាពស្រវឹង, មិនគោរពអាទិភាព, មិនគោរពភ្លើងសញ្ញា, បើកបរធ្វេសប្រហែស, បើកបរបញ្ច្រាសទិសនិងបើកបរប្រជែងគ្មានការប្រុងប្រយ័ត្ន៕ដោយ៖បញ្ញាស័ក្តិ
