ភ្នំពេញ៖ ការចុះផ្សាយព័ត៌មានពាក់ព័ន្ធនឹងអគ្គនាយកដ្ឋានពន្ធដារដែលថា ធ្វើប៉ាតង់ត្រូវបង់ ១ ៨០០ ដុល្លារ លើសពី១៥ ថ្ងៃ ពិន័យ ៥០០ ដុល្លារ ។ តែអគ្គនាយកដ្ឋានពន្ធដារ សូមធ្វើការបដិសេធយ៉ាងដាច់អហង្ការ ចំពោះខ្លឹមសារនៃការចុះផ្សាយព័ត៌មាន ដែលអាចនាំឱ្យមានការភាន់ច្រឡំមកលើការបំពេញភារកិច្ចរបស់មន្ត្រី នៃអគ្គនាយកដ្ឋានពន្ធដារ។
នាពេលថ្មីៗកន្លងទៅនេះ មានសារព័ត៌មានជាភាសាចិនមួយបានចេញផ្សាយព័ត៌មានតាមរយៈគេហទំព័រមួយ ដោយបានលើកឡើងពីបញ្ហានានាដែលកើតមាននៅខេត្តព្រះសីហនរួមមាន កត្តាផ្លូវច្បាប់ កត្តាធម្មជាតិ កត្តាហេដ្ឋារចនាសម្ព័ន្ធរូបវន្ត និងកត្តាសន្តិសុខសណ្តាប់ធ្នាប់ជាដើម។ នៅក្នុងនោះក៏មានការលើកឡើងពាក់ព័ន្ធនឹង សមត្ថកិច្ចពន្ធដារផងដែរ ថា “ពន្ធដារចុះទៅហៅចុះបញ្ជី ធ្វើប៉ាតង់ត្រូវបង់ ១ ៨០០ ដុល្លារ លើសពី ១៥ ថ្ងៃ ពិន័យ ៥០០ ដុល្លារ” ដោយមានរំលេចរូបភាពទីតាំងអាជីវកម្មមួយកន្លែងនៅខេត្តព្រះសីហនុ ដែលមិនបានចុះបញ្ជីពន្ធដារ ខណៈដែលមន្ត្រី នៃអគ្គនាយកដ្ឋានពន្ធដារ បាននិងកំពុងចុះប្រគល់លិខិតរំលឹក អញ្ជើញមកបំពេញភាតព្វកិច្ចចុះបញ្ជីពន្ធដារ ស្របតាមច្បាប់ស្តីពីសារពើពន្ធជាធរមាន។
ក្នុងន័យផ្តល់សេវាដោយភាពទន់ភ្លន់ និងម៉ឺងម៉ាត់ចំពោះការអនុវត្តបទប្បញ្ញត្តិស្តីពីពន្ធដារ នាព្រឹកថ្ងៃទី២៧ ខែធ្នូ ឆ្នាំ២០១៩ ក្រុមការងារជំរុញការចុះបញ្ជីពន្ធដារ នៃអគ្គនាយកដ្ឋានពន្ធដារ បានចុះជួបជាមួយម្ចាស់ដល់ទីតាំងអាជីវកម្ម ដើម្បីសាកសួរលម្អិតលើករណីនេះ ដោយម្ចាស់អាជីវកម្មបានបញ្ជាក់ជូនថា កម្រៃ ១ ៨០០ ដុល្លារ ដែលបានចុះផ្សាយនោះជាការទាមទាររបស់ភ្នាក់ងារឯកជនមួយក្នុងការធ្វើច្បាប់អាជីវកម្មឱ្យគាត់ មិនមែនជាការទាមទាររបស់មន្ត្រីពន្ធដារ ដូចការចោទប្រកាន់នោះទេ។ ដោយមានកិច្ចសហការល្អ និងភាពរាក់ទាក់ពីម្ចាស់អាជីវកម្មនេះ ក្រុមការងារជំរុញការចុះបញ្ជីពន្ធដារ នៃអគ្គនាយកដ្ឋានពន្ធដារ ក៏បានណែនាំអំពីនីតិវិធីចុះបញ្ជីពន្ធដារបន្ថែមទៀត និងបានផ្តល់សេវាចុះបញ្ជីពន្ធដារជូនម្ចាស់អាជីវកម្មនេះរួចរាល់ក្នុងពេលនោះផងដែរ។
អគ្គនាយកដ្ឋានពន្ធដារ សូមធ្វើការបដិសេធយ៉ាងដាច់អហង្ការ ចំពោះខ្លឹមសារនៃការចុះផ្សាយព័ត៌មានពាក់ព័ន្ធនឹងសមត្ថកិច្ចរបស់អគ្គនាយកដ្ឋានពន្ធដារដោយគ្មានមូលដ្ឋានច្បាស់លាស់ដែលថា “ ធ្វើប៉ាតង់ត្រូវបង់ ១ ៨០០ ដុល្លារ លើសពី១៥ ថ្ងៃ ពិន័យ ៥០០ ដុល្លារ ដែលអាចនាំឱ្យមានការភាន់ច្រឡំមកលើការបំពេញភារកិច្ចរបស់មន្ត្រី នៃអគ្គនាយកដ្ឋានពន្ធដារ។
ឆ្លៀតក្នុងឱកាសនេះ អគ្គនាយកដ្ឋានពន្ធដារ សូមធ្វើការអំពាវនាវដល់ម្ចាស់អាជីវកម្មទាំងអស់ចូលរួមសហការបំពេញកាតព្វកិច្ចចុះបញ្ជីពន្ធដារ ឱ្យបានទាន់ពេលវេលាតាមការណែនាំរបស់រដ្ឋបាលសារពើពន្ធ ក៏ដូចជាដើម្បីជៀសវាងទទួលរងនូវការពិន័យនិងទោសទណ្ឌនានាផងដែរ។ ប្រសិនបើមានភាពមិនប្រក្រតីណាមួយកើតឡើងពាក់ព័ន្ធនឹង សមត្ថកិច្ចរបស់អគ្គនាយកដ្ឋានពន្ធដារ៕ ដោយ៖កូឡាប
