បាត់ដំបង ៖ កម្លាំងនគរបាលស្រុកកំរៀងបានឃាត់ខ្លួនជនសង្ស័យម្នាក់ដែលកាប់សម្លាប់មនុស្សម្នាក់នៅខណ្ឌ៧មករា រួចរត់គេចបាត់ជាង២ឆ្នាំ នៅថ្ងៃទី១១ ខែមករា ឆ្នាំ២០១៨ វេលាម៉ោង១៧ នៅចំណុចភូមិដូង ឃុំបឹងរាំង ស្រុកកំរៀង ខេត្តបាត់ដំបង។
ការឃាត់ខ្លួនជនសង្ស័យម្នាក់នេះដោយអនុវត្តដីកាបង្គាប់ឲ្យចាប់ខ្លួនលេខ៤០៥ ដ.ច.ន.ចុះថ្ងៃទី២៩ ខែមិថុនា ឆ្នាំ២០១៧ ដោយចៅក្រមស៊ើបសួរ សាយ សារុន សាលាដំបូងរាជធានីភ្នំពេញឲ្យចាប់ខ្លួនឈ្មោះ ហេង បញ្ញា ភេទប្រុស អាយុ២៦ឆ្នាំ រស់នៅភូមិ៤ សង្កាត់មនោរម្យ ខណ្ឌ ៧មករា រាជធានីភ្នំពេញ ត្រូវចោទពីបទឃាតកម្ម ប្រព្រឹត្តនៅចំណុចផ្ទះលេខ១១ E3z ផ្លូវលេខ១៤០ ភូមិ៤ សង្កាត់មនោរម្យ ខណ្ឌ៧មករា រាជធានីភ្នំពេញ កាលពីថ្ងៃទី២៩ខែធ្នូ ឆ្នាំ២០១៦ បទល្មើសដែលមានបញ្ញតិ្តឲ្យផ្តន្ទាទោសតាមមាត្រា១៩៩នៃក្រមព្រហ្មទណ្ឌ។
ចៅក្រមស៊ើបសួរ សាយ សារុន បានបញ្ជាក់ថា ក្រោយពីបានប្រព្រឹត្តបទល្មើសរួចជនត្រូវចោទឈ្មោះហេង បញ្ញា បានគេចខ្លួន គេចវេះពីការទទួលខុសត្រូវពីអំពីរបស់ខ្លួនដែលបានបង្ក ដោយជននេះមានសវតារជាតិគ្រប់គ្រាន់។ ជនត្រូវចោទជាបទឧក្រិដ្ឋដែលមានកម្រិតទោសដាក់ពន្ធនាគារ និងប៉ះពាល់ដល់ផលប្រយោជន៍ធ្ងន់ធ្ងរដល់សង្គមជាតិ និងសណ្តាប់ធ្នាប់សាធារណៈ។ ចៅក្រម ក៏បានសម្រេចចេញដីកា បង្គាប់ឲ្យមន្ត្រីនគរបាលយុត្តិធម៌មានសមត្ថកិច្ចចាប់ខ្លួនជនសង្ស័យខាងលើ មកប្រគល់ជូនសាលាដំបូងរាជធានីភ្នំពេញ ដើម្បីចាត់ការតាមនីតិវិធី។
លោកវរសេនីយ៍ទោ គឹម ពន្លក អធិការស្រុកកំរៀងបានឲ្យដឹងថាជនសង្ស័យឈ្មោះ ហេង បញ្ញា ភេទប្រុស អាយុ២៦ឆ្នាំ ទីលំនៅបច្ចុប្បន្នផ្ទះលេខ52E2 ផ្លូវលេខ១៤៣ ភូមិ៤ សង្កាត់មនោរម្យ ខណ្ឌ ៧មករា រាជធានីភ្នំពេញ ក្រោយពីប្រើហិង្សា យកកាំបិតប៉័ងតោ កាប់ជាច្រើនកន្លែងទៅលើជនរងគ្រោះប្រព្រឹត្តនៅចំណុច ផ្ទះលេខ១១e3z ផ្លូវលេខ១៤០ ភូមិ៤ សង្កាត់មនោរម្យ ខណ្ឌ៧មករា រាជធានីភ្នំពេញ រួចរត់គេចខ្លួន មកស្រុកកំរៀង។
បច្ចុប្បន្នកម្លាំងជំនាញ បានបញ្ជូនជនសង្ស័យឲ្យទៅនគរបាលខរាជធានីភ្នំពេញ ដើម្បីចាត់ការបន្តតាមនិតិវិធី ៕ ដោយ៖បញ្ញាស័ក្តិ