ភ្នំពេញ៖ នៅព្រឹកថ្ងៃទី៣០ខែធ្នូនេះ សាលាឧទ្ធរណ៍ បានសម្រេចដំកល់សាលក្រមចាត់របៀបសាលាដំបូងរាជធានីភ្នំពេញ ដោយបង្គាប់ឱ្យស៊ើបអង្កេតបន្ថែមលើសំណុំរឿងអតីតអ្នកកាសែតវិទ្យុអាស៊ីសេរីទាំងពីរ គឺលោក អួន ឈិន និងលោក យាង សុធារិន ។ អ្នកទាំងពីរ ត្រូវបានតុលាការចោទប្រកាន់ពីបទល្មើស ពាក់ព័ន្ធនឹងច្បាប់ស្តីពីការប្រឆាំងការជួញដូរមនុស្ស តាមមាត្រា៣៨ និង ៣៩ ។
អង្គការ លីកាដូ នៅតែបន្តអំពាវនាវ ស្នើឱ្យមានការទម្លាក់ចោលបទចោទប្រកាន់ទាំងអស់ទៅលើអ្នកទាំងពីរ ។
សាលដីកាសាលាឧទ្ធរណ៍នាព្រឹកនេះ បានដំកល់សាលក្រមចាត់របៀបសាលាដំបូងរាជធានីភ្នំពេញមួយផ្នែក ដែលសាលក្រមនេះត្រូវបានសម្រេចកាលពីខែតុលា ដោយតុលាការបានបង្គាប់ឲ្យធ្វើការស៊ើបអង្កេតបន្ថែម លើបទចោទក្រោមមាត្រា ៣៨ និង ៣៩នៃច្បាប់ស្ដីពីការប្រឆាំងការជួញដូរមនុស្ស ។ សាលាឧទ្ធរណ៍ នឹងបើកសវនាការលើសំណុំរឿងដាច់ដោយឡែកមួយផ្សេងទៀត របស់អ្នកទាំងពីរ ពីបទ “ធ្វើឲ្យអន្តរាយការការពារជាតិ” យោងតាមមាត្រា ៤៤៥ នៃក្រមព្រហ្មទណ្ឌ នៅថ្ងៃទី ២០ ខែមករា ឆ្នាំ២០២០ ខាងមុខនេះ ។
ការស៊ើបអង្កេតឡើងវិញនេះ ត្រូវបានគេរាយការណ៍ថា រួមមានទាំងការធ្វើការពិនិត្យទៅលើឧបករណ៍ផ្ទុកទិន្នន័យកុំព្យូទ័រ (hard drives) ដែលត្រូវបានរក្សាទុកដោយតុលាការអស់រយៈពេលជាង ១៨ខែ ទៅហើយ ។ ហើយមិនមានការកំណត់ពេលវេលាច្បាស់លាស់ ថាតើការស៊ើបអង្កេតបន្ថែម នឹងត្រូវបញ្ចប់នៅពេលណានោះទេ ។ មិនទាន់មានការវិវឌ្ឍន៍ណាមួយគួរឲ្យកត់សម្គាល់នៅឡើយទេ ចាប់តាំងពីខែតុលា មក ហើយក៏គ្មានភស្តុតាងគួរឲ្យជឿជាក់បាន ត្រូវបានតុលាការយកមកបង្ហាញនៅឡើយ ។
អ្នកទាំងពីរ បានបដិសេធការចោទប្រកាន់ទាំងនេះ ហើយក្រុមអ្នកសិទ្ធិមនុស្សជាតិ និងអន្តរជាតិ ហើយនឹងអ្នកតស៊ូមតិផ្នែកសេរីភាពសារព័ត៌មាន បានអំពាវនាវម្តងហើយម្តងទៀត ដោយស្នើសុំឲ្យទម្លាក់បទចោទទាំងអស់លើអ្នកទាំងពីរ ។
លោក ឈិន និងលោក សុធារិន ត្រូវបានអាជ្ញាធរចាប់ខ្លួន កាលពីថ្ងៃទី១៤ ខែវិច្ឆិកា ឆ្នាំ២០១៧ ហើយអ្នកទាំងពីរ បានជាប់ឃុំខ្លួនបណ្ដោះអាសន្នរង់ចាំសវនាការអស់ជាង ៩ខែ មុនពេលត្រូវបានតុលាការដោះលែង ឱ្យនៅក្រៅឃុំបណ្ដោះអាសន្ន ។ អ្នកទាំងពីរ ធ្វើការជាអ្នកកាសែតឱ្យវិទ្យុអាស៊ីសេរី មុនពេលដែលស្ថាប័ននេះ បិទទ្វារការិយាល័យរបស់ខ្លូននៅភ្នំពេញ ដោយសារការធ្វើទុក្ខបុកម្នេញពីអាជ្ញាធររដ្ឋ ក្នុងការគាបសង្កត់សារព័ត៌មានឯករាជ្យមួយចំនួន ដែលរួមមានស្ថានីយវិទ្យុដែលផ្សាយបន្តពីវិទ្យុអាស៊ីសេរី ៕ដោយ៖កូឡាប