នាយករដ្ឋមន្រ្តីអ៊ីរាក់ លោក Adel Abdul Mahdi នៅថ្ងៃចន្ទម្សិលមិញនេះ បានធ្វើការថ្កោលទោសអាមេរិច ដែលបានធ្វើប្រតិបត្តិការវាយប្រហារ តាមដែលអាកាសទៅលើកងកម្លាំងឈ្លបអ៊ីរ៉ាក់ ដែលគាំទ្រដោយអ៊ីរ៉ង។ ការវាយប្រហារនោះ អាចនឹងធ្វើឲ្យអ៊ីរ៉ាក់ធ្លាក់ចូលកាន់តែជ្រៅ ទៅក្នុងជម្លោះរវាង អាមេរិច និងអ៊ីរ៉ង។
កាលពីថ្ងៃអាទិត្យកន្លងទៅនេះ កងកម្លាំងអាមេរិចបានបើកការវាយប្រហារ តាមដែនអាកាសប្រឆាំងនឹងក្រុម Kataib Hezbollah ដើម្បីឆ្លើយតបទៅនឹងការវាយប្រហារទៅលើមូលដ្ឋានយោធាអ៊ីរ៉ាក់ដែល បណ្តាលឲ្យស្លាប់អ្នកម៉ៅការអាមេរិចម្នាក់។
ក្នុងការវាយប្រហាររបស់អាមេរិច បណ្តាលឲ្យអ្នកប្រយុទ្ធនៃក្រុម Kataib Hezbollah ស្លាប់ចំនួន ២៥នាក់ និងរបួស ៥៥នាក់។ អាមេរិចចាត់ទុកក្រុម Kataib Hezbollah ដែលគាំទ្រដោយអ៊ីរ៉ង ថាជាក្រុមភេរវករ។
“លោកនាយករដ្ឋមន្រ្តីបានចាត់ទុកការវាយប្រហាររបស់អាមេរិច ទៅលើកងកម្លាំងរបស់អ៊ីរ៉ាក់ថា ជាការវាយប្រហារដែលមិនអាចទទួលយកបាន ហើយវានឹងមានផលវិបាកដ៏គ្រោះថ្នាក់”។ នេះបើតាមការបញ្ជាក់របស់ការិយាល័យនាយករដ្ឋមន្រ្តីអ៊ីរ៉ាក់។
សេចក្តីប្រកាសថ្លែងទៀតថា ការវាយប្រហារតាមដែនអាកាស នឹងបង្ខំឲ្យអ៊ីរ៉ាក់ពិចារណាលើការធ្វើកិច្ចការជាមួយកងកម្លាំងសម្ព័ន្ធអន្តរជាតិដឹកនាំដោយអាមេរិច ដើម្បីប្រឆាំងនឹងក្រុមរដ្ឋអ៊ីស្លាម។
ក្រសួងការបរទេសអ៊ីរ៉ាក់បាននិយាយថា ខ្លួននឹងធ្វើការកោះហៅឯកអគ្គរដ្ឋទូតអាមេរិចប្រឆាំងទីក្រុងបាដាដ ដើម្បីបញ្ជាក់ពីការមិនយល់ព្រមរបស់អ៊ីរ៉ាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia