បាត់ដំបង៖ ស្នងការដ្ឋាននគរបាលខេត្តបាត់ដំបង បានប្រកាសប្តេជ្ញា ត្រូវតែស្វែងរកការពិតក្នុងករណីនេះឲ្យឃើញ និងនាំខ្លួនជនដៃដល់ ដែលបានប្រព្រឹត្តិលើជនរងគ្រោះ យកមកផ្តន្ទា ទោសតាមផ្លូវច្បាប់ ខណៈពេលេដែលសមត្ថកិច្ចបានស្គាល់អត្តសញ្ញាណ នៃជនរងគ្រោះភេទស្រីនោះហើយ។
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបង សូមជម្រាបជូនសាធារណជន ដែលនិយមប្រើប្រាស់បណ្តាញព័ត៌មានសង្គមជ្រាបថា តាមរយៈការជូនដំណឹង និងតាមគ្រប់មធ្យោបាយ របស់សមត្ថកិច្ចនគរបាលនៃ ស្នងការដ្ឋាននគរបាលខេត្តបាត់ដំបង កាលពីថ្ងៃទី៣០ ខែ ធ្នូ ឆ្នាំ ២០១៩ ម្សិលមិញ ដើម្បីស្វែងរកអត្តសញ្ញាណ នៃជនរងគ្រោះភេទស្រី ដែលប្រជាពលរដ្ឋបានប្រទះឃើញដេកស្លាប់ ក្នុងសភាពអាក្រាតកាយ ស្ថិតនៅចំណុចវាលស្រែ ស្ថិតក្នុងភូមិ ចំការសំរោង២ សង្កាត់ចំការសំរោង ក្រុងបាត់ដំបង ខេត្តបាត់ដំបង នោះរហូតមកដល់ពេលនេះ ថ្ងៃទី៣១ ខែធ្នូ ឆ្នាំ២០១៩ សមត្ថកិច្ចបានរកឃើញអត្តសញ្ញាណហើយ ដែលសាកសពនោះមានឈ្មោះ ហង្ស ហ៊ន ភេទស្រី អាយុ ៣៩ ឆ្នាំ មានទីលំនៅភូមិរកា ឃុំរកា ស្រុកសង្កែ ខេត្តបាត់ដំបង ។ នៅពេលនេះ សមត្ថកិច្ចនគរបាលបានធ្វើការប្រគល់ សាកសពជូនទៅក្រុមគ្រួសារ ដើម្បីចាត់ចែងធ្វើបុណ្យតាមប្រពៃណីហើយ ។
ជាមួយនេះ ស្នងការនៃស្នងការដ្ឋាននគរបាលខេត្តបាត់ដំបង សូមថ្លែងអំណរគុណចំពោះការចូលរួមផ្តល់ព័ត៌មាន ពីប្រជាពលរដ្ឋនៅគ្រប់មជ្ឈដ្ឋាន ពិសេសការតាមដាននិងជួយផ្សព្វផ្សាយបន្ត តាមរយៈបណ្តាញព័ត៌មានសង្គម ហើយសម ត្ថកិច្ចនគរបាល នៅតែបន្តស្នើសុំការចូលរួមសហការបន្ថែមទៀត នូវរាល់ព័ត៌មានទាំងឡាយ ដែលទាក់ទងជាមួយនឹងករណីនេះ ហើយសូមធ្វើការធានាជូនថា រាល់ព័ត៌មានទាំងនោះ គឺជាការសម្ងាត់ និងសូមធ្វើការធានាសុវត្ថិភាពផ្ទាល់របស់អ្នកផ្តល់ព័ត៌មាន ក្នុងករណីនេះ ។
ម៉្យាងវិញទៀត ក្នុងនាមស្នងការនៃស្នងការដ្ឋាននគរបាលខេត្តបាត់ដំបង សូមចូលរួមរំលែកទុក្ខចំ ពោះក្រុមគ្រួសារសព និងសូមប្តេជ្ញាជាឱឡារិកថា ត្រូវតែស្វែងរកការពិតក្នុងករណីនេះឲ្យឃើញ និងនាំខ្លួនជនដៃដល់ ដែលបានប្រព្រឹត្តិលើជនរងគ្រោះខាងលើ យកមកផ្តន្ទាទោសតាមផ្លូវច្បាប់៕ដោយ៖កូឡាប