ក្រុមហ៊ុនបច្ចេកវិទ្យាយក្សរបស់ចិន Huawei បានធ្វើការប៉ាន់ប្រមាណថា ប្រាក់ចំណូលរបស់ខ្លួននឹងកើនដល់ ១២២ពាន់លានដុល្លារក្នុងឆ្នាំ ២០១៩នេះ ដែលមានការកើនឡើងចំនួន ១៨ភាគរយបើធៀបទៅនឹងឆ្នាំមុន។
ប្រធានប្តូរវេនរបស់ក្រុមហ៊ុន លោក Eric Xu បាននិយាយថា ក្រុមហ៊ុន Huawei រឹងមាំខ្លាំងក្នុងឆ្នាំ ២០១៩នេះ ប៉ុន្តែលោកក៏លើកឡើងថា នៅឆ្នាំក្រោយប្រាកដជាជួបបញ្ហាលំបាក ដោយសារតែកំពុងប្រឈមនឹងយុទ្ធនាការប្រឆាំងរបស់អាមេរិច។
Huawei ក៏លក់ទូរស័ព្ទបានចំនួន ២៤០លានគ្រឿងផងដែរឆ្នាំនេះ ដែលមានការកើនឡើងចំនួន ១៧ភាគរយៈធៀបទៅនឹងឆ្នាំ ២០១៨។
លោកថ្លែងថា “តួលេខទាំងនេះ ទាបជាងការប៉ាន់ប្រមាណរបស់យើង ទោះយ៉ាងណាជំនួញនៅតែរឹងមាំ ហើយពួកយើងឈរយ៉ាងមាំប្រឈមនឹងគ្រោះកាច”។
លោក Eric Xu បានទទួលស្គាល់ថា ក្រុមហ៊ុនបានប្រឈមនឹងបញ្ហាជាច្រើន ដូចជាបញ្ហាសេដ្ឋកិច្ចសកល និងសម្ពាធពីសហរដ្ឋអាមេរិច ដែលបានលើកឡើងថា ក្រុមហ៊ុនធ្វើឲ្យមានការគំរាមកំហែងសន្តិសុខជាតិអាមេរិច។
សម្ពាធទាំងនោះ បានបំផ្លាញទំនាក់ទំនងរបស់ Huawei ជាមួយនឹងដៃគូរបស់ខ្លួនជាច្រើន មានដូចជា Google និងក្រុមហ៊ុនជាច្រើនទៀតដែលលក់ទូរស័ព្ទរបស់ខ្លួន។
បើតាមការស្រាវជ្រាវឯករាជ្យបានឲ្យដឹងថា ការលក់របស់ Huawei នៅខាងក្រៅទីផ្សារចិនបានជួបបញ្ហាយ៉ាងខ្លាំង ដោយសារតែឧបករណ៍របស់ Huawei មិនអាចប្រើប្រាស់កម្មវិធីសំខាន់ៗរបស់ Google បាន។
លោក Eric Xu បានលើកឡើងថា សម្រាប់ឆ្នាំ ២០២០ ក្រុមហ៊ុននឹងមិនអាចរីកចម្រើនលឿនបានដូចក្នុងឆ្នាំ ២០១៩ឡើយ ហើយវានឹងក្លាយទៅជាឆ្នាំដ៏ពិបាកសម្រាប់ពួកយើង៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN