ភ្នំពេញ ៖ អាជ្ញាធរខណ្ឌទួលគោកបានសហការជាមួយអង្គភាពលូទឹកបូមទឹកមន្ទីរសាធារណការនិងដឹកជញ្ជូនរាជធានីភ្នំពេញកំពុងបន្តសកម្មភាពស្តារប្រពន្ធ័លូយ៉ាងសកម្មក្រោយពីទទួលបានការណែនាំពីលោក ឃួង ស្រេង អភិបាលរាជធានីភ្នំពេញទៅលើការប្រកាសបើកយុទ្ធនាការស្តារប្រពន្ធ័លូក្នុងរាជធានីភ្នំពេញដែលមានប្រវែង៤៦០គីឡូម៉ែត្រដោយចាប់ផ្តើមពីខណ្ឌនៅកណ្តាលក្រុងចំនួន៤មុនគេគឺ៖ខណ្ឌទទួលគោក,ស្របពេលដែលខណ្ឌ៣ផ្សេងទៀតនៅកណ្តាលក្រុងនៅមិនទាន់ចាប់ផ្ដើមនៅឡើយ មាន ខណ្ឌដូនពេញ,ខណ្ឌចំការមមន និងខណ្ឌ៧មករា ។
លោកសាំ ពិសិដ្ឋ មន្ទីរសាធារណការនិងដឹកជញ្ជូនរាជធានីភ្នំពេញ បានឱ្យដឹងថា៖យុទ្ធនាការស្តារប្រពន្ធ័លូនេះ នឹងត្រូវចំណាយពេលប្រមាណ៧ខែដោយគិតចាប់ពីថ្ងៃទី៩មករា ឆ្នាំ២០១៨នេះតទៅដោយធ្វើឲ្យបានរួចរាល់នៅមុនរដូវភ្លៀងមកដល់ដែលជាការប្តេជ្ញាចិត្តរបស់រដ្ឋបាលរាជធានីភ្នំពេញក្នុងគោលដៅធ្វើឲ្យប្រសើរឡើងនិងការកាត់បន្ថយការជន់លិចដោយសារជំនន់ទឹកភ្លៀងនៅរដូវវស្សាក្នុងភូមិសាស្ត្ររាជធានីភ្នំពេញ។
ក្នុងយុទ្ធនាការថ្ងៃទី១០មករានេះលោកចាន់ បណ្ឌិត អភិបាលរងខណ្ឌទួលគោកបានឲ្យដឹងថា៖ពេលនេះអាជ្ញាធរខណ្ឌទួលគោកសហការជាមួយមន្ទីរសាធារណៈការ និងដឹកជញ្ជូនរាជធានីភ្នំពេញកំពុងដំណើរការស្តារប្រពន្ធ័លូនៅផ្លូវចំនួន៤ខ្សែមានផ្លូវលេខ៣១៧,ផ្លូវលេខ៦០៨,ផ្លូវលេខ២៦១,និងផ្លូវលេខ២៦៥ និងបន្តពីផ្លូវលេខ៣១៥,ផ្លូវកម្ពុជាក្រោម និងកំណាត់ផ្លូវសហពន្ធ័រុស្ស៊ីដែលបានស្តាររួចកាលពីថ្ងៃទី៩មករា។លោក បន្តថា៖ខណ្ឌទួលគោកមានប្រពន្ធ័លូជាង២២គីឡូម៉ែត្រដែលត្រូវស្តារឡើងវិញឲ្យទឹកហូរបានលឿន ហើយផ្លូវលេខ៣១៥,៦០៨,២៦១ និងផ្លូវលេខ២៦៥ ជាផ្លូវដែលមានការលិចលង់ខ្លាំងជាងគេនៅពេលមានភ្លៀងធ្លាក់ខ្លាំងម្តងៗ។
លោកអភិបាលរងខណ្ឌបន្តថា៖ការស្តារប្រពន្ធ័លូនេះដែរត្រូវបានលោកអភិបាលរាជធានីភ្នំពេញបានកំណត់បែងចែកការទទួលខុសត្រូវច្បាស់លាស់គឺ៖ប្រពន្ធ័លូមេ ទទួលការស្តារដោយមន្ទីរសាធារណៈការ និងដឹកជញ្ជូនរាជធានីភ្នំពេញ។ចំណែកប្រពន្ធ័លូរងតូចៗតាមខណ្ឌ សង្កាត់គឺអាជ្ញាធរខណ្ឌជាអ្នកទទួលស្តារដើម្បីកុំឲ្យមានការឆ្លើយដាក់គ្នា និងគ្មានភាពម្ចាស់ការ៕ ដោយ៖កូឡាប