ភ្នំពេញ៖ មុខសញ្ញាប្រើប្រាស់អាវុធខុសច្បាប់ និងចែកចាយគ្រឿងញៀនដ៏សកម្មចំនួន៣នាក់ ត្រូវបានកម្លាំងមូលដ្ឋានអាវុធហត្ថខណ្ឌពោធិ៍សែនជ័យបង្ក្រាបបាន។
ហេតុការណ៍នេះបានកើតឡើងកាលពីវេលាម៉ោង 14និង10នាទី ថ្ងៃទី30 ខែធ្នូ ឆ្នាំ2019 នៅចំណុចបន្ទប់ជួលេខ19 ស្ថិតក្នុងភូមិត្រពាំងថ្លឹង3 សង្កាត់ចោមចៅ1 ខណ្ឌពោធិ៍សែនជ័យ ដោយដកហូតវត្ថុតាង អាវុធខ្លីមួយដើមម៉ាក BERETTA លេខគ្មាន(ឈូសចោល) គ្រាប់ចំនួន34គ្រាប់ បង់01, ក្រាមសថ្លាចំនួន09កញ្ចប់ (ធំ2 តូច7), កាំបិតចំនួន02ដើម, អាយកូមចំនួន01 ព្រមទាំងសម្ភារៈសម្រាប់សេពគ្រឿងញៀនមួយចំនួនទៀត។
មុននឹងឈានដល់ការឃាត់ខ្លួនជនសង្ស័យខាងលើ កម្លាំងមូលដ្ឋានអាវុធហត្ថខណ្ឌពោធិ៍សែនជ័យ បានធ្វើការស្រាវជ្រាវ និងល្បាតពួនស្ទាក់អស់រយៈពេលជាច្រើនថ្ងៃ រហូតឃាត់ខ្លួនបានជនសង្ស័យទាំង៣នាក់ មានឈ្មោះដូចជា ៖ ទី១ ឈ្មោះ សាត ស៊ីណន ហៅអ៊ុំ (ជាម្ចាស់បន្ទប់) ភេទប្រុស អាយុ42ឆ្នាំ,ទី២ ឈ្មោះ ផេង សេកុង ហៅ ហៃ ភេទប្រុស អាយុ41ឆ្នាំ, ទី៣ ឈ្មោះ ទូច ពៅ ភេទស្រី អាយុ21ឆ្នាំ។
បន្ទាប់ពីសាកសួរជនសង្ស័យទាំង៣នាក់ បានសារភាពថា ពួកគេទាំង៣នាក់ ពិតជាបានចែកចាយគ្រឿងញៀន និងបានប្រើប្រាស់អាវុធដោយខុសច្បាប់ពិតប្រាកដមែន។
បច្ចុប្បន្នជនសង្ស័យទាំង៣នាក់ ត្រូវបានបញ្ជូនមកការិយាល័យស្រាវជ្រាវបទល្មើសគ្រឿងញៀន នៃកងរាជអាវុធហត្ថរាជធានីភ្នំពេញ ដើម្បីធ្វើការសាកសួរ និងកសាងសំណុំរឿង បញ្ជូនទៅតុលាការផ្តន្ទាទោសតាមនីតិវិធីច្បាប់ ៕ដោយ៖កូឡាប
