ភ្នំពេញ៖ ជនសង្ស័យ២នាក់ ដោយម្នាក់មានតួនាទីជាយោធាកងពលតូចលេខ៧០ ពាក់ព័ន្ធករណីបើករថយន្តបុកសិស្សសាលាបណ្តាលឲ្យស្លាប់២នាក់ នៅកន្លែងកើតហេតុកាលពីពេលកន្លងទៅ ត្រូវបានកម្លាំងនគរបាលការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ បញ្ជូនទៅអយ្យការអមសាលាដំបូងរាជធានីភ្នំពេញ ដើម្បីផ្តន្ទាទោសតាមផ្លូវច្បាប់ នៅរសៀលថ្ងៃទី១ ខែមករា ឆ្នាំ២០២០នេះ។
លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកំរិតស្រាល រាជធានីភ្នំពេញ បានឲ្យដឹងថា នៅថ្ងៃទី៣១ ខែធ្នូ ឆ្នាំ២០១៩ វេលាម៉ោងប្រហែល០៧និង២០នាទី កម្លាំងជំនាញរបស់ការិយាល័យ សហការការិយាល័យចរាចរ និងអធិការខណ្ឌជ្រោយចង្វា ស្រាវជ្រាវឈានទៅដល់ឃាត់ខ្លួនជនសង្ស័យចំនួន២នាក់ នៅចំណុចក្នុងភោជនីយដ្ឋានមិនចាំយីហោ ផ្លូវជាតិលេខ៣ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ពាក់ព័ន្ធប្រព្រឹត្តបទល្មើស បង្កឲ្យស្លាប់ដោយអចេតនា(បើកបរធ្វេសប្រហែសបណ្តាលឲ្យស្លាប់អ្នកដទៃ និងរត់គេចពីកន្លែងកើតហេតុដោយមិនទទួលខុសត្រូវ) ប្រព្រឹត្តនៅចំណុចផ្លូវបេតុង ក្រុម២៧ ភូមិរនះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ កាលពីថ្ងៃទី១១ ខែធ្នូ ឆ្នាំ២០១៩ វេលាម៉ោងប្រហែល១៩និង១០នាទី។
លោកនាយការិយាល័យបន្តថា ជនសង្ស័យទី១-ឈ្មោះ ឌុល សារិទ្ធ ហៅសូត ភេទប្រុស អាយុ៣៧ឆ្នាំ ជនជាតិខ្មែរ មុខរបរយោធាកងពលតូចលេខ៧០ ស្នាក់នៅផ្ទះលេខ២៧១ ផ្លូវវេងស្រេង ភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ (ជាអ្នកបើកបររថយន្ត) ទី២-ឈ្មោះ ហេង សុខនូវ ភេទប្រុស អាយុ៥៧ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះលេខ១៩៧ ផ្លូវលេខC បុរីពីភពថ្មី សង្កាត់គោករកា ខណ្ឌព្រែកព្នៅ រាជធានីភ្នំពេញ (ជាម្ចាស់រថយន្ត)។
វត្ថុតាងចាប់យកៈ រថយន្តមួយគ្រឿងម៉ាក តូយ៉ូតាហាយឡិនឌ័រ ពណ៌ទឹកមាស លេខតួ ៦២០០៦៦២៤៧ លេខម៉ាស៊ីន ៤៥៥៨៨៧០ ពាក់ផ្លាកលេខ ភ្នំពេញ ២AG-៧៩៤២។
ជនរងគ្រោះ១-ឈ្មោះ ខេន កូវ៉ា ភេទស្រី អាយុ១៣ឆ្នាំ ជនជាតិ ខ្មរ មុខរបរសិស្ស (ស្លាប់)មានទីលំនៅស្នាក់នៅភូមិកោះដាច់ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ។ ២-ឈ្មោះ ភ័ណ្ឌ ភីរ៉ាដា ភេទស្រី អាយុ១១ឆ្នាំ ជនជាតិខ្មែរ មុខរបរសិស្ស (ស្លាប់)មានទីលំនៅ ស្នាក់នៅផ្ទះលេខ២៤៩ ផ្លូវបេតុង ក្រុម១៣ ភូមិរនះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ ៕ដោយ៖បញ្ញាស័ក្តិ
