កណ្តាល៖ នគរបាលស្រុកស្អាង បានចាប់ខ្លួនបុរសម្នាក់ករណីរំលោភលេីទំនុកចិត្ត លួចប្រមូលលុយរបស់អតិថិជន នៃសាខាគ្រឹះស្ថានមាគាហ្វាយនែន(ស្អាង)។ ជនសង្ស័យបានសារភាពថាខ្លួនពិតជាបានប្រមូលលុយពីអតិថិជនដែលបង់តាមរយៈខ្លួនប្រហែល១២លានរៀលជាងពិតប្រាកដមែន ហេីយលុយនោះខ្លួនបានយកទៅផឹកសុីនិងចូលខារ៉ាអូខេអស់ហើយ។
ករណីខាងលើ កើតហេតុនៅថ្ងៃទី២៥ខែធ្នូ ឆ្នាំ២០១៩វេលាម៉ោង១៦និង១៥នាទី នៅចំណុចគ្រឹះស្ថានមាគាហ្វាយនែន(ម.ក)ភូមិព្រែកតាឡៃ ឃុំព្រែកអំបិល ស្រុកស្អាងខេត្តកណ្តាល។
ជនរងគ្រោះ ឈ្មោះគង់ សុភា ភេទប្រុសអាយុ២៨ឆ្នាំជនជាតិខ្មែរមុខរបរ នាយកសាខាគ្រឹះស្ថានមាគាហ្វាយនែន(ស្អាង) ទីលំនៅភូមិព្រែក្រាញ់ ឃុំព្រែកអំបិល ស្រុកស្អាង ខេត្តកណ្តាល។
ចំណែកជនសង្ស័យ ឈ្មោះធន់ ឧត្តមបញ្ញាសិដ្ឋ ភេទប្រុសអាយុ២៥ឆ្នាំជនជាតិខ្មែរ មុខរបរមន្ត្រីឥណទានមានស្រុកកំណេីតភូមិព្រែកយួនឃុំកៀនជ្រែ ស្រុកកំពង់សៀម ខេត្តកំពង់ចាម បច្ចុប្បន្នស្នាក់នៅភូមិ-ឃុំកើតហេតុ (ឃាត់ខ្លួន)។វត្ថុតាងចាប់យក៖ សោលេខ៨mm.ចំនួន០២ដើម ដងតួនឺវីសផ្សារ ជាប់ប្រដាប់ដោះក្បាលប៊ូសុីចំនួន០១ សោតេ(ប្រដាប់កាច់កម៉ូតូ)ចំនួន០២ សោម៉ូតូចំនួន០៣គ្រាប់ កូនកាំបិតសម្រាប់ចិតបន្លែចំនួន០១ កាបូបដៃពណ៌ខ្មៅចំនួន០១កាតគ្រីម៉ូតូចំនួន០១ កាតអេធីអ៊ឹមចំនួន០១ កាតាបស្ពាយពណ៌ខ្មៅចំនួន០១។
នគរបាលមូលដ្ឋានរៀបរាប់ពីសភាពរឿងហេតុនេះថា នៅថ្ងៃទីខែឆ្នាំវេលា ម៉ោងកើតហេតុជនសង្ស័យបានសុំច្បាប់ទៅមេីលយាយឈឺនៅឯខេត្តកំពង់ចាមចំនួន១ល្ងាច។ លុះថ្ងៃទី២៦ ធ្នូ ២០១៩ មិនឃេីញឈ្មោះខាងលេី មកធ្វេីការទេ រហូតដល់ម៉ោង៩និង១០នាទីស្រាប់តែមានអតិថិជននៅស្រុកកោះធំបានតេទូរស័ព្ទមកជនរងគ្រោះ ថាថ្ងៃណាបានចេញលុយឲ្យអថិតិជន ពេលនោះជនរងគ្រោះ បានឲ្យអ្នក គ្រប់គ្រងផ្នែកគណនេយ្យចូលឆែកមេីលអតិថិជនថា តេីអតិថិជនបានបង់លុយឬនៅ ពេលត្រួតពិនិត្យគណនេយ្យរួច ទេីបដឹងថាអតិថិជនមិនទាន់បង់លុយផ្តាច់ ពេលនោះជនរងគ្រោះបានចាត់តំណាងឈ្មោះឃឹម ជាតិនិងឈ្មោះយូរ វាសនា ទៅសួរអតិថិជននៅផ្ទះផ្ទាល់ ទេីបដឹងថាអតិថិជនពិតជាបានបង់លុយផ្តាច់អស់ហេីយដោយផ្ញេីលុយតាមរយៈជនសង្ស័យសរុបប្រហែល១២លានរៀល។ ចាប់តាំងពីពេលនោះមកឈ្មោះធន់ ឧត្តមបញ្ញាសិដ្ឋ មិនមកធ្វេីការទេ បានបិទទូរសព្ទ័ចោលទាំងអស់។ លុះដល់ថ្ងៃទី ៣០ ធ្នូ ២០១៩វេលាម៉ោង១៨និង១៥នាទីឈ្មោះ ឃឹម ជាតិ និងឈ្មោះ យូរ វានា បានចុះទៅត្រួតពិនិត្យអតិថិជន ក៏បានជួបជនសង្ស័យកំពុងដេីរប្រមូលលុយពីអតិថិជនទៀត។ ពេលនោះឈ្មោះយូរ វាសនា បានទូរស័ព្ទ ទៅប្រាប់សមត្ថកិច្ចប៉ុស្តិ៍នគរបាលកំពង់កុង នាំជនសង្ស័យមកធ្វេីការសាកសួរ។
នៅចំពោះមុខសមត្ថកិច្ចជនសង្ស័យបានសារភាពថាខ្លួនពិតជាបានប្រមូលលុយពីអតិថិជនដែលបង់តាមរយៈខ្លួនប្រហែល១២លានរៀលជាងពិតប្រាកដមែន ហេីយលុយនោះខ្លួនបានយកទៅផឹកសុីនិងចូលខារ៉ាអូខេអស់ហើយ។
ករណីនេះ បានបញ្ជូនជនសង្ស័យមកអធិការដ្ឋាននគរបាលស្រុកស្អាងដើម្បីចាត់ការបន្តតាមនីតិវិធី៕ ដោយ៖កូឡាប
