មេដឹកនាំកូរ៉េខាងជើង គីម ជុងអ៊ុន បាននិយាយថា ការពន្យារពេលការបាញ់សាកល្បងនុយក្លេអ៊ែរ និងមីស៊ីលរយៈចំងាយឆ្ងាយ ដែលបានអនុវត្តក្នុងកំឡុងកិច្ចចរចាជាមួយអាមេរិច បានមកដល់ទីបញ្ចប់ហើយ។ មេដឹកនាំផ្តាច់ការវ័យក្មេងរូបនេះ ព្រមានបន្តធ្វើការបាញ់សាកល្បងនុយក្លេអ៊ែរសារជាថ្មី។
លោកគីម ជុងអ៊ុននិយាយថា ប្រទេសរបស់លោកនឹងធ្វើការបង្ហាញអាវុធយុទ្ធសាស្រ្តប្រភេទថ្មីក្នុងពេលឆាប់ៗនេះ។
ទោះយ៉ាងណា លោកថ្លែងថា ទ្វារចរចានៅតែបើកចំហរ ហើយទំហំនៃការធ្វើតេស្តសាកល្បង គឺផ្អែកទោលើឥរិយាបទរបស់អាមេរិច។
កម្លាំងចលករក្នុងរយៈពេលប៉ុន្មានឆ្នាំចុងក្រោយនេះ ក្នុងការធ្វើឲ្យកូរ៉េខាងជើងបោះបង់នុយក្លេអ៊ែរចោល បានជាប់គាំង ខណៈដែលអាមេរិចមិនព្រមដកទណ្ឌកម្មចេញ ទាល់តែទីក្រុងព្យុងយ៉ាងបោះបង់ចោលកម្មវិធីនុយក្លេអ៊ែរចោលទាំងស្រុង។
កូរ៉េខាងជើង បានធ្វើការបាញ់សាកល្បងអាវុធខ្នាតតូចជាច្រើនលើកកាលពីចុងឆ្នាំ ២០១៩ ដែលការបាញ់សាកល្បងនោះត្រូវបានគេមើលឃើញថា ជាចេតនាក្នុងការដាក់សម្ពាធអាមេរិចឲ្យធ្វើសម្បទានដល់ខ្លួន។
ប៉ុន្តែ ការប្រកាសផ្អាកបាញ់សាកល្បងនុយក្លេអ៊ែរ និងមីស៊ីលអន្តរទ្វីបដែលអាចបាញ់ដល់ទឹកដីអាមេរិច បានក្លាយទៅជាមូលដ្ឋានមួយនៃការចរចាជាមួយនឹងអាមេរិច។
ចាប់តាំងពីឆ្នាំ ២០១៧មក របបព្យុងយ៉ាងមិនដែលបានធ្វើការបាញ់សាកល្បងនុយក្លេអ៊ែរ ឬមីស៊ីលឆ្លងទ្វីបឡើយ។
ការប្រកាសរបស់មេដឹកនាំកូរ៉េខាងជើង កើតឡើងនៅថ្ងៃចុងក្រោយ នៃការប្រជុំថ្នាក់ដឹកនាំក្នុងទីក្រុងព្យុងយ៉ាង ដែលវាគឺជាព្រឹត្តិការណ៍មិនធម្មតាប្រចាំឆ្នាំ។
នៅថ្ងៃទី ១ខែមករានេះ ប្រព័ន្ធផ្សព្វផ្សាយរដ្ឋបានផ្សាយថា កូរ៉េខាងជើងមិនមានបំណងបន្តអនុវត្តការផ្អាកបាញ់សាកល្បងនោះទៀតឡើយ ខណៈដែលអាមេរិចបន្តធ្វើសមយុទ្ធរួមគ្នាជាមួយនឹងកូរ៉េខាងជើង និងបន្តដាក់ទណ្ឌកម្ម។
“ក្នុងល័ក្ខខ័ណ្ឌនេះ វាគ្មានមូលដ្ឋានសម្រាប់ពួកយើងក្នុងការតាំងចិត្តតែម្នាក់ឯង ដើម្បីអនុវត្តការប្តេជ្ញាចិត្តនោះឡើយ”។
គីម ជុងអ៊ុន បានព្រមានថា “ពិភពលោកនឹងឃើញអាវុធយុទ្ធសាស្រ្តថ្មីរបស់កូរ៉េខាងជើងក្នុងពេលអនាគតដ៏ខ្លីខាងមុខ”។ ទោះយ៉ាងណា លោកមិនបានប្រាប់លំអិតពីអាវុធនោះឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC