ខេត្តព្រះសីហនុ ៖ ថ្នាក់ដឹកនាំ មន្ទីររៀបចំដែនដីនគរូបនីយកម្ម សំណង់ និងសុរិយោដី ខេត្តព្រះសីហនុ បានធ្វើសន្និបាតបូកសរុបលទ្ធផលការងារឆ្នាំ២០១៧ និងទិសដៅការងារឆ្នាំ២០១៨ដើម្បីត្រួតពិនិត្យ និងវាយតម្លៃលទ្ធផលការងារសម្រាប់អនុវត្តបន្តនាថ្ងៃខាងមុខឲ្យកាន់តែប្រសើរឡើងថែមទៀត។
សន្និបាតនេះ មានរយៈ ១ថ្ងៃ នៅសាលប្រជុំធំ សាលាខេត្តព្រះសីហនុ កាលពីថ្ងៃទី១១ ខែមករា ឆ្នាំ២០១៨ ដោយមាន លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ព្រមទាំងថ្នាក់ដឹកនាំ នៃរដ្ឋបាលខេត្តព្រះសីហនុ និងមន្ទីពាក់ព័ន្ធមួយចំនួនទៀតចូលរួម។
នាឱកាសនោះដែរ លោក នួន ប៉ុក ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី មន្ទីររៀបចំដែនដី បានអនុវត្តទទួលបានជោគជ័យ ក្នុង រយៈពេល ពេញ ១ឆ្នាំពេញកន្លងទៅ ដោយមានកិច្ចសហប្រតិបត្តិការ ជាមួយមន្ទីរអង្គភាពពាក់ព័ន្ធនានា នៃរដ្ឋបាលខេត្តព្រះសីហនុ ស្របតាមគោលនយោបាយ របស់រាជរដ្ឋាភិបាលកម្ពុជា។
នៅចំពោះមុខថ្នាក់ដឹកនាំ និងមន្ត្រីរាជការ ក្រោមឱវាទ រដ្ឋបាលខេត្តព្រះសីហនុ លោក នួន ប៉ុក ថ្លែងទាំងមោទនភាពថា តាមការចង្អុលបង្ហាញ របស់ ថ្នាក់ដឹកនាំ ក្រសួងរៀបចំដែនដី នគរូបនីយកម្ម និងសំណង់ និងពីថ្នាក់ដឹកនាំ នៃគណៈអភិបាលខេត្តព្រះសីហនុ បានជម្រុញឲ្យមន្ត្រីគ្រប់គ្រប់ផ្នែក និងគ្រប់ជំនាញ របស់មន្ទីររៀបចំដែនដី បានខិតខំបំពេញការងារ កាលពីឆ្នាំ២០១៧កន្លងទៅ ទទួលបានលទ្ធផលវិជ្ជមាន គួរជាទីមោទន។
ព្រមគ្នានេះ លោក នួន ប៉ុក ក៏បានកោតសរសើរចំពោះមន្ត្រីរាជការក្រោមឱវាទ គ្រប់ផ្នែក និងគ្រប់ថ្នាក់ នៃមន្ទីររៀបចំដែនដី ខេត្តព្រះសីហនុ ដែលបានខិតខំបំពេញភារកិច្ច ទាក់ទងវិស័យដីធ្លី ឬការងារសុរិយោដី និងវិស័យសំណង់ជាដើម គឺបំពេញការងារបំរើជូនប្រជាពលរដ្ឋ នៅទូទាំងខេត្តព្រះសីហនុបានល្អ និងមានការទទួលខុសត្រូវខ្ពស់ក្នុងភារកិច្ចរៀងៗខ្លួន។
ក្នុងសន្និបាតនោះដែរ លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ក៏បានកោតសរសើរ និងវាយតម្លៃខ្ពស់ ចំពោះសមិទ្ធផលទាំងឡាយ ដែលមន្ត្រីគ្រប់ផ្នែក នៃមន្ទីររៀបចំដែនដី ខេត្តព្រះសីហនុ បានបំពេញភារកិច្ចផ្តល់ជូនប្រជាពលរដ្ឋទាំងការងារសំណង់ និងការងារសូរិយោដី។ លោកថា ពិសេសជាងនេះ គឺការងារផ្ដល់ប័ណ្ណសំគាល់ម្ចាស់អចលនវត្ថុ តាមលក្ខណៈជាប្រព័ន្ធ ដែលជាគោលនយោបាយ ដ៏សំខាន់ របស់រាជរដ្ឋាភិបាលកម្ពុជា ក្នុងការងារគ្រប់គ្រង និងប្រើប្រាស់ដីធ្លី ដើម្បីអភិវឌ្ឍសង្គមជាតិ និងកាត់បន្ថយជម្លោះដណ្ដើមដីធ្លី ដែលធ្លាប់កើតមាននៅកម្ពុជានាពេលកន្លងទៅ។
ទន្ទឹមគ្នានេះ លោក ប៉ែន សុផល ក៏បានរំលឹកដល់ មន្ត្រីគ្រប់ជាន់ថ្នាក់ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ ឲ្យបន្តយកចិត្តទុកដាក់អនុវត្តវិធានការនានា ឲ្យស្របតាមទិសដៅការងារឆ្នាំ២០១៧កន្លងទៅ ដើម្បីលើកកម្ពស់ឲ្យការងារគ្រប់គ្រងផ្នែកសំណង់ និងការងារគ្រប់គ្រងដីធ្លី អាចប្រព្រឹត្តិទៅស្របតាមគតិច្បាប់ និងទទួលបានលទ្ធផលការងារបានកាន់តែល្អនាបណ្តាឆ្នាំខាងមុខថែមទៀត។
ចំណែក លោក យន្ត មីន អភិបាល នៃគណៈអភិបាលខេត្តព្រះសីហនុ ដែលបានអញ្ជើញជាអធិបតី បិទសន្និបាតបូកសរុបការងារឆ្នាំ២០១៧ និងលើកទិសដៅភារកិច្ចឆ្នាំ២០១៨ របស់មន្ទីររៀបចំដែនដី កាលពីរសៀលថ្ងៃទី១១ ខែមករា ឆ្នាំ២០១៨។ លោកបាន កោតសរសើរ ចំពោះលទ្ធផលការងារ ដែលមន្ត្រីថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះសីហនុ ព្រមទាំងប្រជាពលរដ្ឋ មូលដ្ឋាននេះបានរួមគ្នាអនុវត្ត នូវកម្មវិធីនយោបាយ របស់រាជរដ្ឋាភិបាល នៃព្រះរាជាណាចក្រកម្ពុជា តាមរយៈការខិតខំបំពេញភារកិច្ចបម្រើការងារជូនប្រជាពលរដ្ឋទាំងការងារសំណង់ និងការងារសុរិយោដី។
ជាមួយគ្នានេះ លោក យន្ត មីន បានទទួលស្គាល់ចំពោះលទ្ធផលការងារផ្ដល់ប័ណ្ណសំគាល់ម្ចាស់អចលនវត្ថុ តាមលក្ខណៈប្រព័ន្ធ ដែលជានយោបាយ ដ៏មានសារៈសំខាន់ របស់សម្តេចប្រមុខដឹកនាំរាជរដ្ឋាភិបាលកម្ពុជា ក្នុងការគ្រប់គ្រងប្រើប្រាស់ដី ដើម្បីការអភិវឌ្ឍសង្គមជាតិ ឈានទៅកាត់បន្ថយជម្លោះដណ្តើមដីធ្លី ដែលធ្លាប់កើតមាននាពេលកន្លងទៅ។
នាឱកាសពិធីបិទសន្និបាតនោះដែរ លោក យន្ត មីន ក៏បានបង្ហាញអំពីសកម្មភាពការងារ របស់ រដ្ឋបាលខេត្តព្រះសីហនុ ដេលបានខិតខំដោះស្រាយវិវាទដីធ្លី ព្រមទាំងវិស័យសំណង់វិស័យរៀបចំដែនដី នគររូបនីកម្ម និងអភិវឌ្ឍតំបន់ឆ្នេរសមុទ្រ ដើម្បីសម្រេចបាននូវចក្ខុវិស័យក្នុងវិស័យដីធ្លីនាមូលដ្ឋាននេះ ទទួលបានផលវិជ្ជមានគួរឲ្យកត់សម្គាល់។
ជាមួយគ្នានេះ លោក យន្ត មីន អភិបាលខេត្តព្រះសីហនុ ក៏បានលើកទឹកចិត្តដល់មន្ត្រីមន្ទីររៀបចំដែនដីគ្រប់ជំនាញ និងគ្រប់ផ្នែក ឲ្យបន្តខិតខំជម្រុញការងារផ្តល់ប័ណ្ណកម្មសិទ្ធិដីធ្លីជូនប្រជាពលរដ្ឋ ការងារគ្រប់គ្រងដីរដ្ឋ កិច្ចការពារបរិស្ថាន និងធនធានធម្មជាតិ ព្រមទាំងការងារអភិវឌ្ឍសេដ្ឋកិច្ច និងបែងចែកដីធ្លីផ្សេងៗប្រកប ដោយសមធម៌តម្លាភាព និងមានប្រសិទ្ធភាព។
លោក យន្ត មីន បន្ថែមថា ក្នុងនាមថ្នាក់ដឹកនាំ នៃរដ្ឋបាលខេត្តព្រះសីហនុ បានគាំទ្រចំពោះ ការដឹកនាំប្រកបដោយគតិបណ្ឌិត របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញ នូវចក្ខុវិស័យយុទ្ធសាស្ត្រ និងគោលនយោបាយដ៏ត្រឹមត្រូវ ក្នុងយុទ្ធសាស្ត្រចតុកោណដំណាក់កាលទី៣ ដ៏មានសារៈសំខាន់។
នាពិធីបិទសន្និបាតបូកសរុបការងារឆ្នាំ២០១៧ និងកំណត់ទិសដៅការងារអនុវត្តបន្តសម្រាប់ឆ្នាំ២០១៨ របស់មន្ទីររៀបចំដែនដី ខេត្តព្រះសីហនុ កាលពីថ្ងៃទី១១ ខែមករា ឆ្នាំ២០១៨។ លោក យន្ត មីន អភិបាល នៃគណៈអភិបាលខេត្តព្រះសីហនុ ក៏បានអញ្ជើញបំពាក់គ្រឿងឥស្សរិយស ជូនដល់មន្ត្រីរាជការដែលមានស្នាដៃល្អក្នុងការបំពេញភារកិច្ចជូនប្រទេសជាតិនាពេលកន្លងទៅ ដោយមានការគាំទ្រពីមន្ត្រីរាជការក្រោមឱវាទ នៃរដ្ឋបាលខេត្ត ប្រកបដោយបរិយាកាសសប្បាយរីករាយក្រៃលែង៕ ដែន សីមា