សត្វស្លាប និងថនិកសត្វយ៉ាងតិច ៣០ក្បាលបានងាប់ ដោយសារតែភ្លើងឆេះផ្ទះស្វា នៅសួនសត្វ Krefeld ស្ថិតក្នុងប្រទេសអាឡឺម៉ង។ ភ្លើងបានចាប់ផ្តើមឆេះប៉ុន្មានម៉ោងប៉ុណ្ណោះមុនឆ្លងចូលឆ្នាំថ្មី។
“ផ្ទះស្វារបស់ពួកយើងបានត្រូវភ្លើងឆេះនៅមុនកណ្តាលអធ្រាត្រ។ យើងនៅមិនទាន់ដឹងពីមូលហេតុដែលបណ្តាលឲ្យមានភ្លើងឆេះនៅឡើយទេ ប៉ុន្តែវាបានឆេះផ្ទះស្វាទាំងស្រុង”។ នេះជាការបញ្ជាក់របស់ប្រធានសួនសត្វឈ្មោះ Wolfgang Dressen ប្រាប់អ្នកសារព័ត៌មាន។
លោកថ្លែងថា វាគឺជាសោកនាដកម្មទាំងស្រុងសម្រាប់បក្សី និងថនិកសត្វដែលនៅក្នុងនោះ។ លោកបញ្ជាក់ទៀតថា ក្នុងចំណោមសត្វដែលបានងាប់ មានពពួកស្វាកម្រដែលជិតផុតពូជដូចជា ស្វាធំ (orangutan)មកពីកោះ Borneo ស្វាឪ (gorillas) មកពីអាហ្វ្រិចកណ្តាល និងប្រភេទស្វា chimpanzee មកពីអាហ្រ្វិចខាងលិចជាដើម។
នៅក្នុងសេចក្តីប្រកាសលើហ្វេសបុកផេក សួនសត្វបាននិយាយថា ស្វា chimpanzee ពីរក្បាលឈ្មោះ Bally និង Limbo នៅរស់រានមានជីវិត ដែលវាហាក់ដូចជាអភូតហេតុ។ ស្វាទាំង ២នោះរងរបួសតែបន្តិចប៉ុណ្ណោះ។
ខាងសួនសត្វបញ្ជាក់ថា សួននឹងត្រូវបិទរហូតដល់ថ្ងៃព្រហស្បតិ៍។ មន្រ្តីសួនសត្វប្រកាសថានឹងធ្វើការសាងសងផ្ទះថ្មី និងយកប្រភេទស្វាធំជាច្រើនក្បាល មកដាក់នៅសួនសត្វនាពេលខាងមុខ។
អ្នកស៊ើបអង្កេតបានប្រាប់ប្រព័ន្ធផ្សព្វផ្សាយថា សាក្សីបានឃើញគោមជាច្រើនហោះនៅក្បែរសួនសត្វ និងហោះមកទាបបំផុត ដូច្នេះពួកយើងអាចសន្និដ្ឋានថា គោមទាំងនោះបានធ្លាក់មកលើដីនៃសួន។
សូមបញ្ជាក់ថា ការបង្ហោះគោមត្រូវបានហាមឃាត់នៅក្នុងរដ្ឋRhine-Westphalia ចាប់តាំងពីឆ្នាំ ២០០៩មកម្លេះដោយសារតែវាធ្វើឲ្យមានគ្រោះអគ្គិភ័យ។ អ្នកប្រព្រឹត្តិល្មើសអាចប្រឈមនឹងការផាកពិន័យជាទឹកប្រាក់ជាង១.០០០ដុល្លារ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN