សហរដ្ឋអាមេរិចបានប្រកាសដាក់បំរាម ទូទាំងប្រទេសលើការប្រើប្រាស់ បារីអេឡិចត្រូវនិច ដែលមានដាក់បន្ថែមរសជាតិ ក្រោយពេលមានការព្រួយបារម្ភ អំពីការប្រើប្រាស់របស់យុវជន។
បម្រាមនោះនឹងអនុវត្តទៅលើការបន្ថែម រសជាតិជីអង្កាម និងផ្លែឈើ។
ប៉ុន្តែអាមេរិចនៅតែបន្តអនុញ្ញាត ឲ្យមានការប្រើប្រាស់រសជាតិម៉ុងតុល (ថ្នាំសម្រាប់បន្ថយការឈឺចាប់) និងរសជាតិថ្នាំជក់ ព្រមទាំងរសជាតិផ្លែឈើ ដែលប្រើប្រាស់តាមវិធីផ្សេង។
វិធានការនេះត្រូវបានអាមេរិច ពិចារណាអស់ជាងមួយឆ្នាំមកហើយ ដោយមានរដ្ឋជាច្រើនបានអនុម័តច្បាប់ស្រដៀងគ្នា។
ប្រទេសកូរ៉េខាងត្បូង ឥណ្ឌា ប្រេស៊ីល ស្ថិតក្នុងចំណោមប្រទេសជាច្រើន ដែលបានហាមប្រើប្រាស់បារីអេឡិចត្រូនិច។ ប្រទេសមួយចំនួនទៀត ដូចជាចិន បានប្រកាសដាក់កំហិតលើការប្រើប្រាស់។
សូមបញ្ជាក់ថា បើតាមស្ថាប័នសុខាភិបាលអាមេរិចបានឲ្យដឹងថា មានមនុស្ស ៥៥នាក់បានស្លាប់ និងច្រើនជាង ២.៥០០នាក់ទៀត ត្រូវបានបញ្ជូនទៅកាន់មន្ទីរពេទ្យ ដោយសារតែបញ្ហារបួសទាក់ទងទៅនឹងការប្រើប្រាស់បារីអេឡិចត្រូវនិច៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC