ភ្នំពេញ៖ ក្នុងឱកាសត្រៀមផែនការ ការពារសន្តិសុខ សណ្តាប់ធ្នាប់របៀបរៀបរយក្នុងឱកាសទិវាបុណ្យ៧មករា ខួបលើកទី៤១ លោកឃួង ស្រេង អភិបាលនៃគណៈអភិបាលរាជធានីភ្នំពេញ បានលើកឡើងថា ថ្វីត្បិត ការងារខាងលើមិនមែនជាការងារថ្មី តែយើងទាំងអស់គ្នា ត្រូវតែពង្រឹងសន្តិសុខសណ្តាប់ធ្នាប់ឲ្យបានល្អ និងដោយរលូនឲ្យសក្តិសមទៅនឹងអត្ថន័យបុណ្យជាតិ ជាថ្ងៃកំណើតទី២របស់យើងទាំងអស់គ្នា។
ការលើកឡើងរបស់ លោកឃួង ស្រេង បែបនេះបានធ្វើឡើងកាលពីព្រឹកថ្ងៃទី៣ ខែមករា ឆ្នាំ២០២០ កិច្ចប្រជុំ
ដើម្បីត្រៀមផែនការ ការពារសន្តិសុខ សណ្តាប់ធ្នាប់របៀបរៀបរយក្នុងឱកាសទិវាបុណ្យ៧មករា ខួបលើកទី៤១(៧មករា ១៩៧៩.៧មករា ២០២០)ដែលមិទ្ទីងដ៏ធំនេះ នឹងធ្វើឡើងនៅមុខសាលមហោស្រពកោះពេជ្រ។
លោកឃួង ស្រេង បានមានប្រសាសន៍លើកឡើងថា ថ្វីត្បិត ការងារខាងលើមិនមែនជាការងារថ្មី តែយើងទាំងអស់គ្នា ត្រូវតែពង្រឹងសន្តិសុខសណ្តាប់ធ្នាប់ឲ្យបានល្អ និងដោយរលូនឲ្យសក្តិសមទៅនឹងអត្ថន័យបុណ្យជាតិ ជាថ្ងៃកំណើតទី២របស់យើងទាំងអស់គ្នា។ យើងមិនអាចសន្តិភាពនិយមជាមួយក្រុមជនអគតិបានទេ ព្រោះពួកគេគ្មានអ្វីក្រៅពីបំផ្លាញនោះទេ ដើម្បីមហិច្ឆតានយោបាយ។
ក្នុងឱកាសនោះដែរ លោកឃួង ស្រេង ក៏បានណែនាំដល់អាជ្ញាធរគ្រប់ខណ្ឌត្រូវចូលរួមពង្រឹង សន្តិសុខសណ្តាប់ធ្នាប់តាមខណ្ឌរៀងៗខ្លួន រួមទាំងការសំអាតបរិស្ថាន ការលក់ដូរគ្មានសណ្តាប់ធ្នាប់ផងដែរ។
លោកឧត្តមសេនីយ៍ទូច ណារុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស ក្នុងកិច្ចប្រេជុំនោះដែរ ក៏បានលើកឡើងពីផែនការលម្អិត ក្នុងការរៀបចំពង្រឹងការការពារសន្តិសុខ សណ្តាប់ធ្នាប់ឲ្យបានល្អប្រសើរ សម្រាប់អង្គមិទ្ទីងដ៏មានអត្ថន័យ នេះនៅចំណុចទីតាំងប្រារព្វពិធី, ទីតាំងជុំវិញដោយរៀបចំទាំងចំណតយានយន្ត ច្រកចេញចូល, អ្នកលក់ដូរឬការដ្ឋានសំណង់នៅចំណុចជុំវិញត្រូវបានណែនាំឲ្យ ផ្អាកជាបណ្តោះអាសន្ន។
ក្នុងនោះដែរ កិច្ចប្រជុំក៏បានផ្តោតទៅលើអ្នកសារព័ត៌ មានដោយនិយាយថា តែងបង្កភាពរញ៉េរញ៉ៃនិយាយមិនស្តាប់គ្នា។ កន្លងមកពេលមានពិធីម្តងៗអ្នកសារព័ត៌មាន និងសមត្ថកិច្ចតែប៉ះសំដីគ្នាដោយសារតែស្ថាប័នទាំង២នេះ សុទ្ធតែមានភារកិច្ច និងតួនាទីរៀងៗខ្លួន មិនអាចទម្លាក់កំហុសទៅ លើនរណាមួយបានទេ។ សំខាន់គឺត្រូវមានការរៀបចំមួយឲ្យត្រឹមត្រូវនិងស្មើភាព ព្រោះអ្នកសារព័ត៌មានត្រូវការរូបភាពស្អាត យកមកផ្សព្វផ្សាយ ជូនមហាជនបានជ្រាប ពីព្រឹត្តិការណ៍ដែលបានកើតឡើង៕ដោយ៖កូឡាប