ឯកអគ្គរដ្ឋទូតចិនប្រចាំអង្គការសហប្រជាជាតិ បានស្នើឲ្យមានការបន្ធូរបន្ថយ ទណ្ឌកម្មអន្តរជាតិ ប្រឆាំងនឹងកូរ៉េខាងជើង។
ឯកអគ្គរដ្ឋទូតចិនលោក Zhang Jun បានថ្លែងកាលពីថ្ងៃសុក្រម្សិលមិញថា សេចក្តីសម្រេចរបស់ចិន និងរុស្សីដែលមានគោលបំណង បន្ថយទណ្ឌកម្មលើកូរ៉េខាងជើង គឺជាជំហានដែលត្រឹមត្រូវ។
ការស្នើសុំឲ្យមានការបន្ថយទណ្ឌកម្មរបស់លោក កើតឡើងក្រោយពេលរបបព្យុងយ៉ាង បានប្រកាសថាខ្លួនលែងអនុវត្តការប្តេជ្ញារបស់ខ្លួនទៀតហើយ។ កូរ៉េខាងជើងមានការទាស់ចិត្ត យ៉ាងខ្លាំងចំពោះទណ្ឌកម្មដែលនៅតែបន្ត អនុវត្តលើខ្លួន បើទោះបីជាខ្លួនបានផ្អាកការបាញ់សាកល្បងនុយក្លេអ៊ែរ និងមីស៊ីលរយៈចំងាយឆ្ងាយក្តី។
ចាប់តាំងពីឆ្នាំ ២០១៧មក កូរ៉េខាងជើងមិនមានការបាញ់សាកល្បងអាវុធនុយក្លេអ៊ែរ ឬមីស៊ីលរយៈចំងាយឆ្ងាញឡើយ។
កិច្ចប្រជុំចំនួន ២កាលពីលើកមុន នៅក្រុមប្រឹក្សាសន្តិសុខអង្គការសហប្រជាជាតិ ស្តីពីសំណើរបស់ចិន និងរុស្សីមិនបានសម្រេចកិច្ចព្រមព្រៀងអ្វីទេ ប៉ុន្តែឯកអគ្គរដ្ឋទូតចិន បានថ្លែងថា ទីក្រុងប៉េកាំងសង្ឃឹមថា “ពួកយើងនឹងអាចបង្កើតមតិរួមបានកាន់តែច្រើន”។
នៅពេលរបបព្យុងយ៉ាង បានប្រកាសពីការបោះបង់ចោលការប្តេជ្ញាចិត្តខ្លួន កាលពីថ្ងៃពុធ អាមេរិចបានធ្វើការឆ្លើយតបយ៉ាងប្រុងប្រយ័ត្ន។ រដ្ឋមន្រ្តីការបរទេសអាមេរិចលោក Mike Pompeo បានជំរុញឲ្យមេដឹកនាំកូរ៉េខាងជើង គីម ជុងអ៊ុនឲ្យជ្រើសរើសទិសដៅផ្សេង និងបានសង្កត់ធ្ងន់ថា ទីក្រុងវ៉ាស៊ីនតោន “ចង់បានសន្តិភាព មិនមែនការប្រឈមដាក់គ្នានោះឡើយ”។
ទោះយ៉ាងណា អាមេរិចមិនបានបង្ហាញតម្រុញថា ខ្លួនត្រៀមខ្លួនរួចរាល់ក្នុងការបន្ថយទណ្ឌកម្មឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia