តាកែវ៖ ថ្លែងក្នុងពិធីចែកវិញ្ញាបនបត្រ និងពានរង្វាន់ ដល់សិស្សដែលជប់ជ័យលីភី លើការប្រកួតប្រជែងថ្នាក់អន្តរជាតិលើកទី ២៤ ដែលមានការចូលរួមពីសិស្សចំនួន ៤៩ប្រទេស របស់ UCMAS នាព្រឹកថ្ងៃទី ៤ ខែមករា ឆ្នាំ២០២០ នេះ លោក ហម និម៉ុន អនុប្រធានមន្ទីរអប់រំយុវជននិងកីឡាខេត្តតាកែវ បានចាត់ទុកវិស័យអប់រំផ្នែកឯកជនបានចូលរួមជួយយ៉ាងសកម្ម លើការជួយជំរុញបន្ថែមលើការសិក្សារបស់សិស្ស ជាពិសេសលើប្រព័ន្ធកម្មវិធីសិក្សាគិតលេខលឿនរហ័ស របស់កម្មវិធីសិក្សា UCMAS ដែលធ្វើឲ្យក្មេងៗងាយស្រួលយល់ និងគិតលេខបានយ៉ាងរហ័ស លឿនជាងចុចម៉ាស៊ីនគិតលេខទៀត ដែលនេះចំណុចមួយធ្វើឲ្យយើងនឹកស្មានមិនដល់ និងលើសពីការរំពឹងទុក ។
លោកបន្តថា នៅពេលបច្ចុប្បន្ននេះ នៅវិស័យអប់រំផ្នែកឯកជន បាននិងកំពុងចូលរួមជួយច្រើនដើម្បីធ្វើឲ្យការ កំណែទម្រង់របស់ក្រសួងអប់រំទទួលបានជោគជ័យ ហើយលោករីករាយជានិច្ចនិងស្វាគមន៍ ចំពោះការបង្កើតឲ្យមានសាលារៀនក្រៅម៉ោង ដែលបានជួយបំពេញបន្ថែម លើសមត្ថភាពរបស់សិស្ស ហើយក៏សូមថ្លែងអំណរគុណដល់អណាព្យាបាលរបស់សិស្សផងដែរ ដែលពួកគាត់បានគិតគូរ និងយកចិត្តទុកដាក់លើការសិក្សារបស់កូនៗ និងនាំកូនមកចុះចូលរៀន ទទួលយកចំណេះដឹងនេះ ។
លោកអនុប្រធានមន្ទីរអប់រំយុវជននិងកីឡាខេត្តតាកែវ បានសំណូមពរឲ្យលោកប៉ាអ្នកម៉ាក់របស់ សិស្ស ត្រូវកាត់បន្ថយជាមួយនិងការឲ្យកូនៗរបស់ខ្លួន កាន់លេងទូរស័ព្ទ មើលអ្វីផ្សេងដែលជាសកម្មភាព មិនល្អ ធ្វើឲ្យក្មេងៗប្រឈមមុខនិងការកើតនៅជំងឺ ណេតស្ត្រូប ដែលជាជំងឺម្យ៉ាងធ្វើឲ្យក្មេងនោះ មិនសូវនិយាយជាមួយនិងអ្នកណា និងខ្សោយកាគិត ដែលយើងទាំងអស់គ្នាមិនសូវបានចាប់អារម្មណ៍ទៅលើកូនរបស់ខ្លួន ដូច្នេះដើម្បីជៀសវាងលើការកើតមាននូវជំងឺបែបនេះ ទៅលើកូនៗជាទីស្រឡាញ់របស់អស់លោក សូមឲ្យអាណាព្យាបាលទាំងអស់ ត្រូវនាំកូនរបស់ខ្លួន នៅពេលគ្រប់អាយុមកចុះឈ្មោះចូលរៀន ឬរៀនបន្ថែមម៉ោងលើវិស័យឯកជន ដែលមានការទទួលស្គាល់ពីក្រសួង ។
បើកតាមការឲ្យដឹងពីលោក ប៊ុន ជន នាយកកម្មវិធីសិក្សា UCMAS មានអត្ថប្រយោជន៍ ច្រើនលើការជួយអភិវឌ្ឍន៍ខួរក្បាលទាំងសងខាង ជួយឲ្យកុមារពូកែផ្តោតអារម្មណ៍ ជួយឲ្យកុមារពូកែស្តាប់ និងសង្កេត ពូកែចងចាំ និងគណនាលេខបានយ៉ាងលឿន ហើយមានទំនុកចិត្តកាន់តែខ្លាំងលើខ្លួនឯង ។ សូមបញ្ជាក់ផងដែរថា នៅក្នុងពេលបច្ចុប្បន្ននេះ កម្មវិធីសិក្សា UCMAS កំពុងប្រើប្រាស់នៅ ៨០ប្រទេស ទូទាំងពិភពលោក សម្រាប់ប្រទេសកម្ពុជារបស់យើង មានសាខា ចំនួន ៥៣ និងមានសិស្ស ដែលកំពុងតែសិក្សា ជិត ១ម៉ឺននាក់ ៕ដោយ៖ តាកែវ
