ភ្នំពេញ៖ រដ្ឋបាលរាជធានីភ្នំពេញ បានប្រកាសព័ត៌មានថា នាព្រឹកថ្ងៃសៅរ៍ ទី៤ ខែមករា ឆ្នាំ២០២០នេះ លោក ងី មានហេង ប្រធានមន្ទីរសុខាភិបាលរាជធានីភ្នំពេញ តំណាងលោក ឃួង ស្រេង អភិបាលនៃគណៈអភិបាលរាជធានីភ្នំពេញ បានចុះសួរសុខទុក្ខជនរងគ្រោះពីរនាក់ម្ដាយនិងកូន កំពុងតែសម្រាកព្យាបាលនៅមន្ទីរពេទ្យព្រះកុសុមៈ (ពេទ្យលោកសង្ឃ) ដែលរងគ្រោះថ្នាក់ ដោយការបាក់រលំអគារធ្វើពីស៊ីម៉ងត៍បេតុងសរសៃដែកកម្ពស់៧ជាន់ នៅខេត្តកែប កាលពីថ្ងៃទី៣ ខែមករា ឆ្នាំ២០២០នេះ នៅម៉ោងប្រមាណ៤និង៣០នាទីល្ងាច។
ដោយមានការយកចិត្តទុកខ្ពស់ លោកអភិបាលរាជធានីភ្នំពេញ បានឧបត្ថម្ភថវិកា ជូនជនរងគ្រោះពីរនាក់ម្ដាយនិងកូន ចំនួន៤.០០០.០០០រៀល(បួនលានរៀល)។
ជនរងគ្រោះ គឺលោកស្រី ជុំ អន (អូន) អាយុ៣៥ឆ្នាំ បានទទួលរងគ្រោះដោយការរលំអគារនៅខេត្តកែប និងកូនប្រុសឈ្មោះ សាយ ចិត្តអាយុ១៥ឆ្នាំ បាននិងកំពុងសម្រាកព្យាបាលនៅមន្ទីរពេទ្យព្រះកុសុមៈ។ ម្តាយរងរបួសបាក់ឆ្អឹងកំភួនដៃស្តាំ និងឆ្អឹងដើមដៃឆ្វេង។ កូនរងរបួសស្រាល។
ពួកគាត់ទាំងពីរនាក់ ម្តាយនិងកូនប្រុស បានថ្លែងអំណរគុណជាអនេកចំពោះការឧបត្ថម្ភថវិការបស់លោកអភិបាលរាជធានីភ្នំពេញ។
រដ្ឋបាលខេត្តកែប បានបញ្ជាក់ថា រហូតដល់ម៉ោង៥ព្រឹកថ្ងៃទី៤ ខែមករា ឆ្នាំ២០២០នេះ ក្រុមអ្នកជួយសង្គ្រោះចម្រុះ បានរកឃើញជនរងគ្រោះដែលកប់នៅក្នុងគំនរអគារកម្ពស់៦ជាន់ រលំបាក់នៅខេត្តកែប ចំនួន២៣នាក់ហើយ ដែលក្នុងនោះមានជនរងគ្រោះស្លាប់៥នាក់ ( ស្រី៣នាក់ ) អ្នកនៅរស់រានមានជីវិត១៨នាក់។
ពាក់ព័ន្ធករណីនេះ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចេញសេចក្ដីសម្រេច ស្ដីពីការបង្កើតគណៈកម្មការធ្វើកោសល្យវិច័យអគាររបស់ឈ្មោះ ឯក សារុន និងប្រពន្ធឈ្មោះ ឈីវ សុធី ដែលបានបាក់រលំនៅថ្ងៃទី៣ ខែធ្នូ ឆ្នាំ២០២០ ស្ថិតនៅភូមិកែប សង្កាត់កែប ក្រុងកែប ខេត្តកែប។
ដោយការយកចិត្តទុកដាក់ពីសម្ដេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជានិងលោកឃួង ស្រេងអភិបាលនៃគណៈអភិបាលរាជធានីភ្នំពេញ ជនរងគ្រោះ២នាក់ម្តាយ កូន ដែលបានបញ្ជូនពីទីក្រុងកែប ក្រោយពីបាក់រលំអគារបណ្ដាលឲ្យរងរបួសធ្ងន់ធ្ងរនិងស្រាលនោះ ត្រូវបានអាជ្ញាធររាជធានីភ្នំពេញយកចិត្តទុកដាក់ ខណៈដែលជនរូបគ្រោះ២រូបនេះបាននិងកំពុងសម្រាក ព្យាបាល
នៅក្នុងមន្ទីរពេទ្យព្រះកុសុមៈ នារាជធានីភ្នំពេញ។
គួរបញ្ជាក់ថា បន្ទាប់ពីទទួលបានថវិកាជាង ១លាន ៣សែនដុល្លារ ពីសប្បុរសជននានា នៅរសៀលថ្ងៃទី០៤ ខែមករា ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសបែងចែក ផ្តល់ប្រាក់ឧបត្ថម្ភទាំងនោះ ដល់ជនរងគ្រោះ ក្នុងករណីបាក់ស្រុត រលំអគារ ៦ជាន់ នៅខេត្តកែប។ ក្នុងនោះចំពោះ
សពជនរងគ្រោម្នាក់ ទទួលបាន ៥ម៉ឺនដុល្លារ និង ១០លានរៀល សម្រាប់ពិធីបុណ្យសព។ចំណែកអ្នករបួស ម្នាក់ៗ ទទួលបានថវិកា ១ម៉ឺនដុល្លារ។ សម្ដេចតេជោ ហ៊ុន សែន បានចាត់ឲ្យលោក សេង ទៀង ជំនួយការផ្ទាល់របស់សម្ដេច យកថវិកាទាំងនោះ ទៅប្រគល់ជូនដល់ផ្ទះគ្រួសារនៃសព និងដល់ជនរងគ្រោះ ដែលកំពុងសម្រាកព្យាបាលនៅមន្ទីរពេទ្យ៕ដោយ៖កូឡាប
