កោះកុង៖ ក្រសួងទេសចរណ៍ បានប្រកាសព័ត៌មានថា នៅវេលាម៉ោង ១១ព្រឹកថ្ងៃទី៤មករានេះ ព្រឹត្តិការណ៍ប្រណាំងកង់ពិភពលោកនៅតំបន់ឆ្នេរសមុទ្រកម្ពុជា លើកទី១ បានចាប់ផ្ដើមក្បួនប្រណាំងដំណាក់កាលទី១ ហើយ ដោយចេញដំណើរពីរមណីយដ្ឋានតារាសាគរ។ ពិធីចេញដំណើរដំណាក់កាលដំបូងនេះ បានធ្វើឡើងក្រោមវត្តមានលោក ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) និងលោកស្រី មិថុនា ភូថង អភិបាលនៃគណៈអភិបាលខេត្តកោះកុង។
លោក ថោង ខុន បានថ្លែងថា ព្រឹត្តិការណ៍ប្រណាំងកង់ពិភពលោកលើកដំបូងនៅកម្ពុជានេះ គឺមានកីឡាករសរុប ១៦០នាក់ មកពី ១៣ប្រទេស ក្នុងនោះបែងចែកជា ១៦ក្រុមចូលរួមប្រកួត ៣ដំណាក់កាល និងត្រូវឆ្លងកាត់ខេត្តចំនួន ៤ រួមមានខេត្តកោះកុង ខេត្តព្រះសីហនុ ខេត្តកំពត និងខេត្តកែប។ កីឡាករចូលរួមប្រកួត គឺមានមកពីបារាំង ចិន ហុងកុង ម៉ាឡេស៊ី សិង្ហបុរី ម៉ុងហ្គោលី ហូឡង់ វៀតណាម ហ្វីលីពីន ឥណ្ឌូនេស៊ី ឡាវ ថៃ ឥណ្ឌូនេស៊ី និងម្ចាស់ផ្ទះកម្ពុជា។
ទន្ទឹមជាមួយគ្នាលោករដ្ឋមន្ដ្រី ក៏បានថ្លែងអំណរគុណ ចំពោះក្លឹបឆ្នេរសមុទ្រស្អាតបំផុតលើពិភពលោក និងសហព័ន្ធកីឡាប្រណាំងកង់អន្ដរជាតិ អាជ្ញាធរ និងគ្រប់ភាគីពាក់ព័ន្ធ ដែលបានខិតខំរៀបចំព្រឹត្តិការណ៍នេះឡើង ក្នុងគោលបំណងផ្សព្វផ្សាយពីសក្ដានុពលតំបន់ទេសចរណ៍កម្ពុជា និងរួមចំណែកលើកស្ទួយវិស័យកីឡាជិះកង់កម្ពុជាឲ្យរីកចម្រើន ដើម្បីត្រៀមខ្លួនឆ្ពោះទៅរកការប្រកួតកីឡាស៊ីហ្គេម លើកទី៣២ នាឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះផងដែរ។
លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC បានបញ្ជាក់ថា សម្រាប់កម្មវិធីប្រកួត នៃព្រឹត្តិការណ៍ប្រណាំងកង់ពិភពលោកនៅតំបន់ឆ្នេរសមុទ្រកម្ពុជា លើកទី១ រួមមាន៖
– ដំណាក់កាលទី១៖ ថ្ងៃទី៤មករា ក្បួនប្រណាំងចេញដំណើរពីរមណីយដ្ឋានតារាសាគរ និងបញ្ចប់នៅទីរួមខេត្តកោះកុង លើចម្ងាយសរុបប្រមាណ ១៥៣,៥ គីឡូម៉ែត្រ។
– ដំណាក់កាលទី២៖ ថ្ងៃទី៥មករា ក្បួនប្រណាំងចេញពីរង្វមូង់លលោកតាសាយភូថង និងបញ្ចប់នៅរមណីយដ្ឋានឋានសួគ៌សុខាបូកគោ (កំពូលភ្នំ) លើចម្ងាយសរុបប្រមាណ ១៧២,៨ គីឡូម៉ែត្រ។
– ដំណាក់កាលទី៣៖ ថ្ងៃទី៦មករា ក្បួនប្រណាំងចេញដំណើរពីខ្លោងទ្វារជើងភ្នំបូកគោ និងបញ្ចប់នៅមុខសាលាខេត្តកែប ដែលមានចម្ងាយប្រមាណ ១៤៧,៧គីឡូម៉ែត្រ៕ដោយ៖បញ្ញាស័ក្តិ