ភ្នំពេញ៖ បណ្តាញសារព័ត៌មាន ក៏ដូចជាបណ្តាញសង្គមហ្វេសប៊ុក បានចុះផ្សាយថា លោក កើត ដារ៉ាស៊ី ប្រធានការិយាល័យនគរបាលអន្តោប្រវេសន៍ច្រកអន្តរជាតិត្រពាំស្រែ-វ៉ាលឺ ជាមេខ្លោងពុករលួយ ប្រចាំច្រកទ្វារអន្តរជាតិត្រពាំងស្រែ-វ៉ាលឺ រកចំណូលបានយ៉ាងច្រើន ក្នុង១ខែៗ តាមរយៈការយកប្រាក់ពីក្រុមហ៊ុនដឹកជញ្ជូនទំនិញគិតជាក្បាលរថយន្ត ក្នុងមួយគ្រឿងៗ តិចបំផុត ២៥០ដុល្លារ ទៅ ៣០០ដុល្លារ ដើម្បីឆ្លងកាត់ចូលទៅប្រទេសវៀតណាម។
ពាក់ព័ន្ធនឹងការចោទប្រកាន់ខាងលើនោះ នៅថ្ងៃទី៥ខែមករាឆ្នាំ២០២០ អគ្គនាយកដ្ឋានអន្តោប្រវេសន៍ និងប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងស្រែ បានចេញលិខិតបំភ្លឺការចុះផ្សាយរបស់សារព័ត៌មាន ដែលបានចុះផ្សាយថា លោក កើត ដារ៉ាស៊ី មេខ្លោងពុករលួយដ៏ធំ ប្រចាំច្រកទ្វារត្រពាំងស្រែ-វ៉ាលឺ។
ការចុះផ្សាយលើសារព័ត៌មានថា លោក កើត ដារ៉ាស៊ី ជាមេខ្លោងប្រព្រឹត្តសកមភាពពូករលួយ តាមរយៈការយកប្រាក់ ពីក្រុមហ៊ុនដឹកជញ្ជូនទំនិញ គិតជាក្បាលរថយន្តចេញទៅប្រទេសវៀតណាម តាមច្រកទ្វារត្រពាំងស្រែនេះ គឺមិនមានជាដាច់ខាត ហើយការអនុវត្តន៍ការងារប្រចាំថ្ងៃ គឺផ្អែកលើអនុក្រឹត្យ៦៤ អនក្រ.បក ចុះថ្ងៃទី០៩ ខែកក្កដា ឆ្នាំ២០០១ ដោយមានស្ថាប័នជំនាញនីមួយៗ ចូលរួមសហការត្រួតពិនិត្យ និងមានឯកសារត្រឹមត្រូវ មុននឹងអនុញ្ញាតឲ្យចេញ-ចូលប្រទេស គឺមិនមានការប្រព្រឹត្តដូចការចុះផ្សាយព័ត៌មាន មូលបង្កាច់របស់សារព័ត៌មានហើយយើងខ្ញុំសូមធ្វើការបដិសេធយ៉ាងដាច់អហង្ការថា មិនមានសកម្មភាពមិនប្រក្រតីណាមួយ ដូចការចុះផ្សាយចោទប្រកាន់នោះឡើយ។
ប៉ុស្តិ៍បានដាក់បទបញ្ជាយ៉ាងម៉ឺងម៉ាត់ ពិសេសការបង្ការ-ទប់ស្កាត់បទល្មើសឆ្លងដែលតាមគ្រប់រូបភាព សំដៅបង្កើនការការពារសន្តិសុខ សណ្តាប់ធ្នាប់ និងការផ្តល់សេវាសាធារណៈ ជូនភ្ញៀវជាតិ-អន្តរជាតិឲ្យបានឆាប់រហ័ស និងប្រកបដោយប្រសិទ្ធិភាព ដែលផ្ទុយស្រឡះពីការចុះផ្សាយព័ត៌មាន ដែលមានប្រភពមិនច្បាស់លាស់។
នាយកដ្ឋានដាច់ខាតមិនមានគោលការណ៍ ឬបទបញ្ជាណាមួយឲ្យមន្ត្រីក្រោមឱវាទ ទារកម្រៃក្រោមតុ លើតុពីភ្ញៀវ ឬអាជីវករដែលធ្វើដំណើរចេញ-ចូល ឬរកស៊ីតាមច្រកទ្វារព្រំដែនអន្តរជាត្រិតពាំងស្រែ ដូចដែលការចុះផ្សាយរបស់សារព័ត៌មាននគរវត្តនោះឡើយ។ ជាមួយនេះ ខ្ញុំសូមបដិសេធទាំងស្រុង ចំពោះការចុះផ្សាយរបស់សារព័ត៌មាន ដែលផ្សាយ គ្មានប្រភពច្បាស់លាស់ ដែលធ្វើឲ្យប៉ះពាល់ដល់កេរ្តិ៍ឈ្មោះបុគ្គល ស្ថាប័ន និងអង្គភាព។
សូមបញ្ជាក់ថា ប្រធានការិយាល័យនគរបាលអន្តោប្រវេសន៍ច្រកអន្តរជាតិត្រពាំងស្រែ-វ៉ាលឺ លោក កើត ដារ៉ាស៊ី រកចំណូលពីអំពើពុករលួយក្នុងតំណែង បានយ៉ាងច្រើនក្នុងមួយខែៗ តាមរយៈយកលុយពីក្រុមហ៊ុនដឹកជញ្ជូនទំនិញ គិតជាក្បាលរថយន្តជាដើម ។
យ៉ាងតិចមានក្រុមហ៊ុនដឹកជញ្ជូនចំនួន៤ បាននឹងកំពុងដំណើរការដឹកជញ្ជូនទំនិញមកពីបរទេស ចូលកម្ពុជា តាមច្រកអន្តរជាតិត្រពាំងស្រែ-វ៉ាលឺ ក្នុងនោះក្រៅអំពីក្រុមហ៊ុនដឹកជញ្ជូនត្រូវបង់ប្រាក់ជាក្បាលរថយន្ត ជាប្រភេទរថយន្តយីឌុប និងកុងតឺន័រឲ្យទៅស្ថាប័នដទៃទៀត ក៏មិនអាចគេចផុតពីការបង់ប្រាក់ មកឲ្យលោក កើត ដារ៉ាស៊ី ប្រធានការិយាល័យនគរបាលអន្តោប្រវេសន៍ច្រកខាងលើនេះ ដែលមិនមែនជាស្ថាប័នប្រមូលពន្ធជូនរដ្ឋនោះ ។
មានន័យថា លោក កើត ដារ៉ាស៊ី យកលុយពីក្រុមហ៊ុនដឹកជញ្ជូន តាមរយៈរាប់គិតជាចំនួនក្បាលរថយន្ត ជាប្រយោជន៍បុគ្គលរបស់គាត់ និងបក្ខពួកតែប៉ុណ្ណោះ ។ សូមបញ្ជាក់ថា តួនាទីរបស់លោក កើត ដារ៉ាស៊ី ក្នុងនាមជាប្រធានការិយាល័យនគរបាលអន្តោប្រវេសន៍ បើយោងតាមអនុក្រឹត្យ លេខ៦៤មសន គឺមានតួនាទីត្រួតពិនិត្យរាល់មធ្យោបាយដឹកទំនិញចេញ-ចូល ត្រួតពិនិត្យអ្នកដំណើរ(ភ្ញៀវជាតិ-អន្តរជាតិ) ប្រថាប់ត្រាលើលិខិតឆ្លងដែន ។ ប៉ុន្តែលោក កើត ដារ៉ាស៊ី យកតួនាទី និងភារកិច្ចខាងលើនេះ ជាមធ្យោបាយរកប្រភពសេដ្ឋកិច្ចខុសពីគោលការណ៍ អគ្គនាយកដ្ឋាននគរបាលអន្តោប្រវេសន៍ ក៏ដូចជាខុសពីគោលការណ៍ អគ្គស្នងការនគរបាលជាតិ និងក្រសួងមហាផ្ទៃ ។
គេបានលួចបង្ហើបថា យ៉ាងតិចក្នុងមួយថ្ងៃទាំងរថយន្តដឹកទំនិញប្រភេទយីឌុប និងប្រភេទកុងតឺន័រ មានចាប់ពី ពី៤០ទៅ៦០គ្រឿង ។ រាល់ការដឹកជញ្ជូនឆ្លងកាត់ច្រកអន្តរជាតិត្រពាំងស្រែ-វ៉ាលឺ ត្រូវតែបង់ប្រាក់ជាក្បាល រថយន្តឲ្យក្រុមនគរបាលអន្តោប្រវេសន៍ គ្រប់គ្រងដោយលោក កើត ដារ៉ាស៊ី ក្នុងមួយគ្រឿងតិចបំផុតចាប់ពី២៥០-៣០០ដុល្លារ ។ ក្នុងនោះមានតែក្រុមហ៊ុនដឹកជញ្ជូន ចំនួន៤ប៉ុណ្ណោះ ដែលមានសិទ្ធិចូលដឹកទំនិញចូលតាមច្រកខាងលើនេះ ។
លោក កើត ដារ៉ាស៊ី មានឱកាស ប្រព្រឹត្តអំពើពុករលួយទាំងនេះបាន ដោយសារគាត់មានជំនាញបច្ចេកទេស និងហែលឆ្លងកាត់ ដឹងយ៉ាងច្បាស់ពីសកម្មភាពដឹកជញ្ជូនទំនិញរបស់ឈ្មួញ មានកំហុសបច្ចេកទេស មានអំពើឃុបឃិតគ្នា រវាងសមត្ថកិច្ចជំនាញ និងក្រុមហ៊ុន(ឃ្លាទំនិញ) ពិសេសលោក កើត ដារ៉ាស៊ី គាត់ចាប់បានចំណុចខ្សោយរបស់ក្រុមហ៊ុនដឹកជញ្ជូនដែល ឃុបឃិតគ្នាជាមួយក្រុនហ៊ុនដឹកជញ្ជូនត្រង់ចំណុច (នាំទំនិញចូលប្រភេទអេឡិចត្រូនិច ឬប្រភេទទំនិញចាប់ហួយ ប៉ុន្តែប្រកាសពន្ធជាទំនិញសំឡីអនាម័យ) ជាដើម ទើបក្រុមហ៊ុនបង្ខំចិត្តបង់ប្រាក់ ដើម្បីជៀសវាងនូវការបង្ក្រាបពីសមត្ថកិច្ចដទៃផ្សេងទៀត ដែលមានភារកិច្ចចូលរួមសហការជាមួយស្ថាប័នគយ ទប់ស្កាត់ទំនិញគេចពន្ធ បង់ពន្ធជូនរដ្ឋឲ្យបានត្រឹមត្រូវតាមគោលការណ៍ក្រសួងសេដ្ឋកិច្ច និងហិរញ្ញវត្ថុ ក៏ដូចជាអគ្គនាយកដ្ឋានគយ និងរដ្ឋាករកម្ពុជានោះ ។
ជាច្រើនឆ្នាំមកហើយ លោក កើត ដារ៉ាស៊ី តែងតែមានតំណែង ជាប្រធានការិយាល័យនគរបាលអន្តោប្រវេសន៍ប្រចាំច្រកអន្តរជាតិ ក្នុងមួយអាណត្តិៗរាប់សិបឆ្នាំ អង្គុយតំណែងកើយលុយពុករលួយនេះ ដោយស្ងាត់ស្ងៀម និងមានមោទនភាពបំផុត ដែលខ្លួនស្ថិតក្នុងអំនួតរំពឹងថា គ្មានថ្នាក់លើណា ត្រូវបានដូរតួនាទី ដកតំណែង ខណៈខ្លួនមានសមត្ថភាពក្នុងការរកប្រភពចំណូលទុក បំពេញតម្រូវការឲ្យថ្នាក់លើ ដែលចាំបាច់ទទួលយកលាភសក្ការៈផងដែរនោះ ។
ក្រៅអំពីការរកចំណូលនៃអំពើពុករលួយ រាប់ក្បាលរថយន្តពីក្រុមហ៊ុនដឹកជញ្ជូនចំនួន៤ខាងលើនេះ លោក កើត ដារ៉ាស៊ី មានជំនាញបច្ចេកទេសរកចំណូលមួយបែបទៀត ពីក្រុមហ៊ុនដឹកជញ្ជូនពីប្រទេសវៀតណាម តាមរយៈទំនិញខ្លះមិនអាចនាំពីបរទេស (Transit) ចូលប្រទេស វៀតណាមបានទេ ។ ដូច្នេះក្រុមហ៊ុនដឹកជញ្ជូនវៀតណាមត្រូវការយកប្រទេសទី៣ (កម្ពុជា) ធ្វើជាកន្លែងឆ្លងកាត់ រួចហើយត្រឡប់ចូលទឹកដីប្រទេសវៀតណាមវិញ ឲ្យក្លាយទៅជាទំនិញដឹក ជញ្ជូនពីប្រទេសកម្ពុជាចូលប្រទេសវៀតណាម (ទៅជាទំនិញបង់ពន្ធនាំចូលស្របច្បាប់) ។
រូបភាពការអនុញ្ញាតឲ្យទំនិញក្រុមហ៊ុនវៀតណាម ចូលទឹកដីកម្ពុជាតាមច្រកអន្តរជាតិត្រពាំងស្រែ-វ៉ាលឺ ក្នុងចម្ងាយដី១០០០ម៉ែត្រ ឬ១គីឡូកន្លះ ក៏បែរក្បាលត្រឡប់ចូលទឹកដីវៀតណាមវិញ ។ ក្នុងនោះក្រុមហ៊ុនដឹកជញ្ជូនវៀតណាម ត្រូវបង់លុយខ្មៅ ឲ្យខាងសមត្ថកិច្ចភាគីខាងកម្ពុជា ជាច្រើនស្ថាប័ននោះ ក្នុងរថយន្តមួយគ្រឿងយកតម្លៃចាប់ពី៣០០០-៥០០០ដុល្លារ ។
ប៉ុន្តែខាងលោកកើត ដារ៉ាស៊ី ប្រធានការិយាល័យនគរបាលអន្តោប្រវេសន៍ច្រកអន្តរជាតិត្រពាំស្រែ-វ៉ាលឺ យកសេវាពុករលួយនេះ លើសសមត្ថកិច្ចដទៃទៀត ខណៈខាងខ្លួនមានអំណាច ភារកិច្ចក្នុងការបញ្ជាឲ្យមន្ត្រីនគរបាលអន្តោប្រវេសន៍ បើកឬបិទប៉ារ៉ាសប្រចាំច្រក២៤/២៤ម៉ោង។ ដូច្នេះ ហើយទើបការអនុវត្តតួនាទី ភារកិច្ចតាមអនុក្រឹត្យលេខ៦៤មសន ក្នុងតួនាទីត្រួតពិនិត្យរាល់ មធ្យោបាយដឹកទំនិញចេញ-ចូល ត្រួតពិនិត្យអ្នកដំណើរភ្ញៀវជាតិ-អន្តរជាតិប្រថាប់ត្រាលើ លិខិតឆ្លងដែនគ្រាន់ជាការងារបន្ទាប់បន្សំ លើសេវារដ្ឋបាលតែប៉ុណ្ណោះ ៕ដោយ៖បញ្ញាស័ក្តិ
