សម្ពាធប្រឆាំងនឹងអាមេរិចក្នុងប្រទេសអ៊ីរ៉ាក់កំពុងកើនឡើងយ៉ាងខ្លាំង នៅថ្ងៃអាទិត្យម្សិលមិញនេះ ខណៈពេលដែលមានគ្រាប់រ៉ុក្កែត ២បានវាយប្រហារនៅក្បែរស្ថានទូតអាមេរិច ចំណែកសភាអ៊ីរ៉ាក់ក៏បានទាមទារឲ្យទាហានអាមេរិច រាប់ពាន់នាក់ចេញពីប្រទេសរបស់ខ្លួនផងដែរ។
ទំនាក់ទំនងរវាងអាមេរិច និងអ៊ីរ៉ាក់កាន់តែយ៉ាប់យ៉ឺនឡើង ក្រោយពេលអាមេរិចបានប្រើប្រាស់ដ្រូនវាយប្រហារ ដើម្បីសម្លាប់មេដឹកនាំយោធាជាន់ខ្ពស់របស់អ៊ីរ៉ង កាលពីថ្ងៃសុក្រកន្លងទៅនេះ នៅព្រលានយន្តហោះស្ថិតក្នុងរដ្ឋធានីបាដាដ ប្រទេសអ៊ីរ៉ាក់។
គ្រាប់រ៉ុកកែត ២បានវាយប្រហារមកក្បែរស្ថានទូតអាមេរិចនៅតំបន់ Green Zone ចំនួន ២យប់ជាប់គ្នាកាលពីថ្ងៃអាទិត្យ ដែលការវាយប្រហារនោះកើតឡើងតែប៉ុន្មានម៉ោងប៉ុណ្ណោះ ក្រោយពេលក្រសួងការបរទេសអ៊ីរ៉ាក់ បានធ្វើការកោះហៅឯកអគ្គរដ្ឋទូតអាមេរិចមកសាកសួរ ជុំវិញការវាយប្រហារសម្លាប់មេបញ្ជាការយោធាអ៊ីរ៉ងឈ្មោះ Qasem Soleimani។
កាលពីខាងដើម នាយករដ្ឋមន្រ្តីអ៊ីរ៉ាក់ លោក Adel Abdel Mahdi បានចូលរួមកិច្ចប្រជុំសភាវិសាមញ្ញ ដែលក្នុងកំឡុងកិច្ចប្រជុំលោកបានរិះគន់ ការវាយប្រហាររបស់អាមេរិចថា ជាការពិឃាតនយោបាយ។
លោកក៏បានចូលរួមជាមួយនឹងសមាជិកសភាចំនួន ១៦៨រូប ដែលចំនួននេះគ្រប់កូរ៉ុមនៃអសនៈសភាសរុបទាំងអស់ចំនួន ៣២៩ ក្នុងការពិភាក្សាពីការបណ្តេញទ័ពអាមេរិចចេញ។
សូមបញ្ជាក់ថា បច្ចុប្បន្នអាមេរិចមានទ័ពចំនួន ៥.២០០នាក់កំពុងឈរជើងនៅមូលដ្ឋានទូទាំងប្រទេសអ៊ីរ៉ាក់ ដើម្បីគាំទ្រដល់ទ័ពមូលដ្ឋានរបស់អ៊ីរ៉ាក់ ក្នុងការទប់ស្កាត់ការអ៊ុកឡុករបស់ក្រុមរដ្ឋអ៊ីស្លាម៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
