ភ្នំពេញ៖ នគរបាលនាយកដ្ឋានព្រហ្មទណ្ឌ នៃក្រសួងមហាផ្ទៃ បានបញ្ជូនមន្ត្រីនគរបាលម្នាក់ នៃមន្ទីរប្រឆាំងគ្រឿងញៀន ទៅតុលាការក្រុងភ្នំពេញ ករណីជំរិតទារបា្រក់ ពីអ្នកប្រើប្រាស់គ្រឿងញៀន នៅចំណុចរោងចញ្ចឹមមាន់មួយកន្លែង ស្ថិតក្នុងខណ្ឌពោធិ៍សែនជ័យ នៅព្រឹកថ្ងៃទី៦ ខែមករា ឆ្នាំ២០២០នេះ។
លោក រៀល សុភិន ព្រះរាជអាជ្ញរងអមសាលាដំបូងរាជធានីភ្នំពេញ ជាអ្នកកាន់សំណុំរឿងនេះ ដោយជនសង្ស័យមានឈ្មោះ លោក ភិន រតនៈ អាយុ៣៧ឆ្នាំ ត្រូវបានសមត្ថកិច្ចឃាត់ខ្លួនតាមបណ្តឹងរបស់ជនរងគ្រោះលោក អ៊ុ រិទ្ធី អាយុ៣៦ឆ្នាំ រស់នៅភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
សូមបញ្ជាក់ថា កាលពីរសៀលថ្ងៃទី១៧ ខែធ្នូ ឆ្នាំ២០១៩កន្លងទៅ ជនសង្ស័យឈ្មោះ ភិន រតនៈ និងមន្ត្រីនគរបាលមន្ទីរប្រឆាំងគ្រឿងញៀន ៣នាក់ទៀត ជិះរថយន្តម៉ាក អាល់ហ្វាត និងបក្ខពួក ២នាក់ (ស្រីម្នាក់) ជិះម៉ូតូណៃហត ទៅឈប់នៅមុខផ្ទះរបស់ជនរងគ្រោះ មានអាសយដ្ឋានខាងលើ។ បន្ទាប់មកជនសង្ស័យឈ្មោះ ភិន រតនៈ បានដកអាវុធខ្លី បាញ់ឡើងលើមួយគ្រាប់ និងបញ្ជាឲ្យកូនចៅទៅយកលុយពីជនរងគ្រោះលុយចំនួន ៣២០០ដុល្លារ និង លុយខ្មែរចំនួន ២៨ម៉ឺនរៀល និងទូរស័ព្ទដៃចំនួន ០១គ្រឿង។
ក្រោយពេលកើតហេតុ ជនរងគ្រោះបានទៅដាក់ពាក្យប្តឹងក្រុមជនសង្ស័យ នៅប៉ុស្តិ៍នគរបាលរដ្ឋបាលសំរោងក្រោម ទើបឈានដល់មានការឃាត់ខ្លួន ជនសង្ស័យយកទៅផ្តន្ទាទោសតាមច្បាប់៕ដោយ៖បញ្ញាស័ក្តិ
