ភ្នំពេញ៖ អភិបាលនៃគណៈអភិបាលរាជធានីភ្នំពេញ លោកឃួង ស្រេង បានអំពាវនាវឲ្យប្រជាពលរដ្ឋទាំងអស់ ដែលរស់នៅក្នុងរាជធានីភ្នំពេញ ត្រូវយកចិត្តទុកដាក់និងប្រុងប្រយ័ត្នខ្ពស់ចំពោះអគ្គិភ័យ។
ការអំពាវនាវបែបនេះ របស់លោកឃួង ស្រេង បានធ្វើឡើង កាលពីល្ងាចថ្ងៃទី៦ ខែមករា ឆ្នាំ២០២០ ក្នុងឱកាសអញ្ជើញ ចុះចែកអំណោយជូនប្រជាពលរដ្ឋរងគ្រោះ ដោយអគ្គិភ័យចំនួន១៧៥ គ្រួសារនៅភូមិបាក់ទូក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។
លោកឃួង ស្រេងបានមានប្រសាសន៍បញ្ជាក់ថា គ្រោះអគ្គិភ័យ គឺជាគ្រោះមហន្តរាយដ៏ធំមួយ ដែលបងប្អូនប្រជាពលរដ្ឋទាំងអស់ ត្រូវតែបង្ការទុកជាមុន ដើម្បីកុំឲ្យហេតុការណ៍នេះកើតឡើង។ លោកបញ្ជាក់បន្ថែមថា អ្នកដែលបង្កបង្កើតឲ្យមានអគ្គិភ័យ បើតាមផ្លូវច្បាប់ត្រូវមានទោសទណ្ឌថែមទៀត ដែលប្រជាពលរដ្ឋទាំងអស់ត្រូវតែយល់ដឹងពីបញ្ហានេះ ដោយត្រូវប្រុងប្រយ័ត្នខ្ពស់និងបង្ការទប់ស្កាត់ ឲ្យបានចំពោះគ្រោះអាក្រក់ដែលផ្ដើមឡើងពីអគ្គិភ័យនេះ។
លោកឃួង ស្រេង បានមានប្រសាសន៍បន្តទៀតថា
សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែនប្រធានកាកបាទក្រហមកម្ពុជា ក្រោយពីទទួលបាននូវព័ត៌មានដ៏អាក្រក់នេះ បានណែនាំជាបន្ទាន់មកសាខាកាកបាទក្រហមរាជធានីភ្នំពេញ ដើម្បីនាំយកអំណោយមកចែកជូនប្រជាពលរដ្ឋភ្លាមៗ គឺចែកឲ្យបានមុនពេលថ្ងៃលិចនាថ្ងៃទី៦ខែមករានេះ។ នៅពេលទទួលបាន ការណែនាំនេះភ្លាមសាខាកាកបាទក្រហមរាជធានីភ្នំពេញ ក៏បានចុះមកសួរសុខទុក្ខ និងផ្តល់អំណោយជូនប្រជាពលរដ្ឋទាំង១៧៥គ្រួសារភ្លាមៗតែម្ដង។ បន្ថែមពីលើនេះទៀតលោកឃួង ស្រេង ក៏បានស្នើដល់អាជ្ញាធរខណ្ឌសង្កាត់ ត្រូវបន្តមើលការថែទាំប្រជាពលរដ្ឋរងគ្រោះទាំងនេះ បើពួកគាត់មានបញ្ហាអ្វី ត្រូវតែចុះមកជួយគាត់ភ្លាម។
ប្រជាពលរដ្ឋរងគ្រោះដោយអគ្គិភ័យទាំង ១៧៥ គ្រួសារនេះ បានទទួលអំណោយពីសាខាកាកបាទក្រហមកម្ពុជារាជធានីភ្នំពេញ ដោយក្នុងមួយគ្រួសារទទួលបាន ១- តង់កៅស៊ូ ចំនួន ១ (ទំហំ ៤មx៦ម) ។២- អង្ករ ចំនួន ៣០គីឡូក្រាម។ ៣- មីជាតិ ចំនួន ១កេសតូច ។ ៥- ទឹកបរិសុទ្ធ ចំនួន ១កេស។ ៥- ទឹកត្រី ចំនួន ១យូរ(៦ដប) ។ ៦- ទឹកស៊ីអីវ ចំនួន ១យូរ(៦ដប) ។ ៧- ទឹកក្រច ចំនួន ១យួរ (៤កំប៉ុង)។៨- ស្ករស ចំនួន ១ គីឡូក្រាម។ ៩- ទឹកដោះគោ ចំនួន ២ កំប៉ុង។ ១០- តែ ចំនួន ៥ កញ្ចប់ ន៨ង១១- ថវិកាចំនួន ៥០.០០០៛។
គួររំលឹកថា កាលពីវេលាម៉ោង១ រំលងអធ្រាត្រឈានចូលថ្ងៃទី៦ ខែមករា ឆ្នាំ២០២០ នៅតាមបណ្តោយផ្លូវរថភ្លើង ក្នុងភូមិបាក់ទូក សង្កាត់ទួលសង្កែ១ ខណ្ឌឫស្សីកែវ មានអគ្គិភ័យមួយបានកើតឡើងដោយបំផ្លាញផ្ទះប្រជាពលរដ្ឋអស់ចំនួន១៥ខ្នងផ្ទះ ស្មើនឹង១៧៥គ្រួសារ (មានបន្ទប់ជួលច្រើន) តែគ្រោះ អគ្គិភ័យនេះមិន បណ្តាលឲ្យមានមនុស្សរងរបួសឬស្លាប់
នោះទេ ពោលគឺបានទទួលរងការខូចខាតទ្រព្យសម្បត្តិនិងផ្ទះទាំងស្រុង។ ចំពោះ មូលហេតុនៃការឆាបឆេះ បើតាមសមត្ថកិច្ចបានបញ្ជាក់ថា បណ្តាលមកពីការឆ្លងចរន្តអគ្គិសនី ហើយក្នុងហេតុការណ៍នេះ មានរថយន្តពន្លត់អគ្គិភ័យមកជួយពន្លត់ចំនួន៤១គ្រឿង និងប្រើប្រាស់អស់ទឹក៤១ឡាន ។ អគ្គិភ័យនេះបានរលត់ទៅវិញទាំងស្រុងនៅ៣និង១០យប់ថ្ងៃដដែល ៕ដោយ៖កូឡាប
