ភ្នំពេញ៖ នៅថ្ងៃទី៧ ខែមករា ឆ្នាំ២០២០ គឺទិវាជ័យជម្នះ ៧មករា លើកទី៤១ ជាតិ និងប្រជាជនកម្ពុជាទាំងមូល រៀបចំប្រារព្ធទិវាជ័យជម្នះនៅទូទាំងប្រទេស និងមានមិទ្ទីងធំ មានមនុស្សរាប់ម៉ឺននាក់ ចូលរួមអបអរសាទរនៅមជ្ឈមណ្ឌលកោះពេជ្រ ដើម្បីរំលឹកពីការរស់ឡើងវិញនៃជាតិកម្ពុជា និងការរស់រានមានជីវិតរបស់ប្រជាជនកម្ពុជា។
សម្តេចតេជោ នាយករដ្ឋមន្រ្តី បានថ្លែងសារលើហ្វេសប៊ុកផ្លូវការថា ថ្ងៃទី៧ ខែ មករា ឆ្នាំ ២០២០នេះ គឺជាខួប ៤១ឆ្នាំដែលប្រទេសកម្ពុជាត្រូវបានសង្រ្គោះ ចេញផុតពីរបបកម្ពុជាប្រជាធិបតេយ្យ ឬហៅថារបបប្រល័យពូជសាសន៍ខ្មែរក្រហម ដឹកនាំដោយ ប៉ុល ពត ដែលបានប្រែក្លាយកម្ពុជាទៅជាវាលពិឃាតដ៏ខ្មៅងងឹត ដែលមានរយៈពេល ៣ឆ្នាំ ៨ខែ និង ២០ថ្ងៃ ។
សម្តេចតេជោ ហ៊ុន សែន បានមានប្រសាសន៍ថា របបព្រៃផ្សៃនេះ គឺបានធ្វើអោយជីវិតមនុស្សរាប់លាននាក់ ត្រូវបានបាត់បង់ជីវិត ហើយប្រទេសជាតិវិនាសអន្តរាយយ៉ាងធ្ងន់ធ្ងរបំផុត។
កាលពី៤១ ឆ្នាំមុន ជាតិនិងប្រជាជនកម្ពុជាគ្រាន់តែជាមនុស្សនៅសល់តែដង្ហើមចង្រឹត រង់ចាំតែថ្ងៃស្លាប់មកដល់តែប៉ុណ្ណោះ។ ប៉ុន្តែ ៤១ឆ្នាំ ក្រោយពីបានរំដោះប្រទេសចេញផុតពីរបបឃោរឃៅព្រៃផ្សៃមួយនេះ កម្ពុជាបានប្រែក្លាយទៅជាប្រទេសមានមុខមាត់ថ្មី តាមរយៈការអភិវឌ្ឍន៍ រីកចម្រើន និងបានសាងកិត្យានុភាពលើឆាកអន្តរជាតិសារជាថ្មីផងដែរ។
ក្នុងខួបអនុស្សាវរីយ៍លើកទី៤១ នៃថ្ងៃជ័យជម្នះ ៧ មករា សូមឱ្យស្មារតីថ្ងៃរំដោះនេះស្ថិតនៅក្នុងក្រអៅបេះដូងមនុស្សគ្រប់រូបៗ និងសូមស្មារតី ៧ មករា ជានិមិត្តរូបនៃសាមគ្គីជាតិ និង មហាគ្រួសារខ្មែរស្ថិតនៅជាអមតៈក្រោមម្លប់សុខសន្តិភាពជានិច្ចនិរន្តរ៍។ អរគុណសន្តិភាព៕ ដោយ៖កូឡាប