ខេត្តព្រះសីហនុ៖ ប្រធានមន្ទីរសុខាភិបាល និងប្រធានមន្ទីរពេទ្យបង្អែកខេត្តព្រះសីហនុ ថ្លែងអំណរគុណ ចំពោះសប្បុរសជនខ្មែរមួយគ្រួសារ រស់នៅក្នុងក្រុងព្រះសីហនុ ដែលបាននាំយករថយន្តសម្រាប់សង្គ្រោះដឹកអ្នកជំងឺមួយគ្រឿង យកមកប្រគល់ជូនមន្ទីរពេទ្យបង្អែកខេត្តព្រះសីហនុ នៅថ្ងៃទី៧ ខែមករាឆ្នាំ២០២០នេះ។
ទាក់ទិនបញ្ហានេះ គណនីហ្វែសប៊ុកឈ្មោះ Hang Sophat បានបង្ហោះសារ នៅព្រឹកថ្ងៃទី៧ ខែមករា ឆ្នាំ២០២០នេះថា “គ្រួសារខ្ញុំ បានឧបត្ថម្ភរថយន្តពេទ្យមួយគ្រឿង ជូនដល់មន្ទីរពេទ្យបង្អែកខេត្តព្រះសីហនុ”។
លោក Hang Sophat បន្តថា “ការបរិច្ចាគ នូវថវិកាបន្តិចបន្ទួច ដើម្បីធ្វើបុណ្យ នាំឲ្យគ្រួសារ របស់គាត់ មានភាពសប្បាយរីករាយ និងមានសុភមង្គលថែមទៀតផង..”។
តាមពិតទៅ, ម្ចាស់គណនីហ្វែសប៊ុកឈ្មោះ Hang Sophat គឺជាកូនប្រសា ស្ថិតក្នុងគ្រួសារ របស់ លោក អ៊ុក ស៊ុក និង លោកស្រី សំ ហួច មានប្រកបមុខរបរ និងមានលំនៅដ្ឋានរស់នៅក្នុងក្រុង-ខេត្តព្រះសីហនុ។
ត្រង់ចំណុចនេះ លោកវេជ្ជបណ្ឌិត សេង ណុង ប្រធានមន្ទីរពេទ្យបង្អែកខេត្តព្រះសីហនុ បានកោតសរសើរ និងថ្លែងអំណរគុណជាពិសេសដល់ក្រុមគ្រួសារ លោក អ៊ុក ស៊ុក និង លោកស្រី សំ ហួច ព្រមទាំងក្រុមគ្រួសារ ដែលបានផ្តល់រថយន្តសង្គ្រោះចំនួន១គ្រឿង ផលិតឆ្នាំ២០០៨ និង ថវិកា១ពាន់ដុល្លារសហរដ្ឋអាមេរិក ជូនដល់មន្ទីរពេទ្យបង្អែកខេត្តព្រះសីហនុ ព្រមទាំងអញ្ជើញក្រុមគ្រូពេទ្យ នៃមន្ទីរពេទ្យបង្អែក ចូលរួមពិសាអាហារមួយពេល នៅគេហដ្ឋាន របស់លោកផ្ទាល់ នៅល្ងាចថ្ងៃទី៧ ខែមករា ឆ្នាំ២០២០នេះ។
សូមបញ្ជាក់ថា លោក អ៊ុក ស៊ុក នាពេលកន្លងមក ក៏ធ្លាប់មកទទួលសេវាសង្គ្រោះបន្ទាន់ នៅមន្ទីរពេទ្យបង្អែកខេត្តព្រះសីហនុផងដែរ រហូតទទួលបានការព្យាបាលជាបន្តបន្ទាប់ ហើយពេលនេះ រូបលោក មានសុខភាពល្អប្រសើរឡើងវិញហើយ៕ ដោយ៖ ដែន សីមា