ភ្នំពេញ៖ នៅល្ងាចថ្ងៃទី៧ ខែមករា ឆ្នាំ២០២០ នេះសមាជិកសភាមកពីគណបក្សសង្គមប្រជាធិបតេយ្យស៊ុយអែដ (Swedish Social Democratic Party) បានអញ្ជេីញមកជួបសំណេះសំណាល និងសួរសុខទុក្ខលោក កឹម សុខា នៅគេហដ្ឋានរបស់លោក។
លោកមុត ចន្ថា ជំនួយការលោកកឹមសុខា បានថ្លែងថា លោកប្រធាន កឹម សុខា បានទទួលជួបលោកជំទាវ Asa Erikkson សមាជិកសភានៃគណបក្សសង្គមប្រជាធិបតេយ្យដែលជាគណបក្សកាន់អំណាចធំជាងគេនៅរាជាចក្រស៊ុយអែដ និងឯកឧត្តម Jan Axel Nordlander ប្រធានសមាគម Cambodia Initiative មានមូលដ្ឋាននៅស៊ុយអែដ និងជាអតីតឯកអគ្គរាជទូតប្រចាំរាជាណាចក្រថៃ និងឯកអគ្គរាជរដ្ឋទូតទទួលបន្ទុកសិទ្ធិមនុស្ស។ នេះគឺជាការជួបសម្តែងការគួរសម សួរសុខទុក្ខ និងសំណេះសំណាល។
លោក កឹម សុខា ធ្លាប់ត្រូវបានរាជរដ្ឋាភិបាលស៊ុយអែដអញ្ជើញទៅធ្វើទស្សនកិច្ច នៅប្រទេសស៊ុយអែដ នៅឆ្នាំ១៩៩៤ ក្នុងនាមលោកជាសមាជិកសភា និងជាប្រធានគណៈកម្មការសិទ្ធិមនុស្សរបស់រដ្ឋសភា ដើម្បីសិក្សាស្រាវជ្រាវអំពីការអនុវត្តសិទ្ធិមនុស្ស និងលទ្ធិប្រជាធិបតេយ្យ។ គណៈប្រតិភូបានទទួលស្គាល់វិភាគទានដែលឯកឧត្តម កឹម សុខា បានធ្វើលើវិស័យសិទ្ធិមនុស្ស និងលទ្ធិប្រជាធិបតេយ្យ នៅកម្ពុជា។
លោកស្រី Asa Erikkson បានបញ្ជាក់ថាស្ថានឯកអគ្គរដ្ឋទូតស៊ុយអែដ ប្រចាំព្រះរាជាណាចក្រកម្ពុជា នឹងតាមដានសវនារបស់លោកប្រធាន កឹម សុខា នៅថ្ងៃទី១៥ ខែមករា ឆ្នាំ២០២០ ខាងមុខ។
លោកកឹម សុខា បន្តកិច្ចខិតខំប្រឹងប្រែងក្នុងការពង្រឹងនិងពង្រីកទំនាក់ទំនងល្អជាមួយបណ្តាប្រទេសនានា ដើម្បីបំម្រើ ការពារ កសាង នូវអ្វីដែលជាផលប្រយោជន៍របស់ប្រទេសនិងប្រជាពលរដ្ឋខ្មែរទាំងអស់គ្នា៕ ដោយ៖កូឡាប
