ភ្នំពេញ៖ អធិការដ្ឋាននគរបាលខណ្ឌមានជ័យ បានរាយការណ៍ករណីអំពើលួច មានស្ថានទម្ងន់ទោសដោយការកាប់គាស់ទម្លុះទម្លាយ (គាស់សោទ្វារផ្ទះយកម៉ូតូ) កាលពីប្រមាណ៣ខែមុន ។ ជនសង្ស័យម្នាក់ ឈ្មោះ បូ ដារ៉ូ ត្រូវបានឃាត់ខ្លួន នៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី។
សូមបញ្ជាក់ថា ករណីនេះ កើតហេតុនៅថ្ងៃទី១១ ខែតុលា ឆ្នាំ២០១៩ វេលាម៉ោង២៣និង៤១នាទី នៅចំណុចផ្ទះគ្មានលេខ ផ្លូវលេខ៣៧១ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
ជនសង្ស័យឈ្មោះ បូ ដារ៉ូ ភេទប្រុស អាយុ ១៨ ឆ្នាំ ជនជាតិ ខ្មែរ ទីលំនៅផ្ទះគ្មានលេខ ផ្លូវលំ ភូមិ ព្រែកតាគង់ សង្កាត់ ចាក់អង្រែលើ ខណ្ឌមានជ័យ រាជធានីភ្នំពេញ មុខរបរមិនពិតប្រាកដ (ឃាត់ខ្លួនមានផ្ទុកសារធាតុញៀន) ។
ជនរងគ្រោះឈ្មោះ ទូច ទី ភេទ ស្រី អាយុ ៣៧ ឆ្នាំ ជនជាតិ ខ្មែរ ទីលំនៅផ្ទះលេខ៨៩អឺ១,២ ផ្លូវបេតុង ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរ ។ សម្ភារៈបាត់បង់ ៖ ម៉ូតូ០១គ្រឿងម៉ាកស្គូបពី ពណ៌ស ស៊េរី២០១៥ ពាក់ផ្លាកលេខ ភ្នំពេញ 1FP 5621 ។
នគរបាល បញ្ជាក់ពីហេតុការណ៍នេះថា កាលពីថ្ងៃទី ១១ ខែ តុលា ឆ្នាំ ២០១៩ វេលាម៉ោង ២៣និង០០នាទី ជនរងគ្រោះឈ្មោះ ទូច ទី បានយកម៉ូតូមួយគ្រឿងម៉ាក ស្តុបពី ពណ៌ ស ស៊េរីឆ្នាំ ២០១៥ ពាក់ផ្លាកលេខ ភ្នំពេញ ១FP-៥៦២១ មកទុកនៅចំណុចផ្ទះជួលគ្មានលេខ ផ្លូវ ៣៧១ ភូមិ ព្រែកតាគង់១ សង្កាត់ ចាក់អង្រែលើ ខណ្ឌមានជ័យ រាជធានីភ្នំពេញ (កន្លែងកើតហេតុ) ដោយបានដោតសោម៉ូតូនៅជាប់នឹងកុងតាក់ម៉ូតូ រួចបានចាក់សោទ្វារផ្ទះខាងលើ ហើយទៅសម្រាកនៅផ្ទះមួយផ្សេងទៀត នៅជិតកន្លែងកើតហេតុ ពេលសម្រាកបានមួយសន្ទុះ ជនរងគ្រោះបានបើកមើលកាមេរ៉ាសុវត្ថិភាព តាមទូរស័ព្ទដៃ ស្រាប់តែបាត់ម៉ូតូរបស់ខ្លួន ពេលនោះជនរងគ្រោះ បានមកដាក់ពាក្យបណ្តឹង នៅប៉ុស្តិ៍នគរបាលចាក់អង្រែលើ តែម្តង ភ្លាមៗនោះ សមត្ថកិច្ចយើង បានចុះទៅដល់កន្លែងកើតហេតុខាងលើ ឆែកមើលកាមេរ៉ាសុវត្ថិភាព ឃើញជនសង្ស័យឈ្មោះ បូ ដារ៉ា ធ្វើសកម្មភាព លួចយកម៉ូតូម៉ាកស្តុបពី ពណ៌ ស ស៊េរីឆ្នាំ ២០១៥ ពាក់ផ្លាកលេខ ភ្នំពេញ ១FP-៥៦២១ ជិះគេចខ្លួនបាត់ទៅ លុះមកដល់ថ្ងៃទី ០៦ ខែមករា ឆ្នាំ ២០២០ វេលាម៉ោង២១និង៣០នាទី កម្លាំងសមត្ថកិច្ចប៉ុស្តិ៍នគរបាលចាក់អង្រែលើ បានធ្វើការស្រាវជ្រាវឃាត់ខ្លួនជនសង្ស័យខាងលើ នៅចំណុចផ្លូវលំ ភូមិព្រែកតាគង់១ សង្កាត់ចាក់អង្រែលើ យកមកធ្វើការសាកសួរ នៅទីស្នាក់ការប៉ុស្តិ៍នគរបាលចាក់អង្រែលើ តែម្តង ។
បច្ចុប្បន្ន ជនសង្ស័យឈ្មោះ បូ ដារ៉ូ ត្រូវបានឃាត់ខ្លួននៅ អធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ៕ដោយ៖បញ្ញាស័ក្តិ
