ភ្នំពេញ ៖ នៅព្រឹកថ្ងៃទី៨ ខែមករា ឆ្នាំ២០២០ ប្រជាពលរដ្ឋមកពីខេត្ត ត្បូងឃ្មុំនិង ខេត្តស្វាយរៀង មានចំនួនប្រហែល ១០០នាក់ បាននាំគ្នាទៅដាក់ញត្តិ នៅក្រសួងយុត្តិធម៌ ក្រសួងកសិកម្មរុក្ខាប្រម៉ាញ់និងនេសាទ និង ក្រសួងមហាផ្ទៃ ដើម្បីតវ៉ាទាមទារឲ្យក្រសួង រកយុត្តិធម៌ ដោះលែង តំណាងសហគមន៍ ពីររូប គឺ លោក សែម សាង នឹងលោក ផុន ឈឿន ដែលត្រូវសម្ថកិច្ចចាប់ខ្លួនប៉ុន្មានខែមុន ដោយមិនមិនមានដីកាចាប់ខ្លួនឡើយ ហើយនឹងទម្លាក់ចោលការចោទប្រកាន់ មកលើសកម្មជនដីធ្លី ប្រជាពលរដ្ឋស្នើឲ្យក្រសួង កសិកម្មរុក្ខាប្រម៉ាញ់ និងនេសាទ និង ក្រសួងមហាផ្ទៃ ជួយដោះស្រាយបញ្ហាដីធ្លី ជូនពួកគាត់ឲ្យបានឆាប់រហ័ស ។
សូមបញ្ជាក់ថា សាលាឧទ្ធរណ៍បានបដិសេធសំណើសុំនៅក្រៅឃុំ ចំពោះតំណាងសហគមន៍នៅខេត្តត្បូងឃ្មុំ លោក ផុន ឈឿន នៅរាជធានីភ្នំពេញ នារសៀលថ្ងៃទី៦មករានេះ។ កាលពីខែតុលា ឆ្នាំ២០១៩ លោក ឈឿន ត្រូវបានចាប់ខ្លួន រួមគ្នាជាមួយតំណាងសហគមន៍ម្នាក់ទៀតគឺលោក សែម សាង និងត្រូវប្រឈមនឹងបទចោទជាច្រើន ពាក់ព័ន្ធនឹងជម្លោះដីធ្លីមួយរវាង ក្រុមហ៊ុនចិនចំការកៅស៊ូ ហាម៉ឹនី វីន អ៊ិនវេសមេន និងសហគមន៍មួយចំនួននៅស្រុកតំបែរ ខេត្តត្បូងឃ្មុំ។
កាលពីខែតុលា អ្នកភូមិនៅស្រុកតំបែរ បានដើរហែរក្បួនដើម្បីតវ៉ាប្រឆាំងនឹងការចាប់ខ្លួនលើអ្នកទាំងពីរ និងត្រូវបានហាមឃាត់ដោយកងកម្លាំងសន្ដិសុខ ក្នុងការឃ្លាំមើលសវនាការដំបូងដែលដំណើរការនៅសាលាដំបូងខេត្តត្បូងឃ្មុំ។ អ្នកទាំងនោះក៏ត្រូវបានរារាំងមិនឱ្យឃ្លាំមើលករណីរដ្ឋប្បវេណី ដែលប្ដឹងដោយក្រុមហ៊ុន ហាម៉ឹនី វីន អ៊ិនវេសមេន ក្នុងការស្នើសុំតុលាការដើម្បីកុំឱ្យអ្នកភូមិអាចចូលទៅកាន់ដីព្រៃនោះបាន។
ប្រជាពលរដ្ឋប្រមាណជាង៦០០គ្រួសារ ដែលពឹងផ្អែកលើដីសម្រាប់លំនៅដ្ឋាន និងធ្វើស្រែចំការ ត្រូវបានរងគ្រោះដោយជម្លោះដីធ្លី ដែលកើតមានឡើងតាំងពីឆ្នាំ២០១២នេះ។ កាលពីខែមុនថ្មីៗនេះ តំណាងក្រុមហ៊ុន ហាម៉ឹនី វីន អ៊ិនវេសមេន បាននាំគ្រឿងចក្រជាច្រើនគ្រឿងមកឈូសឆាយដីដែលមានទំនាស់នេះ ដោយមានវត្តមានទាហាន និងនគរបាលប្រហែល៣០នាក់មកជាមួយផងដែរ។ អ្នកភូមិនៅតែបន្តអំពាវនាវស្នើសុំឱ្យអាជ្ញាធរថ្នាក់ជាតិ និងក្រោមជាតិ ឱ្យជួយដោះស្រាយបញ្ហាជម្លោះដីធ្លីនេះ៕ដោយ៖កូឡាប