ភ្នំពេញ៖ ប្រជាពលរដ្ឋមួយដែលបានឃើញហេតុការណ៍ បាននិយាយសរសើរចំពោះសន្តិសុខខណ្ឌដូនពេញ ដែលសកម្មនឹងការងារ បើទោះបីជាម៉ោង១២យប់ទៅហើយ នៅតែមកឆ្លៀតរៀបចំសណ្តាប់ធ្នាប់ទៀត។ ប៉ុន្តែករណីនេះ បានទទួលត្រឡប់មកវិញ នូវការរិះគន់យ៉ាងចាស់ដៃ ពីអ្នកលក់ដូរ ថា កម្លាំងគណៈបញ្ជាការឯកភាពខណ្ឌដូនពេញ២នាក់ ដែលសកម្មការងារជ្រុលពេក យកមុខយកមាត់ បានចុះមកធ្វើការដេញអ្នកលក់ដូរមីឆា ទឹកសុទ្ធ តាមរទេះមុខផ្សាររាត្រី ទាំងខ្លួនស្រវឹងស្រាជោកជាំ និយាយស្តាប់គ្នាមិនបាន និងបានទាក់សំដីគ្នារវាងអ្នកលក់ដូរ ជាមួយនឹងកម្លាំងគណៈបញ្ជាការឯកភាពខណ្ឌដូនពេញ ។
ហេតុការណ៍ភ្ញាក្អ់ផ្អើលនេះ បានកើតឡើងកាលវេលាម៉ោង១១និង៥០នាទីយប់ថ្ងៃទី៧ ខែមករា ឆ្នាំ២០២០ ស្ថិតតាមបណ្ដោយផ្លូវព្រះស៊ីសុវត្ថិ ត្រង់ចំណុចមុខផ្សាររាត្រី ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។
យោងតាមប្រភពពីប្រជាពលរដ្ឋ បានបន្ថែមទៀតថា ស្ទើរាល់ថ្ងៃ គេស្កេតឃើញបុគ្គល២នាក់ខាងលើ ឲ្យតែស្រវឹង គេតែងតែមកដល់មុខផ្សាររាត្រី និងធ្វើការដេញអ្នកលក់ដូរតាមរទេះលើផ្លូវ និងលើការ៉ូឡា (លើសួន) ជាដើម តែការដេញនេះ ហាក់ដូចជានិយមបក្ខពួកពេក ដោយដេញរទេះខ្លះ រទេះខ្លះទៀតគ្នាគេគេមិនដេញឡើយ ។
ជាក់ស្ដែងនៅយប់ថ្ងៃទី៧ វេលាម៉ោងជិត១២ទៅហើយ ឃើញបុគ្គល២នាក់ខាងលើមកដេញពួកគាត់ទៀត ដោយក្នុងស្ថានភាពស្រវឹង និឈ្លោះប្រកែកគ្នាផ្អើលទាំងកណ្ដាលអធ្រាត្រ មិនដឹងថាការងាររដ្ឋបាល ពួកគាត់ធ្វើពីម៉ោងណា ដល់ម៉ោងណា ឲ្យច្បាស់លាស់នោះទេ ចំណែកអ្នកលក់ដូរនៅមុខផ្សាររាត្រី បានសូមសំណូមពរថា តើឲ្យពួកគាត់ចូលលក់ដូរនៅម៉ោងណា ហើបើដេញត្រូវដេញទាំងអស់គ្នា មិនត្រូវនិយមបក្ខពួកឡើយ។
ក្រោយពេលកើតហេតុ សមត្ថកិច្ចប៉ុស្តិ៍វត្តភ្នំ បានចុះមកដល់ទីតាំងកើតហេតុ បានឲ្យភាគីទាំងចរចាគ្នា និងសម្របសម្រួលគ្នា ដើម្បីបញ្ចប់វិវាទរវាងអ្នកលក់ និងកម្លាំងសន្តិសុខខណ្ឌ៕ ដោយ៖បញ្ញាស័ក្តិ
