ប្រធានាធិបតីអាមេរិច ដូណាល់ ត្រាំ បានដកខ្លួនចេញពីមាត់ជ្រោះនៃសង្រ្គាមជាមួយនឹងអ៊ីរ៉ងនៅថ្ងៃពុធ ដោយលោកលើកឡើងថា ក្រុងតេហេរ៉ងទំនងជាដកខ្លួន ចេញក្រោយធ្វើការបាញ់មីស៊ីលជាច្រើនគ្រាប់ ទៅលើមូលដ្ឋានទ័ពអាមេរិច នៅប្រទេសអ៊ីរ៉ាក់។
នៅក្នុងការថ្លែងសន្ទរកថា តាមទូរទស្សន៍ទៅកាន់ប្រជាជាតិ លោកត្រាំ បានសង្កត់ធ្ងន់ថា មិនមានជនជាតិអាមេរិចណាម្នាក់រងរបួសឡើយ នៅក្នុងការវាយប្រហារដោយមីស៊ីល ទៅលើមូលដ្ឋានទ័ពទាំងពីរ។
លោកថ្លែងថា “មិនមានជនជាតិអាមេរិចណាម្នាក់ រងរបួសឡើយ ក្នុងការវាយប្រហារកាលពីយប់មិញ ដោយរបបអ៊ីរ៉ង”។
“អ៊ីរ៉ងទំនងជាដកខ្លួនចេញ ដែលវាល្អសម្រាប់គ្រប់ភាគីទាំងអស់ និងល្អសម្រាប់ពិភពលោក”។
ជាមួយគ្នានេះដែរ លោកបានប្តេជ្ញាចិត្តថា នឹងធ្វើការដាក់ទណ្ឌកម្មសេដ្ឋកិច្ចថ្មីទៀត ទៅលើអ៊ីរ៉ង។
សូមបញ្ជាក់ថា ស្ថានភាពនៅមជ្ឈិមបូព៌ាបានឡើងកម្តៅខ្លាំង ក្រោយពេលអាមេរិចបានប្រើដ្រូនសម្លាប់ មេបញ្ជាការកំពូលរបស់អ៊ីរ៉ងឈ្មោះ Soleimani កាលពីថ្ងៃសុក្រកន្លងទៅនេះ។
អាមេរិចបានចាត់ទុក Soleimani ជាមេភេរករ ដែលបានបង្វឹកភេរវករជាច្រើន និងមានការគំរាមកំហែងដល់សន្តិសុខអាមេរិច៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
