តាកែវ៖ ការអនុវត្តច្បាប់ក្នុងអង្គភាពត្រូវបានរៀបចំពង្រឹងឡើងវិញបន្ថែមទៀត ក្នុងដើមឆ្នាំថ្មី ២០២០ ដើម្បីកែលម្អដល់មន្ត្រីនគរបាលចំណុះឲ្យស្នងការដ្ឋាននគរបាលខេត្តតាកែវ ឲ្យកាន់តែមានសណ្តាប់ធ្នាប់ និងរបៀបរៀបរយល្អ ។ ការពង្រឹងវិន័យនេះដែរ គឺត្រូវបានលើកឡើងដោយលោកវរសេនីយ៍ឯក ឈឹង រតនៈ ស្នងការរងទទួលផែនធនធានមនុស្ស ក្នុងកិច្ចប្រជុំជាមួយតំណាងការិយាល័យទាំង ៣២ និងអធិការគ្រប់ស្រុកក្រុងទាំង១០ ដែលកន្លងមកក្នុងឆ្នាំ២០១៩ មានមន្ត្រីនគរបាលជាង ៨០រូបហើយបានជាប់វិន័យ និងត្រូវបានអនុវត្តទៅតាមវិន័យរបស់អង្គភាព លេខ ០០៦ ដូច្នេះ កងកំលាំងនគរបាលទាំងអស់ ត្រូវរៀបចំខ្លួនឯងឲ្យបានល្អប្រសើរឡើងវិញ ជាពិសេសគោរពវិន័យរបស់អង្គភាព និងត្រូវមានក្រមសីលធម៌នូវក្នុងខ្លួន ជៀសវាងការជាប់ពិន័យ ដែលធ្វើមានផលវិបាកដល់បងប្អូនទាំងអស់គ្នា ដែលជាកងកម្លាំងនគរបាល ។
ទន្ទឹមនិងមានការពិន័យទៅលើកងកម្លាំងនគរបាលនេះដែរ លោកស្នងការរងបាន សំណូមពរឲ្យគ្រប់អធិការស្រុក និងការិយាល័យចំណុះឲ្យស្នងការដ្ឋានទាំងអស់ត្រូវ តែត្រួតពិនិត្យ និងធ្វើការអប់រំជាប្រចាំទៅ លើការកែតម្រូវនៅចំណុចអវិជ្ជមាននេះឡើងវិញ និងត្រូវប្រតិបត្តិឲ្យបានចំពោះវិន័យរបស់អង្គភាព មិនតែប៉ុណ្ណោះរាល់ម៉ោងរដ្ឋបាល កងកម្លាំងនគរបាលត្រូវតែមានឯកសណ្ឋាន ជានគរបាលយុត្តិធម៌ ឲ្យបានសមរម្យនិងត្រឹមត្រូវទៅតាមជំនាញ ឬការិយាល័យរបស់ខ្លួន អ្វីដែលសំខាន់កងកម្លាំងនគរបាលចាប់ពីពេលនេះតទៅ នគរបាលចំណុះឲ្យស្នងការនគរបាលខេត្តតាកែវ ត្រូវតែមានក្រមសីលធម៌ខ្ពស់។
សូមបញ្ជាក់ផងដែរថា ចំពោះមន្ត្រីនគរបាលដែលជាប់ពិន័យ និងមានកំហុសឆ្គងនោះ ត្រូវបាន ធ្វើការអប់រំណែនាំធ្វើកិច្ចសន្យាចំពោះមុខរួចអស់ហើយ ៕ដោយ៖ តាកែវ