សហរដ្ឋអាមេរិចបានថ្លែងប្រាប់ អង្គការសហប្រជាជាតិនៅថ្ងៃពុធថា ការសម្លាប់មេបញ្ជាការអ៊ីរ៉ងលោក Qasem Soleimani កាលពីសប្តាហ៍មុន គឺជាការការពារខ្លួន ហើយអាមេរិចប្តេជ្ញាចាត់វិធានការចាំបាច់បន្ថែមទៀត នៅមជ្ឈិមបូព៌ា ដើម្បីការពារបុគ្គលិក និងផលប្រយោជន៍របស់ខ្លួន។
នៅក្នុងលិខិតទៅកាន់ក្រុមប្រឹក្សាអង្គការសហប្រជាជាតិ ឯកអគ្គរដ្ឋទូតអាមេរិច អ្នកស្រី Kelly Craft បាននិយាយថា អាមេរិចក៏បានត្រៀមខ្លួនរួចរាល់ ដោយគ្មានលក្ខខណ្ឌ ជាមុនក្នុងការចរចាជាមួយអ៊ីរ៉ង ដោយមានគោលបំណងការពារកុំឲ្យមានមានគ្រោះថ្នាក់បន្ថែមទៀត ដល់សន្តិភាពអន្តរជាតិ និងសន្តិសុខ ឬការរំជើបរំជួលពីរបបអ៊ីរ៉ង។
សូមបញ្ជាក់ថា ប្រធានាធិបតីអាមេរិច ដូណាល់ ត្រាំ បានថ្លែងថា ការសម្រេចចិត្តសម្លាប់ Qasem Soleimani គឺផ្អែកទៅលើព័ត៌មានស៊ើបការណ៍ដែលបង្ហាញថា គាត់មានគម្រោងវាយប្រហារប្រឆាំង នឹងអាមេរិចនៅមជ្ឈិមបូព៌ា។
តែប៉ុន្មានថ្ងៃប៉ុណ្ណោះ ក្រោយការសម្លាប់របស់មេដឹកនាំយោកំពូលខ្លួន អ៊ីរ៉ងបានធ្វើការសងសឹក ដោយបានបាញ់មីស៊ីលស្រោចទៅលើមូលដ្ឋានទ័ព ២កន្លែងក្នុងប្រទេសអ៊ីរ៉ាក់ ដែលមានកងទ័ពអាមេរិច និងសម្ព័ន្ធមិត្តនៅទីនោះ។
ជុំវិញការវាយប្រហារនោះ ប្រធានាធិបតី ដូណាល់ ត្រាំ បាននិយាយថា មិនមានប្រជាជនអាមេរិចណាម្នាក់រងរបួសនោះឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia