មេដឹកនាំបជ្ឍឹមប្រទេសជាច្រើនបាននិយាយថា មីស៊ីលរបស់អ៊ីរ៉ង់ជាអ្នកធ្វើឲ្យ យន្តហោះអ៊ុយក្រែនធ្លាក់នៅក្បែររដ្ឋធានីតេហេរ៉ងកាលពីពេលថ្មីនេះ ដោយផ្អែកទៅលើភស្ថុតាង។
មេដឹកនាំប្រទេសកាណាដា និងអង់គ្លេស បានស្នើឲ្យមានការស៊ើបអង្កេតពេញលេញ និងម៉ត់ចត់ចំពោះករណីធ្លាក់យន្តហោះនោះ ដែលបណ្តាលឲ្យមនុស្សចំនួន ១៧៦នាក់ស្លាប់ទាំងអស់។
ចំណែកអ៊ីរ៉ងបានបដិសេធចំពោះករណីនោះ។
ការធ្លាក់យន្តហោះអ៊ុយក្រែនកើតឡើងតែប៉ុន្មានម៉ោងប៉ុណ្ណោះ ក្រោយពេលអ៊ីរ៉ងបានធ្វើការបាញ់មីស៊ីលស្រោចទៅលើមូលដ្ឋានទ័ពអាកាសរបស់អាមេរិច ក្នុងប្រទេសអ៊ីរ៉ាក់។
ប្រព័ន្ធផ្សព្វផ្សាយអាមេរិចបានធ្វើការប៉ាន់ស្មានថា ពេលវេលានៃការធ្លាក់យន្តហោះបង្ហាញថា យន្តហោះនោះប្រហែលជាត្រូវគេយល់ច្រឡំថាជាយន្តហោះរបស់អាមេរិច ខណៈដែលអ៊ីរ៉ងបានរៀបចំវាយប្រហារសងសឹកលើអាមេរិច។
សារពត៌មាន CBS បានដកស្រងប្រភពចារកម្មអាមេរិចដោយបានលើកឡើងថា ផ្កាយរណបចាប់បានរលកសំឡេងនៃការបាញ់មីស៊ីលជាច្រើន ព្រមទាំងសំឡេងផ្ទុះដែរ។
នៅពេលជាមួយគ្នានេះដែរ សារពត៌មាន Newsweek បានដកស្រង់ប្រភពពីមន្ទីរបញ្ចាកោណ និងមន្ត្រីចារកម្មអាមេរិច និងអ៊ីរ៉ាក់ថា ពួកគេជឿជាក់ថា ជើងយន្តហោះអ៊ុយក្រែនត្រូវបានបាញ់ដោយមីស៊ីល។
ចំណែកប្រធានាធិបតីអាមេរិច បាននិយាយកាលពីថ្ងៃព្រហស្បតិ៍ថា គាត់មានការសង្ស័យពីអ្វីដែលបានកើតឡើងចំពោះយន្តហោះនោះ។
សូមបញ្ជាក់ថា អ្វីដែលមេដឹកនាំមជ្ឍឹមប្រទេសមានការសង្ស័យ វាកើតឡើងស្របពេលដែលអ៊ីរ៉ងបដិសេធ មិនព្រមប្រគល់ប្រអប់ខ្មៅនៃយន្តហោះដែលធ្លាក់នោះទៅអោយក្រុមហ៊ុន Boeing ឬអាមេរិចឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC