ភ្នំពេញ៖ នៅព្រឹកថ្ងៃទី១០ខែមករាឆ្នាំ២០២០នេះ ប្រជាពលរដ្ឋកាត់សែស្រឡាយចិន ច្រើនសិបនាក់បានសម្រុកនាំគ្នា ទៅកាន់រមណីយដ្ឋានប្រវត្តិសាស្ត្រវត្តភ្នំ ដើម្បីធ្វើពិធីកាត់គ្រោះ ឬកាត់ឆុងតាមអបិយជំនឿរៀងខ្លួន។
តាមលោកតាអាចារ្យប្រចាំនៅប្រាសាទព្រះចៅលើកំពូលវត្តភ្នំ បានឲ្យដឹងថា មុនថ្ងៃចូលឆ្នាំចិនខាងមុខនេះ អ្នកដែលត្រូវឆុងឆ្នាំមានបួន គឺឆ្នាំជូត មមី ថោះ និង រកា។
បើតាមជំនឿតគ្នាតម្រូវឲ្យអ្នកដែលកើតឆ្នាំទាំង៤ខាងលើមកធ្វើពិធីកាត់ឆុង ដោយនាំយកមកជាមួយនូវវត្ថុ៣ប្រភេទ រួមមាន សាច់ជ្រូក៣ជាន់ ពងទា និងយាហ៊ឺ ដើម្បីមកដាក់ចូលក្នុងមាត់ទេវតាខ្លាស ដើម្បីឲ្យគ្រោះចង្រៃបានរលាយសាបសូន្យ នាំភាពសុខសប្បាយពេញមួយឆ្នាំ។
អ្នកជាប់សែស្រឡាយចិន បាននាំគ្នាទៅកាន់វិហារលោកតាព្រះចៅ ឬអ្នកតាព្រះចៅ នៅរមណីយដ្ឋានវត្តភ្នំ ដើម្បីកាត់ឆុងឆ្នាំ ហើយអ្នកខ្លះទៀតយកផ្កាភ្ញី នំចំណី មាន់ទា ជ្រូកខ្វៃ សែនលោកតាព្រះចៅ ក្នុងនោះមានទាំងជនជាតិវៀតណាម ពីប្រទេសវៀតណាមផងដែរ ។
អ្នកជាប់សែស្រឡាយចិន បានបញ្ជាក់ថា មិនថារដូវចូលឆ្នាំចិនទេ តែជារៀងរាល់ថ្ងៃ ពិសេសពេលព្រឹក គឺតែងតែមានអ្នកជាប់សែស្រឡាយចិនទៅបន់ស្រន់លោកតាព្រះចៅតាមជំនឿ រៀងៗខ្លួនយ៉ាងតិចណាស់ក្នុងមួយថ្ងៃជាច្រើននាក់ ។ ក្រៅពីនេះក៏មានជនជាតិអឺរ៉ុបទៅទស្សនា និងអុជធូបថ្វាយលោកតាព្រះចៅផងដែរ ។ ដោយឡែកនៅពេលចូលឆ្នាំម្តងៗ ជនជាតិចិននាំគ្នាទៅបន់ស្រន់ ក៏ដូចជាសែនជ្រូកខ្វៃ មាន់ទា នំចំណី ផ្កាភ្ញីរាប់រយនាក់នៅវិហារលោកតាព្រះចៅ ក្រោយពីរយៈពេលមួយឆ្នាំដែលគាត់រកស៊ីលក់ដូរចេះតែរីកចម្រើនតាមការបន់ស្រន់នៅវិហារលោកតាព្រះចៅ ។
ស្រ្តីម្នាក់ បាននិយាយថា ឆ្នាំនេះក្រុមគ្រួសារគាត់មានកូនចៅបីនាក់ ដែលឆុងឆ្នាំ បានទៅកាត់ឆុង ដោយសារតែមានអ្នកជាប់សែស្រឡាយចិន និងវៀតណាម បាននាំគ្នាសម្រុកចូលវិហារលោកតាព្រះចៅ ។ ដូច្នេះដើម្បីរំដោះគ្រោះចង្រៃ ក្រុមគ្រួសាររបស់អ្នកស្រីសម្រេចចិត្ត ឆ្លៀតនាំកូនចៅទៅសែនលាបំណន់ តាមការសន្យានាពេលកន្លងមក ហើយបានសុំបួងសួងដល់លោកតាព្រះចៅសុំឲ្យរកស៊ីមានបាននៅឆ្នាំនេះ។
តាមប្រវត្តិនៅឆ្នាំ១៣៧២ ដូនចាស់ម្នាក់ឈ្មោះ ពេញ ជាអ្នកមានភោគសម្បត្តិបរិបូរណ៍ មានលំនៅក្បែរច្រាំងទន្លេបួនមុខ (សម័យនោះ ប្រហែលទន្លេបួនមុខ ស្ថិតនៅម្តុំវត្តភ្នំ ។ ក្រោយមកជាបន្តបន្ទាប់ ទន្លេមេគង្គបាននាំដីល្បាប់ ធ្វើឲ្យជ្រោយចង្វា កាន់តែដុះវែងមកកន្លែងសព្វថ្ងៃ) ។ ផ្ទះរបស់គាត់សង់នៅលើទួលខាងកើតភ្នំតូចមួយ ។ ថ្ងៃមួយទីនោះមានភ្លៀងធ្លាក់ខ្លាំង ទឹកទន្លេជន់លិចរហាច ដូនពេញបានចុះទៅកំពង់ទឹក ស្រាប់តែឃើញដើមគគីរមួយធំ អណ្តែតមកក្បែរច្រាំង ហើយដោយអំណាចទឹកហូរ ស្រកចុះឡើង ដើមគគីរនោះ ចេះតែអណ្តែតវិលវល់នៅក្បែរច្រាំងនោះ ។
លុះដូនពេញឃើញដូច្នេះក៏ប្រញាប់ទៅហៅអ្នកជិតខាង ឲ្យមកជួយទាញយកដើមគគីរនោះ។ ពេលនោះដូនពេញ យកកំណាត់ឈើទៅកោសកៀរសម្អាតភក់ចេញ គាត់ក៏បានឃើញក្នុងប្រហោងឈើគគីរ មានព្រះពុទ្ធរូប៤អង្គ តូចៗ ធ្វើអំពីសំរឹទ្ធិ និងទេវរូបមួយអង្គទៀតធ្វើអំពីថ្ម ។ ទេវរូបនោះទ្រង់ឈរព្រះហស្តម្ខាងទ្រង់ដំបង ព្រះហស្តម្ខាងទៀត ទ្រង់ស័ង្ខ ព្រះកេសាបួង ។ ដូនពេញ និងអ្នកជិតខាងដែលទៅជួយមានសេចក្តីត្រេកអរណាស់ ដោយរើសបានរបស់ជាទីគោរពបូជា ក៏នាំគ្នាដង្ហែព្រះបដិមាទាំងនោះ មកដល់ផ្ទះដូនពេញ ហើយដូនពេញចាត់ការ សង់ខ្ទមមួយ តូចតម្កល់ជាបណ្ដោះអាសន្ន ។ ថ្ងៃក្រោយមក ដូនពេញអំពាវនាវឲ្យអ្នកជិតខាងជួយលើកដីពូនភ្នំ ដែលនៅខាងលិចផ្ទះរបស់គាត់នោះឲ្យទៅជាភ្នំមែនទែន ។ បន្ទាប់ពីនោះ គាត់ឲ្យគេអារឈើគគីរនោះធ្វើជាសសរវិហារ ដែលគាត់បម្រុងសង់លើភ្នំនោះ ។ ក្នុងគ.ស.១៣៧២ ដូនពេញ និងអ្នកស្រុកជាច្រើននាក់ ស្រុះស្រួលបបួលគ្នាសាងសង់ព្រះវិហារមួយខ្នង ប្រក់ស្បូវភ្លាំង នៅលើកំពូលភ្នំនោះ ហើយគាត់នាំគ្នាដង្ហែព្រះពុទ្ធរូបសំរឹទ្ធិទាំង៤អង្គ ទៅតម្កល់ទុកក្នុងវិហារនោះ ។
ចំណែកទេវរូបថ្មមួយអង្គ គាត់ដង្ហែទៅតម្កល់ទុកលើអាសនៈមួយនៅជើងភ្នំខាងកើត ហើយដោយគាត់យល់ថា ទេវរូបនោះអណ្តែតទឹកមកពីស្រុកលាវ និងមានសភាពដូចជាលាវ គាត់ក៏បានសន្មតនាមថា អ្នកតាព្រះចៅ តែបច្ចុប្បន្នគេនាំគ្នាហៅថា លោកតាព្រះចៅ រហូតមកដល់សព្វថ្ងៃនេះ ។
សូមបញ្ជាក់ថា ទីតាំង លោកតាព្រះចៅ នារមណីយដ្ឋានវត្តភ្នំ ស្ថិតក្រោមការគ្រប់គ្រង របស់មន្ទីរវប្បធម៌និងវិចិត្រសិល្បៈ រាជធានីភ្នំពេញ ៕ដោយ៖កូឡាប
