ខេត្តមណ្ឌលគិរី៖ ជនត្រូវចោទ១រូបត្រូវបានចៅក្រមស៊ើបសួរសាលាដំបូងខេត្តមណ្ឌលគិរី សម្រេចឃុំខ្លួនដាក់ពន្ធនាគារបណ្ដោះអាសន្ន ពីបទកាប់គាស់ និងរុករានដីព្រៃ ដើម្បីយកដីធ្វើជាកម្មសិទ្ធិ តាមមាត្រា៦២ បទល្មើសធនធានធម្មជាតិថ្នាក់ទី៤ នៃច្បាប់ស្ដីពីធនធានធម្មជាតិ។
ជនត្រូវចោទរូបនេះ មានឈ្មោះ សឹក ម៉ាណ ភេទប្រុស អាយុ៣៩ឆ្នាំ រស់នៅភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ត្រូវបានមន្ត្រីឧទ្យានុរក្សដែនជម្រកសត្វព្រៃស្រែពក។
ការឃាត់ខ្លួននេះ សមត្ថកិច្ច បានចាប់ឃាត់ខ្លួន និងដកហូតវត្ថុតាងរណារយន្តចំនួន១គ្រឿង កាលពីវេលាម៉ោង៩យប់ ថ្ងៃទី៨ ខែមករា ឆ្នាំ២០២០ នៅចំណុចអូរជីមីស ស្ថិតក្នុងភូមិចុងផាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ក្នុងដែនជម្រកសត្វព្រៃស្រែពក ខណៈជនសង្ស័យរូបនេះ កំពុងធ្វើសកម្មភាពកាប់គាស់ និងរុករានដីព្រៃដោយខុសច្បាប់។
បច្ចុប្បន្នមន្រ្តីឧទ្យានុរក្សដែនជម្រកសត្វព្រៃស្រែពក បានចងក្រងសំណុំរឿងតាមនីតិវិធី ហើយត្រូវបានសាលាដំបូងខេត្តមណ្ឌលគិរី ចេញដីកាសម្រេចឃុំខ្លួនជនសង្ស័យខាងលើនេះ ជាបណ្ដោះអាសន្ន ដាក់ពន្ធនាគារ៕ ដោយ៖ ដែន សីមា
