ប្រធានាធិបតីអាមេរិច ដូណាល់ ត្រាំ បានថ្លែងថា ប្រទេសអ៊ីរ៉ងមានគម្រោងវាយប្រហារស្ថានទូតអាមេរិចចំនួន ៤កន្លែងនៅពេលដែលមបញ្ជាការជាន់ខ្ពស់របស់ខ្លួនឈ្មោះ Qasem Soleimani ត្រូវបានសម្លាប់។
នៅពេលសួរថាតើ ការគំរាមកំហែងអ្វីដែលបណ្តាលឲ្យមានការវាយប្រហារ ដោយដ្រូនកាលពីថ្ងៃសុក្រសប្តាហ៍មុន លោកត្រាំ ថ្លែងថា ខ្ញុំអាចបញ្ចេញឲ្យដឹងថា ប្រហែលមានស្ថានទូត ៤នឹងត្រូវរងការវាយប្រហារ។
ការសម្លាប់ Qasem Soleimani ដែលជាវីរៈបុរសរបស់អ៊ីរ៉ង កើតឡើងតែមួយថ្ងៃប៉ុណ្ណោះក្រោយពេលមានការផ្ទុះការតវ៉ា អស់ជាច្រើនថ្ងៃនៅស្ថានទូតអាមេរិច ក្នុងទីក្រុងបាដាដ ប្រទេសអ៊ីរ៉ាក់។
ប៉ុន្តែគណបក្សប្រជាធិបតេយ្យ ដែលត្រូវគេផ្តល់ព័ត៌មានស៊ើបការណ៍ឲ្យ បាននិយាយថាពួកគេមិនឃើញមានផែនការណ៍ នៃការវាយប្រហារស្ថានទូតនោះទេ។
សូមបញ្ជាក់ថា Qasem Soleimani គឺជាមេខ្លោងនៃរាល់ការធ្វើសកម្មភាពរបស់អ៊ីរ៉ង នៅមជ្ឈិមបូព៌ា។ លោក ត្រាំ និងរដ្ឋមន្រ្តីការបរទេស Mike Pompeo បានថ្លែងថា មេបញ្ជាការអ៊ីរ៉ងរូបនោះបានធ្វើឲ្យមនុស្សស្លាប់រាប់ពាន់នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
