ខេត្តព្រះសីហនុ៖ នគរបាលអន្តោប្រវេសន៍ នៃច្រកទ្វារអន្តរជាតិកំពង់ ខេត្តព្រះសីហនុ បានឲ្យដឹងថា មាននាវាទេសចរណ៍បរទេសមួយគ្រឿង បានចូលចតកំពង់ផែក្រុងព្រះសីហនុ នៅម៉ោង៨ និង៣០នាទីព្រឹកថ្ងៃទី១១ ខែមករា ឆ្នាំ២០២០។
កប៉ាល់ ឬនាវាទេសចរណ៍មួយនេះ បានដឹកភ្ញៀវទេសចរចម្រុះជាតិសាសន៍ចំនួន ១៧១១នាក់ ចូលមកទស្សនាប្រទេសកម្ពុជារយៈពេលមួយថ្ងៃ។
មន្ត្រីនគរបាលប្រចាំច្រកទ្វារអន្តរជាតិកំពង់ផែខេត្តព្រះសីហនុ បានបន្តថា នាវានេះមានកងនាវិកសរុប៧៧៣នាក់ ហើយមានដំណើរចេញពីប្រទេសថៃ ចូលមកទស្សនាប្រទេសកម្ពុជា ហើយនឹងបន្តទៅកាន់ប្រទេសវៀតណាមទៀត នៅម៉ោង៧យប់ថ្ងៃទី១១ ខែមករា ឆ្នាំ២០២០នេះ៕ ដោយ៖ ដែន សីមា