រាជធានីភ្នំពេញ៖ លោកឧកញ៉ា ទៀ វិចិត្រ អគ្គនាយកក្រុមហ៊ុន ជី.ធី.វី.ស៊ី, ស្ពីតបូត កម្ពុជា (G.T.V.C, SPEED BOAT CAMBODIA) កាលពីថ្ងៃទី១០ ខែមករា ឆ្នាំ២០២០ បាននាំយកសត្វខ្លាឃ្មុំតូច១ក្បាល ផ្តល់ជូនមន្ត្រីអគ្គនាយកដ្ឋានរដ្ឋបាលការពារ និងអភិរក្សធម្មជាតិ ដោយមានវត្តមាន មន្ត្រីជំនាញរដ្ឋបាលព្រៃឈើ, មន្ត្រីកងរាជអាវុធហត្ថលើផ្ទៃប្រទេស និងបុគ្គលិកអង្គការសម្ព័ន្ធសត្វព្រៃក៏បានចូលរួមផង។
ពិធីប្រគល់ និងទទួលសត្វខ្លាឃ្មុំ ១ក្បាលនេះ បានរៀបចំនៅគេហដ្ឋាន របស់លោកឧកញ៉ា ទៀ វិចិត្រ ស្ថិតនៅផ្ទះលេខ០៩ ផ្លូវផ្កាឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ។
នាឱកាសនោះ លោកឧកញ៉ា ទៀ វិចិត្រ មានប្រសាសន៍ថា សត្វខ្លាឃ្មុំតូចនេះ មានទម្ងន់ប្រមាណ១២គីឡូក្រាម ដោយលោកទទួលបានពីប្រជាពលរដ្ឋម្នាក់នាំយកមកប្រគល់ជូនលោក។
លោកឧកញ៉ាបន្តថា សត្វខ្លាឃ្មុំមួយក្បាលនោះ ក៏កំពុងមានរបួសក្រចកជើងឆ្វេងម្ខាង ផ្នែកខាងក្រោយ។ ហើយថា ការប្រគល់បន្តសត្វខ្លាឃ្មុំតូចមួយក្បាលខាងលើនេះ ជូនផ្នែកជំនាញពាក់ព័ន្ធ ក៏ដើម្បីនាំយកទៅព្យាបាលតាមបច្ចេកទេសពេទ្យសត្វ។
បច្ចុប្បន្ន សត្វខ្លាឃ្មុំមួយក្បាលនោះ ត្រូវក្រុមការងារផ្នែកជំនាញ បានដឹកជញ្ជូនយកទៅកាន់មជ្ឈមណ្ឌលសង្គ្រោះសត្វព្រៃភ្នំតាម៉ៅ ដើម្បីពិនិត្យសុខភាព ថែរក្សា និងតាមដានសុខភាពសត្វនៅទីនោះ។
នៅក្នុងពិធីនោះដែរ តំណាងស្ថាប័នពាក់ព័ន្ធជំនាញនីមួយៗ បានថ្លែងអំណរគុណដល់ លោកឧកញ៉ាទៀ វិចិត្រ ដែលកន្លងមកបានចូលរួមយ៉ាងសកម្ម ទៅលើការងារជួយការពារអភិរក្សសត្វព្រៃគ្រប់ប្រភេទ ជាពិសេសប្រភេទសត្វកម្រនៅក្នុងប្រទេសកម្ពុជា ឲ្យបានគង់វង្ស និងសម្បូរបែបឡើងវិញ៕ ដោយ៖ ដែន សីមា
